মাজুলী : গাঁওবাসীৰ উদ্যোগত বাঁহৰ দলঙ বানাক্ৰান্ত অঞ্চলত পুনৰুদ্ধাৰ
- গাঁওবাসীয়ে বাঁহেৰে দলঙ বনাই যোগাযোগ পুনৰুদ্ধাৰ কৰিলে।
- ভাঙি পৰা কাঠৰ দলঙ আৰু বেয়া পথৰ বাবে বহু ৰোগী, গৰ্ভৱতী মহিলা আৰু শিশুৰ মৃত্যুৰ ঘটনা ঘটিছিল।
- ৪ কিলোমিটাৰৰ যাত্ৰাত বহু বাধা, বিশেষকৈ বর্ষাত কেঁচা-পিচল পথ।
- চৰকাৰী সহায়ৰ অভাৱত গাঁওবাসীৰ নিজ উদ্যোগত বাঁহৰ দলঙ নিৰ্মাণ।
- মাজুলীৰ এই ঘটনা গাঁওবাসীৰ একতা আৰু সংকটকালত নিজ হাতে সমস্যা সমাধান কৰাৰ মনোবলক প্ৰতিফলিত কৰে। যোগাযোগৰ এই সঁজুলি গাঁওবাসীৰ বাবে আশাৰ বাণী হৈ উঠিছে।
সমগ্ৰ সমাচাৰ সেৱা
মাজুলী,৪ জুলাই : মাজুলীৰ লোহিত খাবলু গাঁও পঞ্চায়তৰ অধীনৰ বহু গাঁৱত বানপানী আৰু ভাঙি পৰা দলঙৰ বাবে বহুদিন ধৰি সংযোগ বিচ্ছিন্ন হৈ আছিল। বহু ৰোগী, গৰ্ভৱতী মহিলা আৰু সাপৰ কামোৰ খোৱা শিশু সময়মতে চিকিৎসালয়ত নপোৱাৰ ফলত মৃত্যুক সাৱটিছিল। এনে বিপৰ্যস্ত সময়ত পথৰিচুক, বৰালিমৰা, দুঘৰীয়া আৰু দুঘৰীয়া সমবায় গাঁৱৰ বাসিন্দাসকলে নিজৰ উদ্যোগত বাঁহেৰে এটা দলঙ নিৰ্মাণ কৰে।
এই দলঙৰ সহায়ত ছাত্ৰ-ছাত্ৰীয়ে বিদ্যালয় যোৱা, ৰোগীক চিকিৎসালয়লৈ নিয়াৰ ব্যৱস্থা কিছু সহজ হৈছে। এই গাঁওসমূহৰ সংযোগ গড়মুৰৰ ২০০ শয্যাৰ শ্ৰী শ্ৰী পিতাম্বৰদেৱ গোস্বামী জিলা হাস্পতালৰ সৈতে আছে, কিন্তু বেয়া পথ আৰু ভাঙি থকা কাঠৰ দলঙৰ বাবে ৪ কিলোমিটাৰ যাত্ৰা অতি কষ্টসাধ্য। বৰষুণত কেঁচা, পিচল পথ আৰু শীতত ধূলিমাখা বাটে গাঁওবাসীয়ে প্ৰতিদিনে বিপদৰ সন্মুখীন হয়।
গাঁওবাসীয়ে চৰকাৰী সাহায্যৰ অভাৱত দলঙ নিজে তৈয়াৰ কৰি যোগাযোগৰ সঁজুলি পুনৰুদ্ধাৰ কৰিছে। এতিয়াও লোহিত খাবলু অঞ্চলত তিনিটা কাঠৰ দলঙৰ অৱস্থা জৰাজীর্ণ, যাৰ বাবে বানপানীৰ সময়ত নাওয়ে পাৰ হ’ব লগা হয়। মাজুলী জিলালৈ অন্তর্ভুক্তি হোৱা ৪ বছৰৰ পাছতো যোগাযোগৰ সমস্যা আগৰ দৰে অব্যাহত আছে।
About The Author
