অসম প্ৰকাশন পৰিষদ :গ্ৰন্থবৰ্ষ ২০২৫ ফেলোশ্বিপ ৪৯ লেখকক নিৰ্বাচন

গ্ৰন্থবৰ্ষ ২০২৫ ফেলোশ্বিপৰ বাবে ৪৯ জন লেখক নিৰ্বাচিত।
৫১২ জন লেখকৰ ৫৪৭খন পাণ্ডুলিপিৰ মাজৰ পৰা বাছনি সম্পন্ন।
ফেলোশ্বিপপ্ৰাপ্ত প্ৰতিজনে ৫০ হাজাৰ টকা আৰু সনদপত্ৰ লাভ কৰিব।
অসমীয়া, বাংলা, বড়ো আৰু জনগোষ্ঠীয় ভাষাৰ সাহিত্য সৃষ্টিক উৎসাহিত কৰাৰ লক্ষ্যৰে এই উদ্যোগ।
গ্ৰন্থবৰ্ষ ২০২৫ ফেলোশ্বিপ: ৪৯ জন লেখকক নিৰ্বাচন কৰিলে অসম প্ৰকাশন পৰিষদ

সমগ্ৰ সমাচাৰ সেৱা

গুৱাহাটী ৪ জুলাই :অসম চৰকাৰে ঘোষিত ‘গ্ৰন্থবৰ্ষ ২০২৫’ উপলক্ষে অসম প্ৰকাশন পৰিষদে আয়োজন কৰা ‘গ্ৰন্থবৰ্ষ ২০২৫ ফেলোশ্বিপ’ ৰ বাবে ৪৯ জন লেখকৰ নাম আনুষ্ঠানিকভাৱে ঘোষণা কৰিছে। বিভিন্ন ভাষা আৰু বিষয়ৰ উৎকৃষ্ট পাণ্ডুলিপি বাছনি কৰি এই ফেলোশ্বিপ প্ৰদান কৰা হৈছে। ফেলোশ্বিপপ্ৰাপ্ত প্ৰতিজন লেখকে ৫০ হাজাৰ টকাৰ আৰ্থিক অনুদান আৰু এখন সনদপত্ৰ লাভ কৰিব।

অসম প্ৰকাশন পৰিষদৰ উপাধ্যক্ষ তথা বিশিষ্ট লেখক আৰু অভিধান প্ৰণেতা সুমন্ত চলিহাৰ সভাপতিত্বত গঠিত ১০ সদস্যীয়া বাছনি সমিতিয়ে দীৰ্ঘ পৰ্যালোচনাৰ অন্তত এই তালিকা প্ৰস্তুত কৰে। সমিতিত অনুৰাধা শৰ্মা পূজাৰী, ড০ সত্যকাম বৰঠাকুৰ, ড০ ছাইদুল ইছলাম, ড০ অদিতি বেজবৰুৱা, কামেশ্বৰ বড়ো, ড০ প্ৰশান্ত চক্ৰৱৰ্তী, ড০ বিভা ভড়ালী, ড০ লিপিকা তালুকদাৰ আৰু অচ্যুত কুমাৰ পাটোৱাৰী সদস্য হিচাপে আছিল।

অসমীয়া, বাংলা, বড়ো ভাষাৰ লগতে অসমৰ বিভিন্ন জনগোষ্ঠীয় ভাষাৰ লেখকসকলৰ বাবে মুঠ ২২টা বিষয়ত পাণ্ডুলিপি আহ্বান কৰা হৈছিল। এই আহ্বানৰ প্ৰতি ব্যাপক সঁহাৰি জনাই ৫১২ জন লেখকে ৫৪৭খন পাণ্ডুলিপি জমা দিয়ে। বিশেষজ্ঞসকলৰ মূল্যায়নৰ পিছত ৪৯খন পাণ্ডুলিপি চূড়ান্তভাৱে নিৰ্বাচিত হয়।

অসমীয়া ভাষাত সাহিত্য, ইতিহাস, সংস্কৃতি, জীৱনী, সমাজ, বিজ্ঞান, অনুবাদ, নাট্য ইতিহাস, লোকসংস্কৃতি, পৰিৱেশ, ধৰ্ম, ক্ৰীড়া, ভাষাবিজ্ঞান আদি বিস্তৃত বিষয়ৰ ওপৰত একাধিক লেখকক বাছনি কৰা হৈছে। একে সময়তে বাংলা ভাষাত ৭ জন আৰু বড়ো ভাষাত ৩ জন লেখকৰ পাণ্ডুলিপিও ফেলোশ্বিপৰ বাবে নিৰ্বাচিত হৈছে।

অসম প্ৰকাশন পৰিষদৰ এই পদক্ষেপে ৰাজ্যখনত গুণগত মানসম্পন্ন গ্ৰন্থ ৰচনা, গৱেষণামূলক সাহিত্য সৃষ্টি আৰু মাতৃভাষাভিত্তিক জ্ঞানচৰ্চাক অধিক শক্তিশালী কৰাৰ ক্ষেত্ৰত গুৰুত্বপূৰ্ণ ভূমিকা পালন কৰিব বুলি সাহিত্য মহলে আশা প্ৰকাশ কৰিছে। চৰকাৰৰ ‘গ্ৰন্থবৰ্ষ ২০২৫’ উদ্যোগৰ অংশ হিচাপে এই ফেলোশ্বিপে নতুন আৰু প্ৰতিষ্ঠিত উভয় শ্ৰেণীৰ লেখকক সৃষ্টিশীল কৰ্মত অধিক উৎসাহিত কৰিব বুলিও মত প্ৰকাশ কৰা হৈছে।