এক দেশ–এক নিৰ্বাচন'ৰ:অসম, পশ্চিমবংগ, কেৰল, তামিলনাডু বিধানসভাৰ কাৰ্যকাল হ্ৰাসৰ সম্ভাৱনা

কেন্দ্ৰীয় পৰিকল্পনা ‘এক দেশ–এক নিৰ্বাচন’ৰ বাবে অসম, পশ্চিমবংগ, কেৰল, তামিলনাডু আদি ৰাজ্যৰ বিধানসভাৰ কাৰ্যকাল হ্ৰাসৰ সম্ভাৱনা।
সমন্বিত নিৰ্বাচনী চক্ৰ গঢ়ি তুলিবলৈ কিছুমান ৰাজ্যত কাৰ্যকাল কমাব লাগিব; সংবিধান সংশোধন অবশ্যম্ভাবী।
২০২৬ত গঠিত বিধানসভাই সাধাৰণতে ২০৩১লৈ চলিব; নতুন ব্যৱস্থা কার্যকৰ হ’লে ২০২৯তেই পুনৰ নিৰ্বাচন।
সমন্বিত নিৰ্বাচনে শাসন ব্যৱস্থা স্থিৰ, ব্যয় হ্ৰাস আৰু উন্নয়নমূলক কাৰ্যত গতি আনিব বুলি কেন্দ্ৰৰ যুক্তি; সমালোচকে গণতন্ত্ৰিক আদেশৰ অপূৰ্ণতাৰ আশংকা ব্যক্ত কৰে।

সমগ্ৰ সমাচাৰ সেৱা |

গুৱাহাটী, ১২ জুলাই :দেশজুৰি লোকসভা আৰু ৰাজ্যিক বিধানসভাৰ নিৰ্বাচন একে সময়ত অনুষ্ঠিত কৰাৰ লক্ষ্যৰে ‘এক দেশ–এক নিৰ্বাচন’ পৰিকল্পনাক লৈ নতুন বিতৰ্কৰ সূচনা হৈছে। সমিতিৰ ব্যাখ্যানুসৰি, সমগ্ৰ দেশত একেদিনাই ভোট নহ’লেও, নিৰ্বাচন পৰ্যায়ক্ৰমে অনুষ্ঠিত হ’ব আৰু পাচ বছৰত এবাৰহে এই চক্ৰ আহিব।

এই পৰিকল্পনাৰ মূল চেলেঞ্জ হৈছে বিভিন্ন ৰাজ্যৰ বিধানসভাৰ কাৰ্যকাল সমন্বয় কৰা। বৰ্তমান বিভিন্ন ৰাজ্যত বিভিন্ন সময়ত বিধানসভা গঠিত হয়, সেইবাবে একেটা নিৰ্বাচনী চক্ৰ স্থাপন কৰিবলৈ কিছুমান ৰাজ্যত কাৰ্যকাল হ্ৰাস (বা বৃদ্ধি)ৰ প্ৰয়োজন হ’ব পাৰে। বিশেষকৈ অসম, পশ্চিমবংগ, কেৰল, তামিলনাডু আদি ৰাজ্যৰ ২০২৬ত গঠিত বিধানসভাই সাধাৰণতে ২০৩১লৈ কাৰ্যকাল পূৰ্ণ কৰিবলৈ কথা, কিন্তু নতুন ব্যৱস্থা কার্যকৰ হ’লে ২০২৯ত পুনৰ নিৰ্বাচন সম্ভৱ।

সংবিধানৰ ১৭২ নং অনুচ্ছেদ অনুসৰি বিধানসভাৰ সাধাৰণ কাৰ্যকাল ৫ বছৰৰ, সেয়ে কাৰ্যকাল হ্ৰাস কৰিবলৈ সাংবিধানিক সংশোধন আবশ্যক। এই কাৰণে ৰাজনৈতিক, সাংবিধানিক আৰু যুক্তৰাষ্ট্ৰীয় দিশত ব্যাপক আলোচনা চলিছে।

কেন্দ্ৰৰ যুক্তি হৈছে, সমন্বিত নিৰ্বাচনে শাসন ব্যৱস্থা অধিক স্থিৰ, ব্যয় হ্ৰাস আৰু উন্নয়নমূলক কাৰ্যত অধিক মনোযোগ দিব পাৰে। বৰ্তমান প্ৰায় প্ৰতিবছৰে কোনোবা ৰাজ্যত নিৰ্বাচন হওয়াত আচৰণ বিধি বলবৎ হয় আৰু বহু সিদ্ধান্ত বিলম্বিত হয়। আনহাতে, সমালোচকসকলে কয়, পাঁচবছৰীয়া কাৰ্যকাল হ্ৰাস কৰিলে জনসাধাৰণৰ গণতান্ত্ৰিক আদেশৰ পূৰ্ণ বাস্তৱায়ন নহ’ব পাৰে আৰু কেন্দ্ৰ-ৰাজ্য স্বায়ত্তশাসনৰ ওপৰতো প্ৰভাৱ পৰিব পাৰে।