ৰঙিয়াত আক্ৰমণত ছাত্ৰৰ মৃত্যু, বন্ধু সংকটজনক অৱস্থাত

ৰঙিয়াত আক্ৰমণত ধনজিৎ কলিতাৰ মৃত্যু।
বন্ধু বিশাল দাসৰ অৱস্থা সংকটজনক।
দুৰ্গাপূজা চাই উভতাৰ পথত পথ দুৰ্ঘটনাৰ পিছতে আক্ৰমণৰ অভিযোগ।
ন্যায়ৰ দাবীত শতাধিক লোকৰ প্ৰতিবাদ।

সমগ্ৰ সমাচাৰ সেৱা

ৰঙিয়া, ২০ অক্টোবৰ: অসমৰ কামৰূপ জিলাৰ ৰঙিয়াত দুৰ্গাপূজাৰ মণ্ডপ দৰ্শন কৰি ঘৰলৈ উভতি অহাৰ পথত আক্ৰমণৰ সন্মুখীন হৈ এজন উচ্চতৰ মাধ্যমিকৰ ছাত্ৰৰ মৃত্যু হোৱাৰ লগতে তেওঁৰ বন্ধুজন গুৰুতৰভাৱে আহত হয়। সোমবাৰে নিশা বৰকা পানিটেমা অঞ্চলত সংঘটিত এই ঘটনাক কেন্দ্ৰ কৰি অঞ্চলটোত উত্তেজনাৰ সৃষ্টি হৈছে।

পথ দুৰ্ঘটনাৰ পিছতে আক্ৰমণৰ অভিযোগ

মৃত ছাত্ৰজনক ৰঙিয়াৰ আঠগাঁও নিবাসী ধনজিৎ কলিতা বুলি চিনাক্ত কৰা হৈছে। তেওঁৰ বন্ধু বিশাল দাস বৰ্তমান সংকটজনক অৱস্থাত চিকিৎসাধীন হৈ আছে। জানিব পৰা মতে, দুয়োজনে দুচকীয়া বাহনেৰে দুৰ্গাপূজাৰ মণ্ডপ দৰ্শন কৰি ঘৰলৈ উভতি আহি থকাৰ সময়তে পথৰ কাষত জমা হৈ থকা বালিত বাহনখন পিছলি দুৰ্ঘটনাত পতিত হয়।

পৰিয়ালৰ লোক আৰু স্থানীয় বাসিন্দাসকলৰ অভিযোগ অনুসৰি, দুৰ্ঘটনাৰ পিছত উপস্থিত একাংশ লোকে দুয়োকে সহায় কৰাৰ পৰিৱৰ্তে আক্ৰমণ কৰে। এই আক্ৰমণতে ধনজিৎ কলিতাৰ মৃত্যু হোৱা বুলি অভিযোগ উত্থাপিত হৈছে। অৱশ্যে ঘটনাৰ সম্পূৰ্ণ পৰিস্থিতি আৰক্ষীৰ তদন্তৰ পিছতহে স্পষ্ট হ’ব।

ন্যায়ৰ দাবীত ৰঙিয়া থানাৰ সন্মুখত প্ৰতিবাদ

ঘটনাৰ পিছতে ক্ষুব্ধ স্থানীয় ৰাইজে ৰঙিয়া আৰক্ষী থানাৰ সন্মুখত সমবেত হৈ প্ৰতিবাদ সাব্যস্ত কৰে। শতাধিক লোকৰ উপস্থিতিত প্ৰতিবাদকাৰীসকলে ঘটনাটোৰ নিৰপেক্ষ তদন্ত আৰু দোষীসকলৰ বিৰুদ্ধে কঠোৰ ব্যৱস্থা গ্ৰহণৰ দাবী জনায়।

আৰক্ষীয়ে ঘটনাটোৰ তদন্ত আৰম্ভ কৰিছে। আক্ৰমণৰ প্ৰকৃত কাৰণ, জড়িত লোকসকলৰ পৰিচয় আৰু ঘটনাৰ সৈতে জড়িত আন আন দিশসমূহ পৰীক্ষা কৰি থকা হৈছে।