পাঞ্জাবাৰীৰ অটোচালক হত্যাকাণ্ডত দ্বিতীয় অভিযুক্ত গ্ৰেপ্তাৰ

পাঞ্জাবাৰীৰ অটোচালক হত্যাকাণ্ডত দ্বিতীয় অভিযুক্ত গ্ৰেপ্তাৰ।
মৃত অটোচালকজনৰ নাম জিয়াৰুৰ হক ওৰফে টুনটুন আলী।
পৰিয়ালৰ ৫,০০০ টকা আৰু সোণৰ আঙঠি লুটৰ অভিযোগ।
তৃতীয় অভিযুক্ত জাকিৰ আলীৰ সন্ধানত আৰক্ষীৰ অভিযান।

সমগ্ৰ সমাচাৰ সেৱা

গুৱাহাটী, ২২ অক্টোবৰ: গুৱাহাটীৰ পাঞ্জাবাৰীত অটো-ৰিক্সা চালক জিয়াৰুৰ হক ওৰফে টুনটুন আলীৰ হত্যাকাণ্ডৰ গোচৰত দিছপুৰ আৰক্ষীয়ে দ্বিতীয়জন অভিযুক্তক গ্ৰেপ্তাৰ কৰিছে। আৰক্ষীৰ তথ্য অনুসৰি, এই ঘটনাৰ সৈতে জড়িত তিনিজন অভিযুক্তৰ ভিতৰত ৰাজিবুল আলী আৰু ৰছিদ আলীক গ্ৰেপ্তাৰ কৰা হৈছে। আনহাতে, তৃতীয় অভিযুক্ত জাকিৰ আলী এতিয়াও পলাতক হৈ আছে।

পুৰণাবস্তিৰ পৰিত্যক্ত ঘৰত উদ্ধাৰ হৈছিল মৃতদেহ

আৰক্ষীৰ তথ্য অনুসৰি, ২১ অক্টোবৰৰ দুপৰীয়া পাঞ্জাবাৰী অঞ্চলত ভুক্তভোগীজনৰ সৈতে তিনিজন লোকৰ বিবাদৰ সূত্ৰপাত হয়। অভিযোগ অনুসৰি, বিবাদৰ পিছত অভিযুক্তসকলে তেওঁক আক্ৰমণ কৰে আৰু মূৰত গুৰুতৰ আঘাত পোৱাৰ ফলত তেওঁৰ মৃত্যু হয়।

পিছত পাঞ্জাবাৰীৰ পুৰাণবস্তি অঞ্চলৰ এটা পৰিত্যক্ত ঘৰৰ পৰা অটোচালকজনৰ মৃতদেহ উদ্ধাৰ কৰা হয়। ঘটনাটোৰ পিছতে দিছপুৰ আৰক্ষীয়ে তদন্ত আৰম্ভ কৰে আৰু অভিযুক্তসকলক বিচাৰি অভিযান চলায়।

ধন আৰু সোণৰ আঙঠি লুটৰ অভিযোগ

মৃতকৰ পৰিয়ালে অভিযোগ কৰিছে যে আক্ৰমণকাৰীসকলে তেওঁৰ পৰা ৫,০০০ টকা নগদ ধন আৰু এটা সোণৰ আঙঠি কাঢ়ি লৈছিল। পৰিয়ালটোৱে ঘটনাটোৰ উচিত তদন্ত আৰু দোষীসকলৰ বিৰুদ্ধে ব্যৱস্থা গ্ৰহণৰ দাবী জনাইছে।

আৰক্ষীয়ে ঘটনাটোৰ আঁৰৰ কাৰণ আৰু প্ৰতিজন অভিযুক্তৰ ভূমিকা নিৰ্ধাৰণ কৰিবলৈ তদন্ত অব্যাহত ৰাখিছে। পলাতক অভিযুক্ত জাকিৰ আলীক গ্ৰেপ্তাৰ কৰাৰ বাবেও অভিযান চলি আছে।