মৰিগাঁও অসামৰিক চিকিৎসালয়ত আৰক্ষীৰ অভিযান, ৪ দালাল গ্ৰেপ্তাৰ

মৰিগাঁও অসামৰিক চিকিৎসালয়ত আৰক্ষীৰ অভিযানত ৪ জন কথিত দালাল গ্ৰেপ্তাৰ।
ৰোগীৰ পৰা অবৈধ ধন আদায় আৰু ব্যক্তিগত পৰীক্ষাগাৰলৈ প্ৰেৰণ কৰাৰ অভিযোগ।
তেজ যোগান আৰু ঔষধ বিক্ৰীত দালালি চলোৱাৰ অভিযোগত তদন্ত অব্যাহত।
চিকিৎসালয়ৰ কোনো কৰ্মচাৰী জড়িত আছে নেকি, সেই দিশতো আৰক্ষীৰ অনুসন্ধান তীব্ৰ।

সমগ্ৰ সমাচাৰ সেৱা

মৰিগাঁও ৩ জুলাই: অসামৰিক চিকিৎসালয়ত দীৰ্ঘদিন ধৰি সক্ৰিয় হৈ থকা এক কথিত দালাল চক্ৰৰ বিৰুদ্ধে বৃহৎ অভিযান চলাই ৪ জন লোকক গ্ৰেপ্তাৰ কৰিছে মৰিগাঁও সদৰ আৰক্ষীয়ে। চিকিৎসালয়লৈ চিকিৎসাৰ বাবে অহা সাধাৰণ ৰোগী আৰু তেওঁলোকৰ আত্মীয়ক বিভিন্ন প্ৰলোভন আৰু মিছা প্ৰতিশ্ৰুতিৰে প্ৰতাৰণা কৰাৰ অভিযোগত এই অভিযান চলোৱা হয়। আৰক্ষীৰ এই পদক্ষেপে চিকিৎসালয়খনত চলি থকা অনিয়মৰ বিৰুদ্ধে কঠোৰ ব্যৱস্থাৰ স্পষ্ট বাৰ্তা দিছে।

আৰক্ষীৰ তথ্য অনুসৰি, গ্ৰেপ্তাৰ হোৱা লোককেইজন হৈছে মুষ্টাফিজুৰ আহমেদ, জেহিৰুল ইছলাম, মোকছেদ আলী আৰু মমিনুল হক। অভিযোগ অনুসৰি, তেওঁলোকে চিকিৎসকক তৎক্ষণাত দেখুৱাই দিয়াৰ নামত অথবা চৰকাৰী সুবিধা সহজে পাই দিয়াৰ আশ্বাস দি ৰোগী আৰু আত্মীয়ৰ পৰা অবৈধভাৱে ধন আদায় কৰিছিল। ফলত বহু দৰিদ্ৰ আৰু অসহায় ৰোগী আৰ্থিকভাৱে ক্ষতিগ্ৰস্ত হৈছিল।

তদন্তত আন এক গুৰুত্বপূৰ্ণ অভিযোগ উত্থাপন হৈছে যে, চিকিৎসালয়ত বিনামূলীয়াকৈ উপলব্ধ তেজ পৰীক্ষা, এক্স-ৰে, আল্ট্ৰাছাউণ্ড আদি সেৱা নকৰাই অধিক কমিছনৰ আশাত ৰোগীক ব্যক্তিগত পৰীক্ষাগাৰলৈ প্ৰেৰণ কৰা হৈছিল। ইয়াৰ উপৰি চিকিৎসকে লিখি দিয়া প্ৰেছক্ৰিপশ্যন নিজৰ হাতত লৈ নিৰ্দিষ্ট ফাৰ্মাচীৰ পৰা ঔষধ ক্ৰয় কৰিবলৈও ৰোগীৰ পৰিয়ালক বাধ্য কৰাৰ অভিযোগ উত্থাপিত হৈছে।

আনহাতে, তেজৰ নাটনিৰ সুযোগ লৈ তেজ যোগানৰ নামত ক’লা বজাৰ আৰু দালালিৰো অভিযোগ পোহৰলৈ আহিছে। দীৰ্ঘদিন ধৰি চলি থকা এই কাৰ্যকলাপৰ বাবে চিকিৎসালয়লৈ অহা বহু ৰোগী অসুবিধাৰ সন্মুখীন হৈছিল। আৰক্ষীয়ে জনোৱা মতে, ধৃত লোককেইজনক সোধ-পোছ অব্যাহত আছে আৰু এই চক্ৰৰ সৈতে চিকিৎসালয়ৰ কোনো কৰ্মচাৰী বা আন কোনো ব্যক্তি জড়িত আছে নেকি, সেই দিশতো তদন্ত তীব্ৰতৰ কৰা হৈছে।

আৰক্ষীৰ এই অভিযানক মৰিগাঁৱৰ সচেতন নাগৰিক আৰু ৰোগীৰ পৰিয়ালে আদৰণি জনাইছে। স্বাস্থ্যসেৱাৰ দৰে সংবেদনশীল ক্ষেত্ৰত দালালি আৰু অনিয়মৰ বিৰুদ্ধে এনে অভিযান অব্যাহত থাকিব বুলি আশা প্ৰকাশ কৰিছে স্থানীয় ৰাইজে।