মিজোৰামত ‘MizoTaxi’ এপ বাধ্যতামূলক কৰাৰ সিদ্ধান্তক লৈ তীব্ৰ বিৰোধিতা

মিজোৰাম চৰকাৰৰ নতুন ‘MizoTaxi’ মোবাইল এপক লৈ আৰম্ভ হ’ল বিতৰ্ক।
তিনিটা পৰিবহণ সংগঠনে এপ বাধ্যতামূলক কৰাৰ সিদ্ধান্তৰ বিৰোধিতা কৰিছে।
চৰকাৰে ভাড়া নিয়ন্ত্ৰণ আৰু অধিক ভাড়া আদায় ৰোধৰ লক্ষ্যৰে এপটো চালু কৰিছে।
যাত্ৰীবাহী পৰিবহণ অপাৰেটৰসকলক এপত পঞ্জীয়ন কৰাটো বাধ্যতামূলক কৰাৰ সিদ্ধান্তক লৈ আপত্তি।
এপটো ১ জুলাইৰ পৰা আইজলত কাৰ্যকৰী হোৱাৰ কথা।
চৰকাৰৰ সিদ্ধান্তৰ বিৰুদ্ধে পৰিবহণ সংগঠনসমূহ

যাত্ৰীবাহী পৰিবহণ চালকৰ বাবে এপ ব্যৱহাৰ বাধ্যতামূলক কৰাৰ সিদ্ধান্তত অসন্তুষ্ট তিনিটা পৰিবহণ সংগঠন

সমগ্ৰ সমাচাৰ সেৱা
মিজোৰাম, ২ জুন: মিজোৰাম চৰকাৰে সদ্য উন্মোচন কৰা ‘MizoTaxi’ মোবাইল এপ্লিকেচনক বাধ্যতামূলক কৰাৰ সিদ্ধান্তৰ বিৰুদ্ধে ৰাজ্যখনৰ তিনিটা পৰিবহণ সংগঠনে সৰব হৈছে। সংগঠনসমূহে দাবী কৰিছে যে যাত্ৰীবাহী পৰিবহণ চালক আৰু অপাৰেটৰসকলৰ ওপৰত এপ ব্যৱহাৰ বাধ্যতামূলকভাৱে জাপি দিয়াটো উচিত নহয়।
চৰকাৰৰ মতে, ‘MizoTaxi’ এপটোৰ মূল উদ্দেশ্য হৈছে চৰকাৰে নিৰ্ধাৰণ কৰা ভাড়া সঠিকভাৱে আদায় নিশ্চিত কৰা, অধিক ভাড়া আদায় ৰোধ কৰা আৰু যাত্ৰীৰ বাবে এক স্বচ্ছ ডিজিটেল পৰিবহণ ব্যৱস্থা গঢ়ি তোলা। এই এপটো মিজোৰাম চৰকাৰ, Digiride Technology Pvt. Ltd. আৰু NIT Mizoramৰ যৌথ উদ্যোগত প্ৰস্তুত কৰা হৈছে।

চৰকাৰী জাননী অনুসৰি, ১ জুলাইৰ পৰা আইজল চহৰত ‘MizoTaxi’ এপৰ জৰিয়তে সেৱা আৰম্ভ হ’ব। ইয়াৰ পূৰ্বে জুন মাহৰ ভিতৰত চহৰখনৰ সকলো চাৰি-চকীয়া টেক্সি, দুই-চকীয়া টেক্সি আৰু অটোৰিক্সাক এপটোৰ সৈতে পঞ্জীয়ন সম্পূৰ্ণ কৰিবলৈ নিৰ্দেশ দিয়া হৈছে। সময়সীমাৰ ভিতৰত পঞ্জীয়ন নকৰা অপাৰেটৰসকলক অধিক মাচুল আদায় কৰিব লাগিব।

এপটোৰ জৰিয়তে ভাড়া নিয়ন্ত্ৰণ আৰু ডিজিটেল পৰিশোধ ব্যৱস্থা চালু কৰাৰ চৰকাৰৰ পদক্ষেপক যাত্ৰীৰ স্বাৰ্থত গুৰুত্বপূৰ্ণ বুলি কোৱা হৈছে যদিও, পৰিবহণ সংগঠনসমূহে বাধ্যতামূলক ব্যৱস্থাৰ পুনৰ বিবেচনা বিচাৰিছে। বিষয়টো এতিয়া মিজোৰামৰ পৰিবহণ খণ্ডত এক নতুন বিতৰ্কৰ সৃষ্টি কৰিছে।