হাফলঙত LPG ট্ৰাকৰ খুন্দাত খহিল দলঙৰ গ্ৰীল
-
হাফলং হ্ৰদৰ সমীপত দুৰ্ঘটনা।
-
ওলমা দলঙৰ ৰছীত LPG ট্ৰাকৰ খুন্দা।
-
ট্ৰাক আৰু অল্টো গাড়ীৰ ওপৰত গ্ৰীল খহি পৰে।
-
কোনো লোক হতাহত হোৱাৰ খবৰ নাই।
সমগ্ৰ সমাচাৰ সেৱা
হাফলং, ১৪ নৱেম্বৰ: ডিমা হাছাও জিলাৰ হাফলং হ্ৰদৰ সমীপত শনিবাৰে সংঘটিত এক দুৰ্ঘটনাই অঞ্চলটোত আতংকৰ সৃষ্টি কৰে। LPG চিলিণ্ডাৰ কঢ়িয়াই নিয়া এখন ট্ৰাকে হাফলঙৰ ওলমা দলঙৰ ৰছীত খুন্দা মৰাৰ ফলত দলঙৰ গধুৰ লোহাৰ গ্ৰীল খহি পৰে। এই গ্ৰীলখন ট্ৰাকখনৰ লগতে এখন অল্টো গাড়ীৰ ওপৰতো পৰে।
দলঙৰ গ্ৰীল খহি পৰাত যান-বাহন চলাচল বন্ধ
প্ৰাপ্ত তথ্য অনুসৰি, AS 02 D 5748 নম্বৰৰ LPG ট্ৰাকখনে দলঙৰ ৰছীত খুন্দা মৰাৰ পিছতে গধুৰ ধাতুৰ গ্ৰীলখন খহি পৰে। ফলত AS 11 AG 3596 নম্বৰৰ এখন অল্টো বাহনো গ্ৰীলখনৰ তলত আৱদ্ধ হৈ পৰে।
ঘটনাস্থলীত আৰক্ষী আৰু অগ্নিনিৰ্বাপক বাহিনী
এই দুৰ্ঘটনাৰ ফলত পথছোৱাত যান-বাহন চলাচল সম্পূৰ্ণৰূপে বন্ধ হৈ পৰে। ঘটনাৰ খবৰ লাভ কৰাৰ পিছতে আৰক্ষী আৰু অগ্নিনিৰ্বাপক বাহিনীৰ লোক ঘটনাস্থলীত উপস্থিত হৈ খহি পৰা গ্ৰীল আঁতৰোৱাৰ লগতে যাতায়াত স্বাভাৱিক কৰাৰ ব্যৱস্থা গ্ৰহণ কৰে।
এতিয়ালৈকে কোনো লোক হতাহত হোৱাৰ খবৰ পোৱা হোৱা নাই। দুৰ্ঘটনাটোৰ প্ৰকৃত কাৰণ আৰু ক্ষয়-ক্ষতিৰ পৰিমাণ সন্দৰ্ভত অধিক তথ্যৰ বাবে অপেক্ষা কৰা হৈছে।
