খানাপাৰা হত্যাকাণ্ডৰ মূল অভিযুক্ত গ্ৰেপ্তাৰ
-
জীনা বৈশ্যৰ মৃতদেহ বস্তাত উদ্ধাৰ।
-
মূল অভিযুক্ত প্ৰদীপ টায়ে গ্ৰেপ্তাৰ।
-
হত্যাত ব্যৱহৃত দা উদ্ধাৰ।
-
অপৰাধত ব্যৱহৃত বাহন জব্দ।
সমগ্ৰ সমাচাৰ সেৱা
গুৱাহাটী, ৯ নৱেম্বৰ: গুৱাহাটীৰ খানাপাৰাত সংঘটিত চাঞ্চল্যকৰ মহিলা হত্যাকাণ্ডৰ ঘটনাত আৰক্ষীয়ে মূল অভিযুক্তক গ্ৰেপ্তাৰ কৰিছে। ধৃত অভিযুক্তজনৰ নাম প্ৰদীপ টায়ে। আৰক্ষীয়ে তেওঁৰ পৰা হত্যাকাণ্ডত ব্যৱহৃত এখন দা উদ্ধাৰ কৰাৰ লগতে অপৰাধত ব্যৱহাৰ কৰা বুলি সন্দেহ কৰা এখন যাত্ৰীবাহী বাহনো জব্দ কৰিছে।
নিহত মহিলাগৰাকীক জীনা বৈশ্য বুলি চিনাক্ত কৰা হৈছে। যোৱা ৭ নৱেম্বৰত খানাপাৰাৰ গণেশ মন্দিৰৰ সমীপত এটা বস্তাৰ ভিতৰত ভৰাই থোৱা অৱস্থাত তেওঁৰ মৃতদেহ উদ্ধাৰ হৈছিল। স্থানীয় লোকসকলে বস্তাটোৰ পৰা মানুহৰ ভৰি ওলাই থকা প্ৰত্যক্ষ কৰি আৰক্ষীক খবৰ দিছিল। পৰৱৰ্তী সময়ত পৰিয়ালৰ লোকে মৃতদেহটো চিনাক্ত কৰে।
দীৰ্ঘদিনীয়া সম্পৰ্কক কেন্দ্ৰ কৰি হত্যাৰ সন্দেহ
আৰক্ষীৰ প্ৰাথমিক তদন্ত অনুসৰি, ধৃত প্ৰদীপ টায়ে আৰু জীনা বৈশ্যৰ মাজত প্ৰায় ১০ বছৰ ধৰি সম্পৰ্ক আছিল। দুয়োৰে পৰিয়ালৰ মাজত এই সম্পৰ্কক কেন্দ্ৰ কৰি সঘনাই বিবাদৰ সৃষ্টি হৈছিল বুলি আৰক্ষীয়ে জানিবলৈ দিছে। তদন্তকাৰীৰ সন্দেহ অনুসৰি, এই পাৰিবাৰিক সংঘাতৰ পৰিণতিতে অভিযুক্তই হত্যাৰ পৰিকল্পনা কৰিছিল।
আৰক্ষীৰ তথ্য অনুসৰি, ১ নৱেম্বৰত অভিযুক্তই মহিলাগৰাকীক নিজৰ বাহনত ফুৰাবলৈ নিয়াৰ সময়তে বেলতলাৰ পৰা এখন নতুন দা ক্ৰয় কৰিছিল। নিশা প্ৰায় ৮ বজাত খানাপাৰাৰ গণেশ মন্দিৰৰ সমীপৰ নিৰ্জন স্থানলৈ নি বাহনখনৰ ভিতৰতে দাৰে আক্ৰমণ কৰি হত্যা কৰাৰ অভিযোগ উত্থাপন হৈছে। পিছত মৃতদেহটো ওচৰৰ এটা গাঁতত পেলাই দিয়াৰ সন্দেহ কৰিছে আৰক্ষীয়ে।
বাহন জব্দ, আৰক্ষীৰ তদন্ত অব্যাহত
ঘটনাৰ পিছত সন্দেহৰ পৰা হাত সাৰিবলৈ অভিযুক্তই স্বাভাৱিক আচৰণ কৰি থকা বুলি তদন্তকাৰীয়ে প্ৰকাশ কৰিছে। আনহাতে, মহিলাগৰাকীৰ ম’বাইল ফোনটো নোহোৱা হোৱাৰ ফলত প্ৰাৰম্ভিক তদন্তত কিছু অসুবিধাৰ সৃষ্টি হৈছিল।
বৰ্তমান আৰক্ষীয়ে হত্যাকাণ্ডৰ সৈতে জড়িত সকলো তথ্য-প্ৰমাণ সংগ্ৰহ কৰি তদন্ত অব্যাহত ৰাখিছে। ঘটনাটোৰ আঁৰৰ প্ৰকৃত কাৰণ আৰু আন কোনো লোক জড়িত আছে নেকি, সেই বিষয়েও অনুসন্ধান চলাই থকা হৈছে।
