মুখ্যমন্ত্ৰী ড° হিমন্ত বিশ্ব শৰ্মাৰ ফে’চবুক লাইভত বৃহৎ ঘোষণা

অসম বিধান সভাত Uniform Civil Code (UCC) অনুমোদনক ঐতিহাসিক পদক্ষেপ বুলি উল্লেখ।
অৰুণোদয়, নিযুত মইনা, নিযুত বাবু, জীৱন প্ৰেৰণা আদি আঁচনি আগষ্টৰ পৰা পুনৰ আৰম্ভ হ’ব।
গুৱাহাটী ৰিং ৰোড, কাজিৰঙা এলিভেটেড কৰিড’ৰ আৰু নুমলীগড়-গহপুৰ সুৰংগৰ কাম শীঘ্ৰে আৰম্ভ।
বাইহাটা চাৰিআলি-তেজপুৰ চাৰি লেন পথ, গুৱাহাটী বিমানবন্দৰ-জালুকবাৰী এলিভেটেড কৰিড’ৰ আৰু শিলিগুড়ি-শিলচৰ এক্সপ্ৰেছ হাইৱে’ৰ পৰিকল্পনা আগবাঢ়িছে।
ডিব্ৰুগড়ক দ্বিতীয় ৰাজধানী হিচাপে গঢ়ি তুলিবলৈ ৫০০ কোটি টকাৰ পুঁজি অনুমোদন।
অনাগত সময়ত ২ লাখ যুৱক-যুৱতীক চাকৰিৰ সুযোগ সৃষ্টি কৰাৰ লক্ষ্য।
হাইলাকান্দি, হোজাই, বজালী আৰু গোৱালপাৰাত নতুন মেডিকেল কলেজ স্থাপনৰ প্ৰক্ৰিয়া আৰম্ভ।
জুলাই মাহত প্ৰধানমন্ত্ৰী নৰেন্দ্ৰ মোদীৰ সৈতে এগৰাকী গুৰুত্বপূৰ্ণ আন্তঃৰাষ্ট্ৰীয় ব্যক্তিত্বৰ অসম ভ্ৰমণৰ সম্ভাৱনা।

UCC অনুমোদনৰ পৰা ২ লাখ চাকৰি, নতুন আন্তঃগাঁথনি আৰু জনকল্যাণমূলক আঁচনি পুনৰ আৰম্ভণিৰ আশ্বাস

সমগ্ৰ সমাচাৰ সেৱা
গুৱাহাটী, ১৫ জুন: মুখ্যমন্ত্ৰী ড° হিমন্ত বিশ্ব শৰ্মাই সোমবাৰে ফে’চবুক লাইভৰ জৰিয়তে ৰাজ্যবাসীক সম্বোধন কৰি শেহতীয়া বিধানসভা নিৰ্বাচনত প্ৰদান কৰা অভূতপূৰ্ব সমৰ্থনৰ বাবে আন্তৰিক কৃতজ্ঞতা জ্ঞাপন কৰে। তেওঁ কয় যে চৰকাৰৰ ওপৰত জনসাধাৰণে পুনৰ আস্থা প্ৰকাশ কৰাটো উন্নয়নমূলক যাত্ৰাক অধিক শক্তিশালী কৰি তুলিব।

UCC অনুমোদন সামাজিক ন্যায়ৰ দিশত গুৰুত্বপূৰ্ণ পদক্ষেপ
মুখ্যমন্ত্ৰীয়ে উল্লেখ কৰে যে অসম বিধানসভাই Uniform Civil Code (UCC) অনুমোদন জনোৱাটো চৰকাৰৰ এক গুৰুত্বপূৰ্ণ নিৰ্বাচনী প্ৰতিশ্ৰুতি পূৰণৰ লগতে সামাজিক ন্যায় আৰু সম অধিকাৰ প্ৰতিষ্ঠাৰ ক্ষেত্ৰত এক উল্লেখযোগ্য মাইলৰ খুঁটি।

আগষ্টৰ পৰা পুনৰ আৰম্ভ হ’ব জনকল্যাণমূলক আঁচনি
Vote on Account সন্দৰ্ভত মন্তব্য আগবঢ়াই তেওঁ জানিবলৈ দিয়ে যে অহা ৬ জুলাইৰ বাজেট অধিৱেশন সম্পন্ন হোৱাৰ পাছতে অৰুণোদয়, ৰেহাইমূল্যত অত্যাৱশ্যকীয় সামগ্ৰী বিতৰণ, নিযুত মইনা, নিযুত বাবু আৰু জীৱন প্ৰেৰণা আদি আঁচনিসমূহ আগষ্ট মাহৰ পৰা পুনৰ নিয়মীয়াকৈ চলি থাকিব।

বৃহৎ আন্তঃগাঁথনি প্ৰকল্পৰ কাম শীঘ্ৰে আৰম্ভ
মুখ্যমন্ত্ৰীয়ে কয় যে গুৱাহাটীৰ ৰিং ৰোড, কাজিৰঙাৰ এলিভেটেড কৰিড’ৰ আৰু প্ৰায় ১৮ হাজাৰ কোটি টকা ব্যয়ে নিৰ্মাণ হ’বলগীয়া নুমলীগড়-গহপুৰ সুৰংগৰ কাম অতি সোনকালে আৰম্ভ হ’ব।

ইয়াৰ উপৰিও বাইহাটা চাৰিআলি-তেজপুৰ চাৰি লেন পথ, গুৱাহাটী বিমানবন্দৰ-জালুকবাৰী এলিভেটেড কৰিড’ৰ, শিলিগুড়ি-শিলচৰ এক্সপ্ৰেছ হাইৱে’ আৰু গুৱাহাটীৰ পৰা তিনিচুকীয়ালৈ এক্সপ্ৰেছ হাইৱে’ নিৰ্মাণৰ লক্ষ্যৰ বিষয়েও তেওঁ সদৰী কৰে।

ডিব্ৰুগড়ক দ্বিতীয় ৰাজধানী হিচাপে বিকাশৰ পদক্ষেপ
ডিব্ৰুগড়ক ৰাজ্যৰ দ্বিতীয় ৰাজধানী হিচাপে গঢ়ি তোলাৰ লক্ষ্যৰে ৫০০ কোটি টকাৰ উন্নয়নমূলক পুঁজি অনুমোদন কৰা হৈছে বুলি মুখ্যমন্ত্ৰীয়ে ঘোষণা কৰে। একে সময়তে শিলচৰত নতুন বিমানবন্দৰ স্থাপন আৰু ৰূপসী বিমানবন্দৰক Logistic Hub হিচাপে বিকশিত কৰাৰ পৰিকল্পনাৰ কথাও উল্লেখ কৰে।

২ লাখ চাকৰি আৰু নতুন শিক্ষানুষ্ঠানৰ লক্ষ্য
চৰকাৰী নিযুক্তিৰ ক্ষেত্ৰত নিৰ্বাচনী প্ৰতিশ্ৰুতি অনুসৰি অনাগত সময়ত ২ লাখ যুৱক-যুৱতীক চাকৰিৰ সুযোগ সৃষ্টি কৰাৰ বাবে প্ৰস্তুতি আৰম্ভ কৰা হৈছে বুলি তেওঁ জানিবলৈ দিয়ে।

লগতে প্ৰতিখন জিলাত এখনকৈ বিশ্ববিদ্যালয়, মেডিকেল কলেজ আৰু ইঞ্জিনিয়াৰিং কলেজ স্থাপনৰ লক্ষ্যৰে হাইলাকান্দি, হোজাই, বজালী আৰু গোৱালপাৰাত নতুন মেডিকেল কলেজ স্থাপনৰ প্ৰক্ৰিয়াও আগবাঢ়ি আছে বুলি কয়।

মুখ্যমন্ত্ৰীয়ে পুনৰ দোহাৰে যে অসমৰ পৰিচয়, সংস্কৃতি, ঐতিহ্য আৰু ভূমিৰ সুৰক্ষা চৰকাৰৰ অন্যতম মূল অংগীকাৰ। এইয়া কেৱল নিৰ্বাচনী শ্লোগান নহয়, বৰং এক অব্যাহত কৰ্মযজ্ঞ বুলি উল্লেখ কৰি অসম, অসমবাসী আৰু অসমীয়াৰ স্বাৰ্থত চৰকাৰ সদায় কাম কৰি যাব বুলি আশ্বাস দিয়ে।

জুলাইত অসম ভ্ৰমণ কৰিব পাৰে আন্তঃৰাষ্ট্ৰীয় ব্যক্তিত্ব
অহা জুলাই মাহৰ আৰম্ভণিতে প্ৰধানমন্ত্ৰী নৰেন্দ্ৰ মোদীৰ সৈতে এগৰাকী গুৰুত্বপূৰ্ণ আন্তঃৰাষ্ট্ৰীয় ব্যক্তিত্বই অসম ভ্ৰমণ কৰাৰ সম্ভাৱনা আছে বুলি মুখ্যমন্ত্ৰীয়ে জানিবলৈ দিয়ে। এই উপলক্ষে গুৱাহাটীক অধিক সুন্দৰ আৰু পৰিপাটি কৰি তোলাৰ ক্ষেত্ৰত জনসাধাৰণৰ সহযোগিতা কামনা কৰে।

পেট্ৰ’ল-ডিজেল মূল্যবৃদ্ধি বিশ্ব পৰিস্থিতিৰ ফল
শেহতীয়া পেট্ৰ’ল-ডিজেলৰ মূল্যবৃদ্ধিৰ প্ৰসংগত মুখ্যমন্ত্ৰীয়ে কয় যে মধ্যপ্ৰাচ্যৰ ভূ-ৰাজনৈতিক পৰিস্থিতি আৰু আন্তঃৰাষ্ট্ৰীয় বজাৰত খাৰুৱা তেলৰ মূল্যবৃদ্ধিৰ ফলতেই এই পৰিস্থিতিৰ সৃষ্টি হৈছে। বিশ্ব পৰিস্থিতি স্বাভাৱিক হ’লে সাধাৰণ জনতাই সকাহ লাভ কৰিব বুলি তেওঁ আশা প্ৰকাশ কৰে।

বক্তব্যৰ অন্তত মুখ্যমন্ত্ৰীয়ে পুনৰ এবাৰ অসমৰ ৰাইজৰ আশীৰ্বাদ আৰু সমৰ্থনৰ বাবে ধন্যবাদ জ্ঞাপন কৰি ৰাজ্যৰ সৰ্বাংগীন উন্নয়ন আৰু জনকল্যাণৰ বাবে চৰকাৰৰ প্ৰতিশ্ৰুতি পুনৰ ব্যক্ত কৰে।