গোলাঘাটত ৩০টা টোকাই গেকো উদ্ধাৰ, এজন গ্ৰেপ্তাৰ
- গোলাঘাটৰ গৰমূৰত ৩০টা টোকাই গেকো উদ্ধাৰ।
- বন্যপ্ৰাণী সৰবৰাহৰ অভিযোগত এজন লোক গ্ৰেপ্তাৰ।
- বন বিভাগ আৰু ডিমাপুৰ কাষ্টমছৰ যুটীয়া অভিযান।
- আদালতৰ অনুমোদনৰ পাছত গেকোকেইটাক প্ৰাকৃতিক বাসস্থানত মুকলি।
সমগ্ৰ সমাচাৰ সেৱা
গোলাঘাটত,২০ ছেপ্টেম্বৰ :গোলাঘাটত ন্দেহজনক বন্যপ্ৰাণী সৰবৰাহৰ বিৰুদ্ধে অভিযান চলাই ৩০টা জীৱিত টোকাই গেকো উদ্ধাৰ কৰা হৈছে। ১৭ ছেপ্টেম্বৰত গোলাঘাটৰ গৰমূৰৰ ৩৭ নং ৰাষ্ট্ৰীয় ঘাইপথত এই অভিযান চলোৱা হয়।
গোপন তথ্যৰ ভিত্তিত পূব অসম বন্যপ্ৰাণী সংমণ্ডলৰ অধীনস্থ বোকাখাট ৰেঞ্জৰ বন বিভাগৰ বিষয়া-কৰ্মচাৰীয়ে ডিমাপুৰ কাষ্টমছ (প্ৰিভেণ্টিভ) সংমণ্ডলৰ বিষয়াসকলৰ সহযোগত অভিযান চলাই গেকোকেইটা উদ্ধাৰ কৰে।
এজন লোক গ্ৰেপ্তাৰ
এই ঘটনাৰ সৈতে জড়িত থকাৰ অভিযোগত আমটেঙা, ২ নং বালিগাঁও, বোকাখাটৰ মহন্ত পেগু ওৰফে বাইটি পেগুক গ্ৰেপ্তাৰ কৰা হৈছে।
উদ্ধাৰ কৰা গেকোকেইটা টোকাই গেকো (Gekko gecko) বুলি চিনাক্ত কৰা হৈছে। এই প্ৰজাতিৰ গেকো অবৈধ বন্যপ্ৰাণী বাণিজ্যৰ ক্ষেত্ৰত সৰবৰাহ কৰা হয় বুলি বিভিন্ন ঘটনাত পোহৰলৈ আহিছে।
উৎস আৰু গন্তব্যৰ সন্ধান
কৰ্তৃপক্ষই জানিবলৈ দিয়া অনুসৰি, গেকোকেইটা ক’ৰ পৰা সংগ্ৰহ কৰা হৈছিল, ক’লৈ নিবলৈ চেষ্টা কৰা হৈছিল আৰু এই ঘটনাত আন কোনো লোক জড়িত আছে নেকি, সেই বিষয়ে তদন্ত অব্যাহত আছে।
আইনী প্ৰক্ৰিয়া সম্পূৰ্ণ কৰাৰ লগতে আদালতৰ প্ৰয়োজনীয় অনুমোদন লাভ কৰাৰ পাছত উদ্ধাৰ কৰা ৩০টা টোকাই গেকোক প্ৰাকৃতিক বাসস্থানত সুৰক্ষিতভাৱে মুকলি কৰি দিয়া হয়। ঘটনাটোৰ অধিক তদন্ত অব্যাহত আছে।
About The Author
