বক্সাৰ পৰা পুনৰ পলাল ‘ডুৱাৰ্ছ ৰাণী’
-
বক্সাৰ পৰা দ্বিতীয়বাৰৰ বাবে পলায়ন বাঘিনী ‘ডুৱাৰ্ছ ৰাণী’ৰ।
-
কংক্ৰিটৰ ভেটিৰ তলত সুৰংগ খান্দি পলায়ন।
-
৬০ৰো অধিক বনকৰ্মী আৰু তিনিটা হাতীৰে অনুসন্ধান।
-
পুনৰ অসমত প্ৰৱেশৰ আশংকা বন বিভাগৰ।
সমগ্ৰ সমাচাৰ সেৱা
গুৱাহাটী, ১০ নৱেম্বৰ: পশ্চিমবংগৰ বক্সা ব্যাঘ্ৰ সংৰক্ষিত বনাঞ্চলৰ পৰা পুনৰ পলায়ন কৰিছে ‘ডুৱাৰ্ছ ৰাণী’ (Dooars Rani) নামৰ তিনিবছৰীয়া ৰয়েল বেংগল বাঘিনীজনীয়ে। অসমলৈ উভতি অহাৰ চেষ্টা চলোৱাৰ সন্দেহ প্ৰকাশ কৰিছে বন বিভাগৰ বিষয়াসকলে। মাত্ৰ পাঁচ দিন পূৰ্বে অসম আৰু পশ্চিমবংগৰ বন বিভাগৰ যৌথ অভিযানত বাঘিনীজনীক উদ্ধাৰ কৰি বক্সালৈ ঘূৰাই নিয়া হৈছিল।
৮ নৱেম্বৰত বক্সাৰ ২.২ হেক্টৰ আয়তনৰ বিশেষ আৱদ্ধ স্থানৰ পৰা বাঘিনীজনী পলায়ন কৰে। এইবাৰ আৱদ্ধ স্থানৰ চাৰিওফালে থকা কংক্ৰিটৰ ভেটিৰ তলত সুৰংগ খান্দি বাহিৰলৈ ওলাই যাবলৈ সক্ষম হয়।
কংক্ৰিটৰ ভেটিৰ তলত সুৰংগ খান্দি পলায়ন
বন বিভাগৰ তথ্য অনুসৰি, আৱদ্ধ স্থানটোৰ সীমাৰ বেৰখনৰ ভেটি প্ৰায় দুই ফুট ডাঠ আৰু চাৰি ফুট গভীৰ আছিল। কিন্তু বাঘিনীজনীয়ে সেই ভেটিৰ তলত মাটি খান্দি সুৰংগ সৃষ্টি কৰি পলায়ন কৰে।
বাঘিনীজনীৰ ডিঙিত থকা ৰেডিঅ’ কলাৰৰ সহায়ত বন বিভাগে তেওঁৰ অৱস্থান অনুসৰণ কৰি আছে। বৰ্তমান ৬০জনতকৈ অধিক বনকৰ্মী আৰু ভাৰত, সাৰথি তথা ভিত্তলা নামৰ তিনিটা প্ৰশিক্ষিত হাতীৰ সহায়ত অনুসন্ধান অভিযান চলোৱা হৈছে।
পুনৰ অসমত প্ৰৱেশৰ আশংকা
বন বিভাগৰ সূত্ৰ অনুসৰি, বাঘিনীজনী বক্সাৰ ২৭ মাইল বন গাঁৱৰ ওচৰত অৱস্থান কৰিছিল আৰু বালা নদী পাৰ হৈ অসম অভিমুখে আগবাঢ়িছে বুলি জানিব পৰা গৈছে। পূৰ্বৰ দৰেই অসমলৈ উভতি আহিবলৈ চেষ্টা চলোৱাৰ সন্দেহ প্ৰকাশ কৰা হৈছে।
উল্লেখ্য যে, বিহাৰৰ বাল্মীকি ব্যাঘ্ৰ সংৰক্ষিত বনাঞ্চলৰ পৰা পশ্চিমবংগৰ বক্সালৈ অনা বাঘিনীজনীয়ে ২৪ অক্টোবৰত অসমত প্ৰৱেশ কৰি ৰাইমনা ৰাষ্ট্ৰীয় উদ্যানৰ দিশে আগবাঢ়িছিল। প্ৰায় ১০০ কিলোমিটাৰতকৈ অধিক দূৰত্ব অতিক্ৰম কৰাৰ পিছত ৩ নৱেম্বৰত কোকৰাঝাৰৰ দতমাৰ গিলাগুৰিত অসম আৰু পশ্চিমবংগৰ বন বিভাগৰ যৌথ অভিযানত তেওঁক ট্ৰেংকুলাইজ কৰি পুনৰ বক্সালৈ নিয়া হৈছিল।
বাঘিনীজনীৰ বাৰে বাৰে পলায়নৰ ঘটনাই বাঘ স্থানান্তৰ আৰু নতুন পৰিৱেশত অভ্যস্ত কৰোৱাৰ ব্যৱস্থাক লৈ নতুনকৈ প্ৰশ্নৰ সৃষ্টি কৰিছে।
