November 22, 2026

Global Assam News

Global and Local Assam News Website

তেলেংগানাত পুৰোহিত হত্যা, অসমৰ দুই যুৱক গ্ৰেপ্তাৰ
  • তেলেংগানাত পুৰোহিত তথা জ্যোতিষী সুধাকৰ স্বামীক হত্যা।

  • অসমৰ পৱন আৰু হৰ্ষিত গ্ৰেপ্তাৰ।

  • কামাখ্যা মন্দিৰত দুবছৰ পূৰ্বে হৈছিল চিনাকি।

  • ১.৭২ কোটি টকাৰ সোণ, ৰূপ, নগদ ধন আৰু বাহন উদ্ধাৰ।

সমগ্ৰ সমাচাৰ সেৱা

গুৱাহাটী, ৩ নৱেম্বৰ: অসমৰ কামাখ্যা মন্দিৰত হোৱা চিনাকিৰ সূত্ৰ ধৰি তেলেংগানাত এজন পুৰোহিত তথা জ্যোতিষীক হত্যা কৰাৰ অভিযোগত অসমৰ দুজন যুৱকক গ্ৰেপ্তাৰ কৰিছে তেলেংগানা আৰক্ষীয়ে। অভিযুক্ত দুজনক পৱন আৰু হৰ্ষিত ওৰফে হৰ্ষু বুলি চিনাক্ত কৰা হৈছে। আৰক্ষীয়ে তেওঁলোকৰ পৰা প্ৰায় ১.৭২ কোটি টকাৰ সোণ, ৰূপ, নগদ ধন আৰু এখন বাহন উদ্ধাৰ কৰিছে।

নিহত পুৰোহিতজনৰ নাম যোগিনী ৰাল্লাবাণ্ডা সুধাকৰ স্বামী (৪৫)। তেওঁ তেলেংগানাৰ যাদাদ্ৰী ভুৱনগিৰি জিলাৰ চৌটুপ্পলৰ মাৰ্কণ্ডেয় নগৰৰ বাসিন্দা আছিল। তেওঁ বিভিন্ন ধৰ্মীয় অনুষ্ঠানত পূজা-অৰ্চনা কৰাৰ লগতে জ্যোতিষ চৰ্চাও কৰিছিল।

কামাখ্যা মন্দিৰত চিনাকি, পিছত শিষ্যৰ ৰূপত ঘনিষ্ঠতা

আৰক্ষীৰ তদন্ত অনুসৰি, প্ৰায় দুবছৰ পূৰ্বে কামাখ্যা মন্দিৰ দৰ্শন কৰিবলৈ অহাৰ সময়ত সুধাকৰ স্বামীৰ সৈতে পৱনৰ চিনাকি হৈছিল। পৰৱৰ্তী সময়ত পৱনে কেইবাবাৰো তেলেংগানালৈ গৈ তেওঁৰ সৈতে সম্পৰ্ক গঢ়ি তোলে আৰু হৰ্ষিতকো চিনাকি কৰাই দিয়ে। দুয়োজনে ক্ৰমান্বয়ে পুৰোহিতজনৰ বিশ্বাস অৰ্জন কৰি তেওঁৰ শিষ্য হৈ পৰিছিল।

আৰক্ষীৰ অভিযোগ অনুসৰি, ৩১ অক্টোবৰৰ নিশা দুয়োজনে সুধাকৰ স্বামীৰ বাসগৃহলৈ গৈ তেওঁক হত্যা কৰি সোণ, ৰূপ, নগদ ধন আৰু বাহন লৈ পলায়ন কৰে। পিছদিনা নিশা প্ৰায় ১.৩০ বজাত পুৰোহিতজনৰ ভতিজাক গুৰৰাম সুৰেশে তেওঁৰ ম’বাইলৰ পৰা হিন্দী ভাষাত অস্বাভাৱিক হোৱাটছএপ বাৰ্তা লাভ কৰে। সন্দেহ হোৱাত তেওঁ বাসগৃহত উপস্থিত হৈ দুৱাৰ খোলা অৱস্থাত আৰু বাহনখন নোহোৱা দেখি আৰক্ষীক খবৰ দিয়ে। পিছত আৰক্ষীয়ে ঘৰৰ ভিতৰত পুৰোহিতজনৰ মৃতদেহ উদ্ধাৰ কৰে।

জিপিএছৰ সহায়ত গ্ৰেপ্তাৰ, ১.৭২ কোটি টকাৰ সম্পত্তি উদ্ধাৰ

আৰক্ষীয়ে চুৰি হোৱা বাহনখনৰ জিপিএছ তথ্য আৰু ফাষ্টটেগৰ টোল প্লাজাৰ সংকেত অনুসৰণ কৰি অভিযুক্ত দুজনৰ সন্ধান লাভ কৰে। মধ্যপ্ৰদেশৰ দিশে পলায়নৰ চেষ্টা কৰাৰ সময়ত নি‌ৰ্মল জিলাৰ সোয়ান টোল প্লাজাত বাহন পৰীক্ষাৰ সময়ত দুয়োকে আটক কৰা হয়।

আৰক্ষীয়ে অভিযুক্ত দুজনৰ পৰা প্ৰায় ১,৩১৯ গ্ৰাম সোণ, ৩.৬ কিলোগ্ৰাম ৰূপ, ৯ লাখ টকা নগদ ধন আৰু নিহত পুৰোহিতজনৰ বাহনখন উদ্ধাৰ কৰে। উদ্ধাৰ হোৱা সম্পত্তিৰ মুঠ মূল্য প্ৰায় ১.৭২ কোটি টকা বুলি জানিব পৰা গৈছে।

বৰ্তমান অভিযুক্ত দুজনক যাদাদ্ৰী ভুৱনগিৰি জিলা আৰক্ষীৰ জিম্মাত ৰখা হৈছে আৰু ঘটনাৰ অধিক তদন্ত অব্যাহত আছে।

About The Author

Leave a Reply

Your email address will not be published. Required fields are marked *