মাতৃক পঢ়ুওৱা ছাত্ৰৰ অনন্য উদ্যোগেৰে ৰাষ্ট্ৰীয় শিক্ষক বঁটা অসমৰ শিক্ষকৰ
সমগ্ৰ সমাচাৰ সেৱা
৬ ছেপ্টেম্বৰ,যোৰহাট:যোৰহাট জিলাৰ কালবাৰীৰ আদৰ্শ জনজাতীয় উচ্চতৰ মাধ্যমিক বিদ্যালয়ৰ ভূগোলৰ শিক্ষক ৰাজেশ বৰদলৈয়ে শিক্ষাদানৰ এক অভিনৱ পদ্ধতি গ্ৰহণ কৰিছে। দশম শ্ৰেণীৰ ছাত্ৰ-ছাত্ৰীসকলক তেওঁ কেৱল পাঠ্যপুথিৰ জ্ঞানতে সীমাবদ্ধ নাৰাখি ঘৰত নিজৰ মাতৃক পঢ়ুৱাবলৈ উৎসাহিত কৰে।
এই কাৰ্যসূচীৰ জৰিয়তে ছাত্ৰ-ছাত্ৰীসকলে মাতৃসকলক পঢ়া-লিখা, UPI-ৰ জৰিয়তে ধন পৰিশোধ, অনলাইন বেংকিং আৰু বিভিন্ন ডিজিটেল সেৱা ব্যৱহাৰ কৰিবলৈ শিকাইছে। বিদ্যালয়খনৰ ছাত্ৰ-ছাত্ৰীৰ অধিকাংশই প্ৰথম প্ৰজন্মৰ শিক্ষাৰ্থী আৰু প্ৰায় ৯০ শতাংশই কৃষিনিৰ্ভৰ মিছিং জনজাতীয় সম্প্ৰদায়ৰ।
‘Each One Teach One’ৰ সফলতা
দুবছৰ পূৰ্বে ৰাজেশ বৰদলৈয়ে ‘Each One Teach One’ কাৰ্যসূচী আৰম্ভ কৰিছিল। নৱপ্ৰজন্মে ডিজিটেল প্ৰযুক্তিৰ সৈতে সহজে খাপ খুৱাব পাৰিলেও বহু মাতৃয়ে মৌলিক প্ৰযুক্তি ব্যৱহাৰতো অসুবিধাৰ সন্মুখীন হোৱা লক্ষ্য কৰি তেওঁ এই পদক্ষেপ গ্ৰহণ কৰে।
কালবাৰীৰ পৰা আৰম্ভ হোৱা এই উদ্যোগ বৰ্তমান বানফালা, ভেকেলিচাপৰি, ধনখুলি, ললিতী চাপৰি গাঁও আৰু সৰিঘৰিয়ালৈ সম্প্ৰসাৰিত হৈছে। বিদ্যালয়ত চৰকাৰে প্ৰদান কৰা স্মাৰ্ট ব’ৰ্ডৰ জৰিয়তে অভিভাৱক-শিক্ষক সভাতো ডিজিটেল সঁজুলি ব্যৱহাৰৰ প্ৰশিক্ষণ দিয়া হয়।
শিশুবিবাহৰ বিৰুদ্ধেও সজাগতা
ৰাজেশ বৰদলৈৰ সামাজিক কাম কেৱল ডিজিটেল সাক্ষৰতাতে সীমাবদ্ধ নহয়। তেওঁ কেইবাবছৰ ধৰি শিশুবিবাহৰ বিৰুদ্ধেও সজাগতা সৃষ্টি কৰি আহিছে। বিশেষকৈ ভেকেলিচাপৰিত নাবালিকা ছাত্ৰীৰ বিদ্যালয় ত্যাগ আৰু অকাল বিবাহৰ ঘটনা ৰোধ কৰাৰ বাবে তেওঁ কাম কৰি আহিছে।
৫০ বছৰীয়া শিক্ষকগৰাকীক এই অনন্য সামাজিক-শৈক্ষিক উদ্যোগৰ স্বীকৃতি হিচাপে ৰাষ্ট্ৰীয় শিক্ষক বঁটা প্ৰদান কৰা হয়। তেওঁ ৪৮গৰাকী বঁটাপ্ৰাপকৰ ভিতৰত অন্যতম।
বঁটা লাভৰ পিছত বৰদলৈয়ে কয় যে এই সন্মান কেৱল তেওঁৰ ব্যক্তিগত সাফল্য নহয়; ই বিদ্যালয়, সহকৰ্মী, ছাত্ৰ-ছাত্ৰী, অভিভাৱক আৰু সমগ্ৰ সমাজৰ সামূহিক প্ৰচেষ্টাৰ স্বীকৃতি।
About The Author
