November 22, 2026

Global Assam News

Global and Local Assam News Website

১২ নৱেম্বৰত অসমজুৰি পেট্ৰ’ল পাম্প বন্ধ
  • ১২ নৱেম্বৰত অসমজুৰি ২৪ ঘণ্টীয়া পেট্ৰ’ল পাম্প বন্ধ।

  • NEIPDA-ৰ ‘ন’ পাৰ্চেজ, ন’ চেল’ প্ৰতিবাদ।

  • তেল কোম্পানীৰ বিৰুদ্ধে ডিলাৰসকলৰ হাৰাশাস্তিৰ অভিযোগ।

  • ২৩ নৱেম্বৰৰ পৰা অনিৰ্দিষ্টকালীন বন্ধৰ হুংকাৰ।

সমগ্ৰ সমাচাৰ সেৱা

গুৱাহাটী, ১১ নৱেম্বৰ: তেল বিপণন কোম্পানীসমূহৰ বিৰুদ্ধে প্ৰতিবাদ সাব্যস্ত কৰিবলৈ ১২ নৱেম্বৰত অসমজুৰি ২৪ ঘণ্টীয়া ‘ন’ পাৰ্চেজ, ন’ চেল’ (No Purchase, No Sale) কাৰ্যসূচী ঘোষণা কৰিছে উত্তৰ-পূব ভাৰত পেট্ৰ’লিয়াম ডিলাৰ্ছ এছ’চিয়েচনে (NEIPDA)। এই কাৰ্যসূচীৰ ফলত গুৱাহাটীকে ধৰি ৰাজ্যৰ সকলো পেট্ৰ’ল পাম্প বন্ধ থাকিব।

পুৱা ৬ বজাৰ পৰা বন্ধ থাকিব পেট্ৰ’ল পাম্প

সংগঠনটোৰ ঘোষণা অনুসৰি, ১২ নৱেম্বৰৰ পুৱা ৬ বজাৰ পৰা ১৩ নৱেম্বৰৰ পুৱা ৬ বজালৈ এই প্ৰতিবাদী কাৰ্যসূচী চলিব। এই সময়ছোৱাত পেট্ৰ’ল আৰু ডিজেলৰ ক্ৰয়-বিক্ৰয় সম্পূৰ্ণৰূপে বন্ধ থাকিব। ফলত ব্যক্তিগত বাহন, ৰাজহুৱা পৰিবহণ আৰু বাণিজ্যিক বাহনৰ চলাচলত প্ৰভাৱ পৰাৰ আশংকা কৰা হৈছে।

তেল কোম্পানীৰ বিৰুদ্ধে একাধিক অভিযোগ

NEIPDA-ই ইণ্ডিয়ান অইল কৰ্প’ৰেশ্যনকে ধৰি বিভিন্ন তেল বিপণন কোম্পানীৰ বিৰুদ্ধে স্বেচ্ছাচাৰী সিদ্ধান্ত আৰু ডিলাৰসকলক হাৰাশাস্তি কৰাৰ অভিযোগ উত্থাপন কৰিছে। কোনো ডিলাৰক নিজৰ বক্তব্য প্ৰকাশৰ সুযোগ নিদিয়াকৈ ইন্ধন যোগান বন্ধ কৰাৰ ভাবুকি, পৰিবহণৰ চুক্তি বাতিল, বিভিন্ন ধৰণৰ ধন কৰ্তন আৰু অনুমোদিত ব্যয়ৰ ধন পৰিশোধত পলম কৰাৰ অভিযোগ কৰিছে সংগঠনটোৱে।

ইয়াৰ উপৰি লুব্ৰিকেণ্টসহ অন্যান্য সামগ্ৰী ক্ৰয়-বিক্ৰয়ৰ বাবে ডিলাৰসকলক হেঁচা প্ৰয়োগ কৰাৰ অভিযোগো উত্থাপন হৈছে। সংগঠনটোৱে এই সমস্যাসমূহ সমাধানৰ বাবে সংশ্লিষ্ট কৰ্তৃপক্ষৰ হস্তক্ষেপ দাবী কৰিছে।

ইফালে, NEIPDA-ৰ বৃহত্তৰ গুৱাহাটী গোটে দাবীসমূহ পূৰণ নকৰিলে ২৩ নৱেম্বৰৰ পৰা অনিৰ্দিষ্টকালীন বন্ধৰো হুংকাৰ দিছে।

About The Author

Leave a Reply

Your email address will not be published. Required fields are marked *