অসম-মেঘালয় পৰ্যটক টেক্সি সমস্যাৰ সমাধানত যৌথ গ্ৰীভেন্স কমিটি

সমগ্ৰ সমাচাৰ সেৱা 

 শ্বিলং, ৯ ছেপ্টেম্বৰ : অসম আৰু মেঘালয় চৰকাৰে পৰ্যটক টেক্সি অপারেটৰসকলৰ সমস্যাৰ সমাধানৰ বাবে এক যৌথ গ্ৰীভেন্স ৰেড্ৰেছেল মেকানিজম গঠন কৰিবলৈ সিদ্ধান্ত গ্ৰহণ কৰিছে। এই সিদ্ধান্ত শ্বিলঙৰ ষ্টেট কনভেনচন চেণ্টাৰত অনুষ্ঠিত উচ্চ-স্তৰীয় বৈঠকত গ্ৰহণ কৰা হয়, য’ত মেঘালয়ৰ উপ-মুখ্যমন্ত্ৰী স্নিয়াভালাং ধৰ আৰু অসমৰ সীমান্ত সংৰক্ষণ তথা উন্নয়ন মন্ত্ৰী অতুল বৰা মুখ্যভাৱে উপস্থিত থাকে।

বৈঠকত দুয়োখন ৰাজ্যৰ পৰ্যটক টেক্সি আৰু পেট্ৰোলিয়াম সংগঠন, পৰিবহন বিভাগ আৰু আৰক্ষী বিভাগৰ বিষয়াসকল অংশগ্ৰহণ কৰে। মেঘালয়ৰ সংগঠনসমূহে গুৱাহাটী বিমানবন্দৰত পাৰ্কিং, বিশ্রামাগাৰ, আৰক্ষী পৰীক্ষাৰ সময়ত হোৱা অসুবিধা আদি বিষয় উত্থাপন কৰে।

দুয়োখন ৰাজ্যৰ আৰক্ষী বাহিনী একেলগে কাম কৰিবলৈ একমত হৈছে, যাতে পৰ্যটক টেক্সি অপাৰেটৰে কোনো সমস্যাৰ সন্মুখীন নহয়। এই সমস্যাসমূহ স্থলভূমিত সমাধান কৰিবলৈ দুয়োখন ৰাজ্যৰ পৰিবহন আয়ুক্তৰ নেতৃত্বত উচ্চ-স্তৰীয় কমিটিও গঠন কৰা হৈছে।

অসমৰ সাতখন আৰু মেঘালয়ৰ পাঁচখন টেক্সি সংগঠন, লগতে দুই পেট্ৰোলিয়াম সংগঠনে বৈঠকত অংশ গ্ৰহণ কৰে। অতুল বৰাই বৈঠকৰ ফলাফলত সন্তুষ্টি প্ৰকাশ কৰি কয়, আলোচনা উচ্চ-স্তৰত অনুষ্ঠিত হৈছিল আৰু আগৰ বৈঠকৰ সিদ্ধান্তসমূহক বাস্তৱায়িত কৰিব পাৰিব।

মেঘালয় উপ-মুখ্যমন্ত্ৰীয়ে কয়, “তাল মিলি কাম কৰিম, দুয়ো ৰাজ্যৰ পৰ্যটক টেক্সি সংগঠন একে মনত একত্ৰিত হৈছে।”

এই যৌথ পদক্ষেপত আশা কৰা হৈছে যে, আন্তঃৰাজ্যিক পৰ্যটক যাত্ৰাত হোৱা সমস্যাবোৰ কমিব আৰু অসম-মেঘালয়ৰ সম্পর্ক অধিক সুদৃঢ় হ’ব।