November 21, 2026

Global Assam News

Global and Local Assam News Website

বিবাহ পিছুৱাবলৈ AMCHৰ পৰামৰ্শ, চিকিৎসক সংগঠনৰ প্ৰতিবাদ

বিবাহ পিছুৱাবলৈ AMCHৰ পৰামৰ্শ, চিকিৎসক সংগঠনৰ প্ৰতিবাদ
  • PG চিকিৎসকসকলক বিবাহ পিছুৱাবলৈ পৰামৰ্শ।

  • ১৮ নৱেম্বৰত বিভাগীয় মুৰব্বীৰ নিৰ্দেশনা জাৰি।

  • FAIMAৰ নিৰ্দেশনা প্ৰত্যাহাৰৰ দাবী।

  • চিকিৎসকৰ ব্যক্তিগত অধিকাৰক লৈ বিতৰ্ক।

সমগ্ৰ সমাচাৰ সেৱা

ডিব্ৰুগড়, ১৮ নৱেম্বৰ: অসম চিকিৎসা মহাবিদ্যালয় আৰু চিকিৎসালয়ৰ (AMCH) স্নাতকোত্তৰ চিকিৎসকসকলক ৰেছিডেন্সি সম্পূৰ্ণ নোহোৱালৈকে বিবাহৰ দৰে ব্যক্তিগত সিদ্ধান্ত পিছুৱাই দিবলৈ দিয়া পৰামৰ্শক লৈ তীব্ৰ বিতৰ্কৰ সৃষ্টি হৈছে। চিকিৎসা মহাবিদ্যালয়খনৰ সাধাৰণ চিকিৎসা বিভাগৰ এই নিৰ্দেশনাৰ বিৰুদ্ধে সৰৱ হৈ পৰিছে চিকিৎসক সংগঠন।

১৮ নৱেম্বৰত বিভাগটোৰ মুৰব্বী অধ্যাপক প্ৰশান্ত দিহিঙীয়াই জাৰি কৰা কাৰ্যালয় নিৰ্দেশনাত স্নাতকোত্তৰ প্ৰশিক্ষাৰ্থীসকলক ৰেছিডেন্সিৰ সময়ছোৱাত বিবাহৰ দৰে ব্যক্তিগত জীৱনৰ গুৰুত্বপূৰ্ণ সিদ্ধান্ত পিছুৱাই দিবলৈ পৰামৰ্শ দিয়া হয়। নিৰ্দেশনাত চিকিৎসকসকলৰ ক্লিনিকেল দায়িত্ব, ৰোগীৰ চিকিৎসা, শৈক্ষিক কাম-কাজ আৰু গৱেষণাক অগ্ৰাধিকাৰ দিবলৈ কোৱা হয়।

FAIMAৰ তীব্ৰ প্ৰতিবাদ

এই পৰামৰ্শৰ বিৰুদ্ধে ফেডাৰেচন অৱ অল ইণ্ডিয়া মেডিকেল এছ’চিয়েচন (FAIMA)ই তীব্ৰ আপত্তি প্ৰকাশ কৰিছে। সংগঠনটোৱে নিৰ্দেশনাখনক অযুক্তিকৰ আখ্যা দি তাৎক্ষণিকভাৱে প্ৰত্যাহাৰৰ দাবী জনাইছে।

সংগঠনটোৱে সামাজিক মাধ্যমত প্ৰতিক্ৰিয়া প্ৰকাশ কৰি কয় যে চিকিৎসকসকলৰ কৰ্মঘণ্টা নিয়ন্ত্ৰণ কৰাত গুৰুত্ব দিব লাগে, তেওঁলোকৰ ব্যক্তিগত জীৱনত হস্তক্ষেপ কৰাত নহয়। ৰেছিডেন্সি হৈছে স্নাতকোত্তৰ পাঠ্যক্ৰম, ব্ৰহ্মচৰ্যৰ প্ৰতিজ্ঞা নহয় বুলিও সংগঠনটোৱে মন্তব্য কৰে।

ব্যক্তিগত অধিকাৰক লৈ বিতৰ্ক

এই নিৰ্দেশনাই চিকিৎসকসকলৰ পেছাগত দায়িত্ব আৰু ব্যক্তিগত জীৱনৰ মাজত ভাৰসাম্য ৰক্ষাৰ বিষয়টোক পুনৰ চৰ্চালৈ আনিছে। চিকিৎসকসকলৰ মতে, চিকিৎসা প্ৰশিক্ষণৰ সময়ত কৰ্তব্য পালন গুৰুত্বপূৰ্ণ যদিও বিবাহৰ দৰে ব্যক্তিগত সিদ্ধান্তৰ ওপৰত প্ৰতিষ্ঠানৰ হস্তক্ষেপক লৈ প্ৰশ্ন উত্থাপন হৈছে।

ঘটনাটোক কেন্দ্ৰ কৰি চিকিৎসা মহলত ব্যাপক প্ৰতিক্ৰিয়াৰ সৃষ্টি হৈছে।

About The Author

Leave a Reply

Your email address will not be published. Required fields are marked *