ৰঙাজান দুৰ্ঘটনাৰ তদন্ত, নিলম্বিত ৩ বিষয়া
-
ৰঙাজান দুৰ্ঘটনাত ২৬গৰাকীৰ মৃত্যু, ২০গৰাকী আহত।
-
কে চি ছামৰিয়াৰ নেতৃত্বত উচ্চস্তৰীয় তদন্ত।
-
তিনিজন পৰিবহণ বিষয়াক নিলম্বন।
-
পথ সুৰক্ষাৰ বাবে ১২ দফীয়া কাৰ্যপন্থা ঘোষণা।
সমগ্ৰ সমাচাৰ সেৱা
গুৱাহাটী, ১৭ নৱেম্বৰ:গোলাঘাট জিলাৰ কাজিৰঙাৰ সমীপৰ ৰঙাজানত সংঘটিত ভয়ংকৰ পথ দুৰ্ঘটনাৰ পিছতে অসম চৰকাৰে ঘটনাটোৰ উচ্চস্তৰীয় তদন্তৰ নিৰ্দেশ দিছে। ১৩ নৱেম্বৰত সংঘটিত এই শোকাৱহ দুৰ্ঘটনাত ২৬গৰাকী লোকৰ মৃত্যু হোৱাৰ লগতে ২০গৰাকী লোক আহত হৈছিল।
মুখ্যমন্ত্ৰী ড০ হিমন্ত বিশ্ব শৰ্মাৰ নিৰ্দেশ অনুসৰি অতিৰিক্ত মুখ্য সচিব তথা জ্যেষ্ঠ আই এ এছ বিষয়া কে চি ছামৰিয়াক তদন্তৰ দায়িত্ব অৰ্পণ কৰা হৈছে। তেওঁক দুসপ্তাহৰ ভিতৰত তদন্তৰ প্ৰতিবেদন দাখিল কৰিবলৈ নিৰ্দেশ দিয়া হৈছে। দুৰ্ঘটনাটোৰ আঁৰৰ কাৰণ, প্ৰশাসনিক গাফিলতি আৰু পৰিবহণ বিভাগৰ দায়িত্ব পালনত কোনো ত্ৰুটি আছিল নেকি, সেই সকলো দিশ তদন্তত পৰীক্ষা কৰা হ’ব।
তিনিজন পৰিবহণ বিষয়া নিলম্বিত
দুৰ্ঘটনাটোৰ পিছতে প্ৰশাসনিক তদাৰকী আৰু নিয়ম বলৱৎ কৰাৰ ক্ষেত্ৰত গাফিলতিৰ অভিযোগত চৰকাৰে তিনিজন পৰিবহণ বিষয়াক নিলম্বন কৰিছে। নিলম্বিত বিষয়াসকল হৈছে গোলাঘাটৰ জিলা পৰিবহণ বিষয়া ৰাজীৱ পেগু আৰু সহকাৰী এনফৰ্চমেণ্ট চেকাৰ ৰবীন গগৈ তথা খীৰোদ নেওগ।
মুখ্যমন্ত্ৰীৰ কাৰ্যালয়ে প্ৰকাশ কৰা অনুসৰি, প্ৰশাসনিক তদাৰকী আৰু আইন বলৱৎ কৰাৰ ক্ষেত্ৰত কাৰ্যকৰী ব্যৱস্থাৰ অভাৱৰ বাবেই এই পদক্ষেপ গ্ৰহণ কৰা হৈছে।
পথ সুৰক্ষাৰ বাবে ১২ দফীয়া কাৰ্যপন্থা
এই শোকাৱহ দুৰ্ঘটনাৰ পিছতে ৰাজ্য চৰকাৰে পথ দুৰ্ঘটনা ৰোধৰ বাবে ১২ দফীয়া পথ সুৰক্ষা কাৰ্যপন্থা ঘোষণা কৰিছে। ইয়াৰ অধীনত বাণিজ্যিক বাহনত গতি নিয়ন্ত্ৰক যন্ত্ৰ সংস্থাপন, যান-বাহনৰ নিয়ম উলংঘা কৰা চালকৰ বিৰুদ্ধে কঠোৰ ব্যৱস্থা, দুৰ্ঘটনাপ্ৰৱণ অঞ্চল চিনাক্তকৰণ আৰু ৰাষ্ট্ৰীয় ঘাইপথৰ কাষৰ চিকিৎসালয়সমূহত জৰুৰীকালীন চিকিৎসা সেৱা শক্তিশালী কৰাৰ ব্যৱস্থা কৰা হ’ব।
উল্লেখ্য যে ১৩ নৱেম্বৰত এখন যাত্ৰীবাহী মিনিবাছ আৰু এখন কণ্টেইনাৰ ট্ৰাকৰ মাজত হোৱা মুখামুখি সংঘৰ্ষত ২৬গৰাকী লোকৰ মৃত্যু হৈছিল আৰু ২০গৰাকী আহত হৈছিল। আহতসকলৰ একাংশই বৰ্তমানো ডিব্ৰুগড় আৰু যোৰহাটৰ চিকিৎসালয়ত চিকিৎসা গ্ৰহণ কৰি আছে। এই তদন্তৰ জৰিয়তে দুৰ্ঘটনাটোৰ প্ৰকৃত কাৰণ আৰু দায়িত্বত থকা বিষয়াসকলৰ ভূমিকা স্পষ্ট হোৱাৰ আশা কৰা হৈছে।
