১৭ মন্ত্ৰী, ১৭ দায়িত্ব: অসম মন্ত্ৰীসভাৰ সম্পূৰ্ণ বিভাগীয় বণ্টন
সমগ্ৰ সমাচাৰ সেৱা
গুৱাহাটী, ৬ জুনঃ মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বত অসম চৰকাৰৰ নতুন মন্ত্ৰীসভাত ১৭ জন মন্ত্ৰীৰ মাজত বিভিন্ন বিভাগৰ দায়িত্ব বণ্টন সম্পূৰ্ণ কৰা হৈছে। ২০২৬ চনৰ ১২ মে’ আৰু ৫ জুনত অনুষ্ঠিত শপত গ্ৰহণ অনুষ্ঠানৰ পাছত এই নতুন দপ্তৰ বণ্টন কাৰ্যকৰী হৈছে।
মুখ্যমন্ত্ৰী ড° হিমন্ত বিশ্ব শৰ্মাই গৃহ, কৰ্মচাৰী, লোকনিৰ্মাণ, চিকিৎসা শিক্ষা আৰু গৱেষণা বিভাগৰ লগতে অন্যান্য নিদিয়া বিভাগসমূহ নিজৰ অধীনত ৰাখিছে।
পীযুষ হাজৰিকাক জলসম্পদ আৰু তথ্য-জনসংযোগ বিভাগৰ দায়িত্ব দিয়া হৈছে। জয়ন্ত মল্ল বৰুৱাই পৰিবেশ আৰু বন বিভাগৰ লগতে নগৰ উন্নয়ন বিভাগৰ দায়িত্ব লাভ কৰিছে।
ড° ৰণোজ পেগুক শিক্ষা আৰু দক্ষতা বিকাশ বিভাগৰ দায়িত্ব দিয়া হৈছে। কেশৱ মহন্তই ৰাজহ আৰু দুৰ্যোগ ব্যৱস্থাপনা বিভাগৰ লগতে বিজ্ঞান আৰু প্ৰযুক্তি বিভাগৰ দায়িত্ব পালন কৰিব।
বিমল বৰাক উদ্যোগ, বাণিজ্য আৰু ৰাজহুৱা উদ্যোগ বিভাগৰ লগতে সাংস্কৃতিক বিভাগৰ দায়িত্ব প্ৰদান কৰা হৈছে। কৌশিক ৰয়ে মীন আৰু খাদ্য-অসামৰিক যোগান বিভাগৰ দায়িত্ব লাভ কৰিছে।
নীলিমা দেৱীক সমাজ কল্যাণ, শিশু-মহিলা কল্যাণ, খিলঞ্জীয়া আৰু জনজাতীয় বিশ্বাস-সংস্কৃতি বিভাগৰ দায়িত্ব দিয়া হৈছে। বিশ্বজিত দৈমাৰীয়ে জনস্বাস্থ্য কাৰিকৰী আৰু ভৈয়াম জনজাতি উন্নয়ন বিভাগৰ দায়িত্ব পালন কৰিব।
অশ্বিনী ৰয় চৰকাৰক শক্তি আৰু সংখ্যালঘু কল্যাণ বিভাগ দিয়া হৈছে। অশোক সিংহলে স্বাস্থ্য আৰু পৰিয়াল কল্যাণ বিভাগৰ লগতে জলসিঞ্চন বিভাগৰ দায়িত্ব লাভ কৰিছে।
সুশান্ত বৰগোহাঁইক পুঁথিভঁৰাল বিভাগৰ লগতে বিজ্ঞান আৰু প্ৰযুক্তি বিভাগৰ দায়িত্ব দিয়া হৈছে। কৃষ্ণেন্দু পালে পশুপালন আৰু সমবায় বিভাগৰ দায়িত্ব পালন কৰিব।
ৰামেশ্বৰ তেলীক ৰূপান্তৰ আৰু উন্নয়ন, শ্ৰম কল্যাণ, চাহ জনজাতি আৰু আদিবাসী কল্যাণ বিভাগৰ দায়িত্ব দিয়া হৈছে। অজন্তা নেওগে মহিলা আৰু শিশু উন্নয়ন বিভাগৰ লগতে পৰ্যটন বিভাগৰ দায়িত্ব লাভ কৰিছে।
অতুল বৰাক পঞ্চায়ত আৰু গ্ৰামোন্নয়ন, অসম চুক্তি ৰূপায়ণ, আবকাৰী, সীমান্ত সুৰক্ষা আৰু উন্নয়ন বিভাগৰ দায়িত্ব দিয়া হৈছে। চৰণ বড়োৱে পৰিবহণ আৰু বড়োলেণ্ড কল্যাণ বিভাগৰ দায়িত্ব পালন কৰিব।
নতুন দপ্তৰ বণ্টনৰ জৰিয়তে ৰাজ্য চৰকাৰে উন্নয়নমূলক কাম-কাজ অধিক গতিশীল কৰাৰ লক্ষ্য লৈছে। শিক্ষা, স্বাস্থ্য, জলসম্পদ, কৃষি, পৰিবহণ, পৰ্যটন আৰু সামাজিক কল্যাণৰ দৰে গুৰুত্বপূৰ্ণ খণ্ডসমূহত অধিক সমন্বয় আৰু দ্ৰুত সিদ্ধান্ত গ্ৰহণৰ আশা প্ৰকাশ কৰা হৈছে।
About The Author
