November 22, 2026

Global Assam News

Global and Local Assam News Website

গুৱাহাটীত অধিবক্তাৰ চেম্বাৰত চুৰি
  • আদাবাৰী তিনিআলিত অধিবক্তাৰ চেম্বাৰত চুৰিকাণ্ড।

  • চাৰিজনীয়া দুৰ্বৃত্তৰ দলৰ বিৰুদ্ধে অভিযোগ।

  • গণেশৰ মূৰ্তি আৰু ৭০০-১,০০০ টকা চুৰি।

  • আন চাৰিটা ফ্লেটতো চুৰিৰ লক্ষ্য কৰাৰ অভিযোগ।

সমগ্ৰ সমাচাৰ সেৱা 

গুৱাহাটী, ১৭ নৱেম্বৰ:গুৱাহাটী মহানগৰীৰ আদাবাৰী তিনিআলিত এগৰাকী অধিবক্তাৰ চেম্বাৰত চুৰিকাণ্ডৰ ঘটনা সংঘটিত হৈছে। চাৰিজনীয়া এটা অচিনাক্ত দুৰ্বৃত্তৰ দলে অধিবক্তা জে পি দাসৰ চেম্বাৰত প্ৰৱেশ কৰি এটা গণেশৰ মূৰ্তি আৰু নগদ ধন চুৰি কৰি নিয়ে। এই সমগ্ৰ ঘটনা চেম্বাৰটোত স্থাপন কৰা চিচিটিভি কেমেৰাত বন্দী হোৱা বুলি জানিব পৰা গৈছে।

ঘটনাটো ১৬ নৱেম্বৰৰ নিশা প্ৰায় ১১ বজাত সংঘটিত হোৱা বুলি অভিযোগ উঠিছে। ১৭ নৱেম্বৰৰ পুৱা প্ৰায় ৯ বজাত অধিবক্তাগৰাকীয়ে চেম্বাৰত উপস্থিত হৈ তলা ভঙা অৱস্থাত প্ৰত্যক্ষ কৰে। ভিতৰত থকা সামগ্ৰীসমূহো লণ্ডভণ্ড হৈ থকা দেখা পায়।

গণেশৰ মূৰ্তিৰ লগতে নগদ ধন চুৰি

অধিবক্তা জে পি দাসৰ মতে, দুৰ্বৃত্তৰ দলটোৱে চেম্বাৰৰ পৰা এটা গণেশৰ মূৰ্তি আৰু প্ৰায় ৭০০ৰ পৰা ১,০০০ টকা নগদ ধন লৈ যায়। অৱশ্যে চুৰি হোৱা মূৰ্তিটোৰ প্ৰকৃত মূল্য এতিয়াও জানিব পৰা হোৱা নাই।

আন চাৰিটা ফ্লেটতো চুৰিৰ চেষ্টা

কেৱল অধিবক্তাৰ চেম্বাৰতে নহয়, অঞ্চলটোৰ আন চাৰিটা ফ্লেটতো দুৰ্বৃত্তই চুৰিৰ লক্ষ্য কৰি লোৱাৰ অভিযোগ উত্থাপন হৈছে। চিচিটিভি ফুটেজত চাৰিজন সন্দেহযুক্ত লোকক দেখা পোৱা গৈছে বুলি জানিব পৰা গৈছে।

অধিবক্তাগৰাকীয়ে ১৭ নৱেম্বৰৰ সন্ধিয়া এই সন্দৰ্ভত এজাহাৰ দাখিল কৰিব বুলি জানিবলৈ দিছে। আৰক্ষীয়ে এজাহাৰ লাভ কৰাৰ পিছত চুৰিকাণ্ডৰ তদন্ত আৰু চিচিটিভি ফুটেজ পৰীক্ষা কৰাৰ সম্ভাৱনা আছে। বৰ্তমানলৈকে সন্দেহযুক্ত লোককেইজনৰ পৰিচয় বা গ্ৰেপ্তাৰৰ বিষয়ে কোনো তথ্য প্ৰকাশ পোৱা নাই।

About The Author

Leave a Reply

Your email address will not be published. Required fields are marked *