তৰুণ নগৰত অগ্নিকাণ্ড, ঘৰৰ গৰাকী বিহাৰত
-
তৰুণ নগৰৰ ৩ নম্বৰ ঘৰত অগ্নিকাণ্ড।
-
ছঠ পূজাৰ বাবে বিহাৰলৈ গৈছিল ঘৰৰ গৰাকী।
-
স্থানীয় লোক আৰু দুখন অগ্নিনিৰ্বাপক বাহনৰ গাড়ীয়ে জুই নিৰ্বাপণ কৰে।
-
অগ্নিনিৰ্বাপক বাহিনীৰ পলমকৈ সঁহাৰি দিয়াৰ অভিযোগ।
সমগ্ৰ সমাচাৰ সেৱা
গুৱাহাটী, ১১ নৱেম্বৰ: গুৱাহাটীৰ তৰুণ নগৰৰ বাইলেন-২ৰ ৩ নম্বৰ ঘৰত মঙলবাৰে সন্ধিয়া এক ভয়ংকৰ অগ্নিকাণ্ড সংঘটিত হয়। ঘন ক’লা ধোঁৱাই সমগ্ৰ অঞ্চলটো আৱৰি ধৰাৰ ফলত স্থানীয় লোকসকলৰ মাজত আতংকৰ সৃষ্টি হয়। অৱশ্যে এই ঘটনাত কোনো লোক হতাহত হোৱা নাই।
ঘটনাৰ সময়ত ঘৰটো তলা বন্ধ অৱস্থাত আছিল। ঘৰৰ গৰাকী ছঠ পূজা উদযাপনৰ বাবে বিহাৰলৈ গৈছিল আৰু সেইদিনা সন্ধিয়াই ৰে’লযোগে যাত্ৰা কৰিছিল বুলি চুবুৰীয়াসকলে জানিবলৈ দিয়ে।
স্থানীয় লোকৰ তৎপৰতাত জুই নিৰ্বাপণ
জুইৰ তীব্ৰতা বৃদ্ধি পোৱাত চুবুৰীয়াসকলে ঘৰৰ তলা ভাঙি ভিতৰত প্ৰৱেশ কৰে আৰু নিজাববীয়াকৈ জুই নিৰ্বাপণৰ চেষ্টা চলায়। পিছত দুখন অগ্নিনিৰ্বাপক বাহনৰ গাড়ী ঘটনাস্থলীত উপস্থিত হৈ স্থানীয় লোকৰ সহযোগত জুই নিয়ন্ত্ৰণলৈ আনে। চুবুৰীয়াসকলৰ তাৎক্ষণিক পদক্ষেপৰ ফলত ঘৰৰ বহু সামগ্ৰী ৰক্ষা পৰে।
অগ্নিনিৰ্বাপক বাহিনীৰ সঁহাৰিক লৈ ক্ষোভ
আনহাতে, অগ্নিনিৰ্বাপক বাহিনীৰ সঁহাৰিত পলম হোৱা বুলি স্থানীয় বাসিন্দাসকলে অভিযোগ উত্থাপন কৰিছে। তেওঁলোকৰ দাবী অনুসৰি, কেইবাবাৰো অগ্নিনিৰ্বাপক বাহিনীক ফোন কৰাৰ পিছতো তাৎক্ষণিক সহায় লাভ কৰা নাছিল। পিছত স্থানীয় আৰক্ষী থানাত যোগাযোগ কৰাৰ পিছতহে সঁহাৰি লাভ কৰে বুলি বাসিন্দাসকলে অভিযোগ কৰে।
অগ্নিকাণ্ডৰ কাৰণ আৰু ক্ষয়-ক্ষতিৰ পৰিমাণ সম্পৰ্কে এতিয়ালৈকে সবিশেষ তথ্য প্ৰকাশ পোৱা নাই।
