আৰক্ষীৰ এনকাউণ্টাৰত নিহত ঘনকান্ত গগৈ
-
গৌৰীসাগৰত আৰক্ষীৰ গুলীত নিহত ঘনকান্ত গগৈ।
-
হোটেল বিলাস ইন হত্যাকাণ্ডৰ মূল অভিযুক্ত আছিল গগৈ।
-
আৰক্ষীৰ পিষ্টল কাঢ়ি নিয়াৰ চেষ্টা কৰাৰ অভিযোগ।
-
ঘটনাত এজন আৰক্ষী বিষয়া আহত।
সমগ্ৰ সমাচাৰ সেৱা
গুৱাহাটী, ৪ নৱেম্বৰ: গুৱাহাটীৰ হোটেল বিলাস ইনত সংঘটিত পাঁচজন লোকৰ হত্যাকাণ্ডৰ মূল অভিযুক্ত ঘনকান্ত গগৈ বুধবাৰে পুৱতি নিশা শিৱসাগৰ জিলাত আৰক্ষীৰ গুলীত নিহত হয়। পুৱা প্ৰায় ৩.১২ বজাত গৌৰীসাগৰ আৰক্ষী থানাৰ অন্তৰ্গত ফুলপানীচিগাত এই ঘটনা সংঘটিত হয়।
আৰক্ষীৰ পিষ্টল কাঢ়ি নিয়াৰ চেষ্টা
শিৱসাগৰৰ জ্যেষ্ঠ আৰক্ষী অধীক্ষক পাপৰি চেতিয়াই জানিবলৈ দিয়া অনুসৰি, ২০২৪ চনৰ এটা পৃথক বেংক জালিয়াতিৰ গোচৰত সোধা-পোছাৰ বাবে গগৈক গুৱাহাটীৰ পৰা শিৱসাগৰলৈ নিয়া হৈছিল। যাত্ৰাপথত প্ৰাকৃতিক কৰ্মৰ বাবে বাহনৰ পৰা নমাৰ পিছত তেওঁ তদন্তকাৰী বিষয়া উপ-পৰিদৰ্শক দেৱাশিস শৰ্মাৰ সেৱা পিষ্টল কাঢ়ি নিয়াৰ চেষ্টা কৰে বুলি আৰক্ষীয়ে অভিযোগ কৰিছে।
ইয়াৰ ফলত আৰক্ষীৰ সৈতে হতাহতিৰ সৃষ্টি হয়। সেই সময়তে আন এজন আৰক্ষী কৰ্মীয়ে গুলীচালনা কৰাত গগৈ গুৰুতৰভাৱে আহত হয়। তেওঁক শিৱসাগৰ অসামৰিক চিকিৎসালয়লৈ নিয়া হয় যদিও চিকিৎসকে মৃত ঘোষণা কৰে। আনহাতে, আহত উপ-পৰিদৰ্শক দেৱাশিস শৰ্মাৰ অৱস্থা সুস্থিৰ বুলি জানিব পৰা গৈছে।
হোটেল বিলাস ইন হত্যাকাণ্ডৰ পটভূমি
উল্লেখ্য যে, যোৱা ২৬ অক্টোবৰত গুৱাহাটীৰ বৰা চাৰ্ভিচস্থিত হোটেল বিলাস ইনত সংঘটিত গুলীচালনাৰ ঘটনাত পাঁচজন লোক নিহত আৰু এজন আহত হৈছিল। হোটেলখনৰ মালিক পক্ষ আৰু লীজ গ্ৰহণ কৰা ঘনকান্ত গগৈৰ মাজত সৃষ্টি হোৱা বিবাদৰ ফলতে এই ঘটনা সংঘটিত হোৱা বুলি প্ৰাথমিক তদন্তত প্ৰকাশ পাইছিল।
ঘটনাৰ পিছতে আৰক্ষীয়ে গগৈক গ্ৰেপ্তাৰ কৰিছিল। সাতদিনীয়া আৰক্ষীৰ জিম্মাৰ অন্তত ৩ নৱেম্বৰত তেওঁক আদালতে ন্যায়িক জিম্মালৈ প্ৰেৰণ কৰিছিল। ইয়াৰ পিছতে পুৰণি বেংক জালিয়াতিৰ গোচৰত শিৱসাগৰ আৰক্ষীয়ে তেওঁক নিজৰ জিম্মালৈ লৈ গৈছিল।
