অসমৰ শ্বহীদ আৰক্ষীলৈ মুখ্যমন্ত্ৰীৰ শ্ৰদ্ধাঞ্জলি

কাহিলীপাৰাত আৰক্ষী স্মৃতি দিৱসৰ কাৰ্যসূচী।
এবছৰত অসম আৰক্ষীৰ ছয়গৰাকী কৰ্মীয়ে কৰ্তব্যৰত অৱস্থাত প্ৰাণ হেৰুৱায়।
স্বাধীনতাৰ পিছৰে পৰা ৯০০ৰো অধিক আৰক্ষী কৰ্মীৰ মৃত্যু।
শ্বহীদ আৰক্ষী কৰ্মীৰ পৰিয়াললৈ মুখ্যমন্ত্ৰীৰ সমবেদনা।

সমগ্ৰ সমাচাৰ সেৱা

গুৱাহাটী, ২২ অক্টোবৰ: অসমৰ মুখ্যমন্ত্ৰী ড° হিমন্ত বিশ্ব শৰ্মাই কৰ্তব্যৰত অৱস্থাত প্ৰাণ আহুতি দিয়া আৰক্ষী কৰ্মীসকললৈ শ্ৰদ্ধাঞ্জলি জ্ঞাপন কৰে। বুধবাৰে গুৱাহাটীৰ কাহিলীপাৰাস্থিত দশম অসম আৰক্ষী বাহিনীৰ চৌহদত অনুষ্ঠিত আৰক্ষী স্মৃতি দিৱসৰ কাৰ্যসূচীত অংশগ্ৰহণ কৰি মুখ্যমন্ত্ৰীগৰাকীয়ে শ্বহীদ আৰক্ষী কৰ্মীসকলৰ ত্যাগক স্মৰণ কৰে।

এবছৰত অসম আৰক্ষীৰ ছয়গৰাকী কৰ্মীৰ মৃত্যু

মুখ্যমন্ত্ৰীয়ে জনোৱা অনুসৰি, ২০২৫ চনৰ ১ ছেপ্টেম্বৰৰ পৰা ২০২৬ চনৰ ৩১ আগষ্টলৈকে দেশজুৰি ১৫৪গৰাকী আৰক্ষী কৰ্মীয়ে কৰ্তব্য পালন কৰি প্ৰাণ হেৰুৱাইছে। একে সময়ছোৱাত অসম আৰক্ষীয়েও ছয়গৰাকী বিষয়া আৰু জোৱানক হেৰুৱায়।

এই উপলক্ষে মুখ্যমন্ত্ৰীয়ে প্ৰয়াত উপ-পৰিদৰ্শক দুলু মণি মেধি, সত্যেন্দ্ৰ মালাকাৰ আৰু নবজিৎ দাস, হাবিলদাৰ জিতেন চন্দ্ৰ বৰা, লেন্স নায়ক সেৱক দত্ত আৰু অমিয়া সোণোৱাললৈ শ্ৰদ্ধাঞ্জলি জ্ঞাপন কৰে। কৰ্তব্য পালন কৰি প্ৰাণ আহুতি দিয়া এই আৰক্ষী কৰ্মীসকলৰ অৱদানক তেওঁ সন্মান জনায়।

স্বাধীনতাৰ পিছৰে পৰা ৯০০ৰো অধিক আৰক্ষী কৰ্মীৰ মৃত্যু

মুখ্যমন্ত্ৰীয়ে উল্লেখ কৰে যে স্বাধীনতাৰ পিছৰে পৰা অসম আৰক্ষীৰ ৯০০ৰো অধিক বিষয়া আৰু কৰ্মীয়ে কৰ্তব্যৰত অৱস্থাত প্ৰাণ হেৰুৱাইছে। ৰাজ্যৰ শান্তি-শৃংখলা বজাই ৰখা আৰু নাগৰিকৰ সুৰক্ষা নিশ্চিত কৰাত তেওঁলোকৰ অৱদান স্মৰণীয় বুলি তেওঁ মন্তব্য কৰে।

লগতে, শ্বহীদ আৰক্ষী কৰ্মীসকলৰ পৰিয়ালবৰ্গৰ প্ৰতি মুখ্যমন্ত্ৰীয়ে সমবেদনা জ্ঞাপন কৰে। অনুষ্ঠানত অসমৰ ভাৰপ্ৰাপ্ত মুখ্য সচিব অজয় তিৱাৰী, আৰক্ষী সঞ্চালকপ্ৰধান হৰমীত সিং আৰু অন্যান্য জ্যেষ্ঠ বিষয়াসকল উপস্থিত থাকে।

আইন-শৃংখলা আৰু নাগৰিকৰ সুৰক্ষাৰ বাবে প্ৰাণ আহুতি দিয়া আৰক্ষী কৰ্মীসকলৰ ত্যাগক সন্মান জনোৱাই এই দিৱসৰ মূল উদ্দেশ্য।