অসমলৈ UK উপ-উচ্চায়ুক্ত এণ্ড্ৰু ফ্লেমিঙৰ দশম ভ্ৰমণ
সমগ্ৰ সমাচাৰ সেৱা
গুৱাহাটী, ১৫ ছেপ্টেম্বৰ: পূব আৰু উত্তৰ-পূব ভাৰতৰ বাবে নিযুক্ত যুক্তৰাজ্যৰ উপ-উচ্চায়ুক্ত ড° এণ্ড্ৰু ফ্লেমিং সোমবাৰে অসমত উপস্থিত হয়। ৰাজ্যখনলৈ এয়া তেওঁৰ দশম ভ্ৰমণ। এই ভ্ৰমণক তেওঁ ‘বাৰ্ষিকী ভ্ৰমণ’ হিচাপে অভিহিত কৰি অসম আৰু যুক্তৰাজ্যৰ মাজৰ সম্পৰ্ক অধিক সুদৃঢ় কৰাৰ লক্ষ্যৰ কথা উল্লেখ কৰে।
নতুন বিমানবন্দৰ টাৰ্মিনেলৰ প্ৰশংসা
ফ্লেমিঙে কয় যে এইবাৰৰ ভ্ৰমণ বিশেষ তাৎপৰ্যপূৰ্ণ, কিয়নো যুক্তৰাজ্যৰ কেইবাটাও আগশাৰীৰ আন্তঃগাঁথনি প্ৰতিষ্ঠান এই সপ্তাহত অসমত উপস্থিত আছে। তেওঁ গুৱাহাটীৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰৰ নতুন টাৰ্মিনেলৰ পৰিৱেশৰো প্ৰশংসা কৰে।
ছ’চিয়েল মিডিয়াত তেওঁ টাৰ্মিনেলটোৰ পৰিৱেশক ‘Singapore vibes with an Assamese touch’ বুলি অভিহিত কৰে। লগতে টাৰ্মিনেলৰ নক্সাত অসমীয়া উপাদানৰ ব্যৱহাৰকো প্ৰশংসা কৰে।
অসম-যুক্তৰাজ্যৰ সম্পৰ্কত নতুন অধ্যায়ৰ আশা
মুখ্যমন্ত্ৰী ড° হিমন্ত বিশ্ব শৰ্মাই ফ্লেমিঙক অসমলৈ স্বাগতম জনাই এই ভ্ৰমণে অসম-যুক্তৰাজ্যৰ সম্পৰ্কত ‘নতুন অধ্যায়’ৰ সূচনা কৰিব পাৰে বুলি মন্তব্য কৰে। ভাৰত-যুক্তৰাজ্যৰ বিস্তৃত সহযোগিতাৰ পৰিপ্ৰেক্ষিতত অসমত আন্তঃগাঁথনি, বাণিজ্য আৰু বিনিয়োগৰ ক্ষেত্ৰত আন্তঃৰাষ্ট্ৰীয় সহযোগিতা বৃদ্ধিৰ সম্ভাৱনাও বৃদ্ধি পাইছে।
About The Author
