মিজোৰাম :অবৈধ অনুপ্ৰৱেশকাৰীৰ ওপৰত নজৰদাৰী আৰু SOP পৰ্যালোচনা

সমগ্র সমাচাৰ সেৱা

আইজল, ১৮ জুলাই:মিজোৰামৰ সীমান্ত জিলাৰ লংত্লাইত অবৈধ অনুপ্ৰৱেশকাৰীৰ ওপৰত নজৰদাৰী আৰু SOP শক্তিশালীকৰণৰ সিদ্ধান্ত গ্ৰহণ কৰা হৈছে। উপায়ুক্ত ডনি লালৰুয়াটছাঙাৰ নেতৃত্বত অনুষ্ঠিত বৈঠকত জিলা প্রশাসন, আৰক্ষী, অসম ৰাইফলছ, গাঁও সভা আৰু নাগরিক সমাজৰ প্ৰতিনিধিয়ে অংশগ্ৰহণ কৰে।

লাই অটোন’মাছ ডিষ্ট্ৰিক্ট কাউন্সিল (LADC)-ৰ মুখ্য কাৰ্যবাহী সদস্য চি লালছাওমজুৱালাই ক’লে, সীমান্ত বাণিজ্য উপকাৰী হলেও, নথিভুক্ত নোহোৱা অনুপ্ৰৱেশকাৰীৰ ব্যৱসায়িক কৰ্মকাণ্ড নিয়ন্ত্ৰণ কৰা হ’ব লাগিব। স্থানীয় ৰাইজৰ সুৰক্ষা আৰু শান্তি বজাই ৰখা প্ৰধান অগ্ৰাধিকাৰ বুলি তেওঁ মন্তব্য কৰে।

বৈঠকত উপায়ুক্তই জানিবলৈ দিয়ে, গৃহ মন্ত্ৰণালয়ৰ নিৰ্দেশত চলি থকা শৰণাৰ্থীৰ বায়োমেট্ৰিক নামভৰ্তি প্ৰায় সম্পূৰ্ণ। গাঁও সভা আৰু হোটেল-মালিকসকলক শৰণার্থী আৰু অবৈধ অনুপ্ৰৱেশকাৰীৰ তথ্য ৰেকৰ্ড ৰাখিবলৈ আৰু নথিভুক্ত নোহোৱা ব্যক্তিক আশ্ৰয় নিদিয়াৰ নিৰ্দেশ দিয়া হৈছে।

বৈঠকত SOP পৰ্যালোচনাৰ লগতে, সকলো অংশীদাৰৰ সমন্বয়ত SOP অধিক কার্যক্ষমভাৱে ৰূপায়ণৰ সিদ্ধান্ত গ্ৰহণ কৰা হৈছে। চলিত বছৰত সীমান্ত পাৰাপাৰ আৰু বাণিজ্যত নিয়ন্ত্ৰণ আৰু নজৰদাৰী বৃদ্ধি কৰিবলৈ লংত্লাই জিলা প্রশাসনে বিভিন্ন পদক্ষেপ গ্ৰহণ কৰিছে।

ফেব্ৰুৱাৰীত, লংত্লাই আৰু চিয়াহা জিলাৰ যৌথ বৈঠকৰ ফলত দুই জিলাত একেটা SOP ৰূপায়ণ, Free Movement Regime (FMR)-ৰ কঠোৰ প্ৰয়োগ, আৰু আচম্বিত পৰিদৰ্শনৰ সিদ্ধান্ত গ্ৰহণ হৈছিল। SOP সম্পূৰ্ণ পৰ্যালোচনাৰ পিছত ৰাজ্য চৰকাৰলৈ দাখিল কৰা হ’ব।