বিশ্বনাথ :আৰক্ষীৰ বিশেষ অভিযানত ৮৬ লাখ টকাৰ গাঞ্জা আৰু হেৰইন দাহ

বিশ্বনাথ জিলাত আৰক্ষীৰ বিশেষ অভিযানত ৮৬ লাখ টকাৰ গাঞ্জা আৰু হেৰইন দাহ।
পানীভড়াল আৰক্ষী চাউনিত চৰকাৰী প্ৰক্ৰিয়াৰে বিগত বৰ্ষত জব্দ কৰা ড্ৰাগছ ধ্বংস।
ড্ৰাগছমুক্ত অসম গঢ়াৰ লক্ষ্যত এই পদক্ষেপে সৰবৰাহকাৰী আৰু ক’লা ব্যৱসায়ীক কঠোৰ বাৰ্তা দিল।
SSP অজাগৌৰান বসুমতাৰী, দণ্ডাধীশ প্ৰাঞ্জিতা কোঁৱৰ, সংযুক্তা গগৈৰ উপস্থিতে ধ্বংস কাৰ্য সম্পন্ন।

সমগ্ৰ সমাচাৰ সেৱা

বিশ্বনাথ, ১২ জুলাই :বিশ্বনাথ জিলাত ড্ৰাগছমুক্ত অসম অভিযানৰ অংশ হিচাপে আজি এক বৃহৎ কাৰ্যসূচীৰ জৰিয়তে জব্দ কৰা বিপুল পৰিমাণৰ নিচাজাত দ্ৰব্য ৰাজহুৱাভাৱে দাহন কৰা হয়। বিশ্বনাথ আৰক্ষীৰ বিশেষ উদ্যোগত জিলাখনৰ পানীভড়াল আৰক্ষী চাউনিত বিগত বৰ্ষত জব্দ কৰা ১৬৩ কিলোগ্ৰাম গাঞ্জা, যাৰ বজাৰ মূল্য প্ৰায় ৮২ লাখ টকা, আৰু ১৮.৫ গ্ৰাম হেৰইন, যাৰ মূল্য প্ৰায় ৪ লাখ টকা, মুঠে প্ৰায় ৮৬ লাখ টকাৰ নিচাজাত সামগ্ৰী দাহ কৰা হয়।

আইনী নিয়ম-কানুন অনুসৰি, জ্যেষ্ঠ আৰক্ষী অধীক্ষক অজাগৌৰান বসুমতাৰী, ন্যায়িক দণ্ডাধীশ প্ৰাঞ্জিতা কোঁৱৰ আৰু কাৰ্যবাহী দণ্ডাধীশ সংযুক্তা গগৈৰ উপস্থিতিত এই সমগ্ৰ ধ্বংস প্ৰক্ৰিয়া সুচাৰুৰূপে সম্পন্ন হয়। বিষয়াসকলৰ কঠোৰ তত্ত্বাৱধানত, ড্ৰাগছসমূহ দাহ কৰাৰ সৈতে অঞ্চলত ড্ৰাগছ ব্যৱসায়ীৰ বিৰুদ্ধে এক কঠোৰ বাৰ্তা প্ৰেৰণ কৰা হৈছে।

উল্লেখযোগ্য যে, আজিৰ দিনটোতে নলবাৰী জিলাৰ দৌলাশালত মুখ্যমন্ত্ৰী হিমন্ত বিশ্ব শৰ্মাই কেন্দ্ৰীয়ভাৱে বৃহৎ পৰিমাণৰ জব্দকৃত ড্ৰাগছ দাহ কৰে। সকলো মিলি, ৰাজ্যৰ বিভিন্ন প্ৰান্তত একেদিনাই জব্দকৃত ড্ৰাগছ ধ্বংস কৰা এই কাৰ্যসূচীয়ে অসমক ড্ৰাগছমুক্ত কৰাৰ চৰকাৰী সংকল্পক অধিক দৃঢ় কৰিছে। বিশ্বনাথ জিলাৰ এই অভিযানৰ ফলত অঞ্চলটোৰ জনসাধাৰণৰ মাজতো ড্ৰাগছ বিৰোধী মনোভাব অধিক শক্তিশালী হ’ব বুলি আশা প্ৰকাশ কৰা হৈছে।