উন্নয়নৰ কামত ভাষা কেতিয়াও বাধা হ’ব নোৱাৰে : শ্ৰী বিজয় কুমাৰ গুপ্তা
Oplus_131072
অসমৰ নৱনিৰ্বাচিত বিধায়ক মাননীয় শ্ৰী বিজয় কুমাৰ গুপ্তাৰ সৈতে এক বিশেষ সাক্ষাৎকাৰ
অসমৰ সামাজিক আৰু ৰাজনৈতিক জীৱনত দীৰ্ঘদিন ধৰি গুৰুত্বপূৰ্ণ ভূমিকা পালন কৰি অহা, ব্যৱসায়ী সমাজৰ সমস্যা, অসম আন্দোলন আৰু আৰএছএছৰ সৈতে জড়িত বিভিন্ন ক্ষেত্ৰত সক্ৰিয় ভূমিকা গ্ৰহণ কৰা, চেণ্ট্ৰেল গুৱাহাটী বিধানসভা সমষ্টিৰ বিজয়ী বিধায়ক শ্ৰী বিজয় কুমাৰ গুপ্তাৰ সৈতে গ্ল’বেল গভাৰ্নেন্স নিউজ আৰু সমগ্ৰ ভাৰত নিউজ গ্ৰুপৰ মেনেজিং এডিটৰ শ্ৰীমতী পূনম শৰ্মাই এক বিশেষ সাক্ষাৎকাৰ অনুষ্ঠিত কৰে।
প্ৰশ্ন ১ : আপুনি ৰাজনীতিলৈ কিয় আৰু কেনেকৈ আহিল?
উত্তৰ :
“মোৰ ৰাজনৈতিক জীৱনৰ বাবে ১৯৯০ৰ দশক এক নিৰ্ণায়ক সময় আছিল। সেই সময়ত অসমৰ সামাজিক আৰু ৰাজনৈতিক পৰিস্থিতি যথেষ্ট জটিল আছিল। একফালে বিচ্ছিন্নতাবাদী শক্তিসমূহে ৰাজ্যৰ ৰাজনীতি আৰু সমাজত প্ৰভাৱ বিস্তাৰ কৰিছিল, আনফালে ‘এক ভাৰত, শ্ৰেষ্ঠ ভাৰত’ৰ ধাৰণাইও বিভিন্ন প্ৰত্যাহ্বানৰ সন্মুখীন হৈছিল।
ছাত্ৰ জীৱনৰ পৰাই মোৰ ৰাষ্ট্ৰীয় স্বয়ংসেৱক সংঘ (RSS)-ৰ আদৰ্শৰ সৈতে সম্পৰ্ক আছিল। সেই সময়তে মোৰ প্ৰাক্তন প্ৰধানমন্ত্ৰী শ্ৰী অটল বিহাৰী বাজপেয়ী, শ্ৰী মুৰলী মনোহৰ যোশী আৰু শ্ৰী লালকৃষ্ণ আডৱানীৰ দৰে নেতাসকলৰ সৈতে সাক্ষাৎ কৰাৰ সৌভাগ্য হৈছিল। তেওঁলোকৰ চিন্তাধাৰা আৰু বিজেপিৰ আদৰ্শই মোক গভীৰভাৱে প্ৰভাৱিত কৰিছিল।
মই বিশ্বাস কৰিছিলোঁ যে বিদেশী অনুপ্ৰৱেশ, সামাজিক অস্থিৰতা আৰু জাতীয় ঐক্যৰ দৰে সমস্যাৰ সমাধানৰ ক্ষেত্ৰত বিজেপিয়েই একমাত্ৰ শক্তিশালী বিকল্প। সেই বিশ্বাসৰ ভিত্তিতেই ১৯৯০ চনত মই বিজেপিৰ সদস্যপদ গ্ৰহণ কৰিছিলোঁ আৰু তেতিয়াৰ পৰা দল আৰু সমাজৰ সেৱাত নিয়োজিত হৈ আছোঁ।”
প্ৰশ্ন ২ : ৰাজনীতিলৈ অহাৰ আগতে সামাজিক কাম-কাজতো সক্ৰিয় আছিলনে?
উত্তৰ :
“ৰাজনীতিত সক্ৰিয় হোৱাৰ আগতে প্ৰায় ৩৫ বছৰ ধৰি মোৰ পৰিচয় আছিল এজন সমাজসেৱক আৰু ব্যৱসায়ী হিচাপে। মই নিজেও এজন ব্যৱসায়ী। অসমত বিভিন্ন বাণিজ্যিক সংগঠনত গুৰুত্বপূৰ্ণ দায়িত্ব পালন কৰাৰ সুযোগ পাইছোঁ।
জেনেৰেল মাৰ্চেণ্টছ এছ’চিয়েশ্যনৰ সভাপতি আৰু কামৰূপ চেম্বাৰ অৱ কমাৰ্চৰ উপ-সভাপতি হিচাপে কাম কৰোঁতে ব্যৱসায়ী সমাজৰ বিভিন্ন সমস্যাৰ সমাধানৰ বাবে কাম কৰিছিলোঁ। ১৯৯০ৰ দশকত অসমৰ বহু ব্যৱসায়ীয়ে বৈষম্য, নিৰাপত্তাহীনতা, হিংসা আৰু ভাবুকিৰ সন্মুখীন হৈছিল। তেনে সময়ত মই তেওঁলোকৰ অধিকাৰ আৰু সুৰক্ষাৰ বাবে সজোৰে মাত মাতিছিলোঁ।
মোৰ বিশ্বাস, ব্যৱসায়ী সমাজ যিকোনো দেশৰ অৰ্থনীতিৰ মেৰুদণ্ড। মই সদায় কৈ আহিছোঁ— ‘অৰ্থনীতি গণতন্ত্ৰৰ পঞ্চম স্তম্ভ।’ এই চিন্তাধাৰাৰ আধাৰতেই ব্যৱসায়ীসকলৰ কল্যাণৰ বাবে কাম কৰি আহিছোঁ।”
প্ৰশ্ন ৩ : বিজেপিৰ এজন পুৰণি কৰ্মী হিচাপে, বিগত ৪৫ বছৰত দলটোত কি পৰিৱৰ্তন দেখিছে?
উত্তৰ :
“যেতিয়া মই বিজেপিৰ সাংগঠনিক কামত জড়িত হৈছিলোঁ, তেতিয়া অসমৰ ৰাজনীতি মূলতঃ কংগ্ৰেছ আৰু অসম গণ পৰিষদক কেন্দ্ৰ কৰি চলিছিল। বহুতে ভাবিছিল বিজেপিয়ে কেতিয়াও অসমত চৰকাৰ গঠন কৰিব নোৱাৰিব।
সেই সময়ত দলৰ কৰ্মীৰ সংখ্যা কম আছিল যদিও তেওঁলোকৰ নিষ্ঠা, আদৰ্শ আৰু সংগঠনৰ প্ৰতি আস্থা আছিল অটল। সেই একাগ্ৰতা আৰু কঠোৰ পৰিশ্ৰমৰ ফলতেই আজি বিজেপি অসমৰ মুখ্য ৰাজনৈতিক শক্তি হিচাপে প্ৰতিষ্ঠিত হৈছে।
২০১৪ চনৰ পিছত আৰম্ভ হোৱা সদস্যতা অভিযান আছিল এক মাইলৰ খুঁটি। তেতিয়া বিজেপিৰ সদস্য সংখ্যা আছিল প্ৰায় আঢ়ৈ লাখ। মোক এই অভিযানৰ সমন্বয়কৰ দায়িত্ব দিয়া হৈছিল। আমি সদস্য সংখ্যা ২৫ লাখলৈ বৃদ্ধি কৰিবলৈ সক্ষম হৈছিলোঁ। পিছত এই সংখ্যা ৪৫ লাখলৈ বৃদ্ধি পায় আৰু বৰ্তমান প্ৰায় ৬৫ লাখত উপনীত হৈছে।”
প্ৰশ্ন ৪. এই নিৰ্বাচনত আপোনাৰ বিজয়ৰ কৃতিত্ব কাক দিব বিচাৰিব?
উত্তৰ: “মই এই নিৰ্বাচনৰ সফলতাৰ সম্পূৰ্ণ কৃতিত্ব মোৰ নিষ্ঠাবান কৰ্মীসকলক দিওঁ। তেওঁলোকে যি নিষ্ঠা আৰু পৰিশ্ৰমেৰে কাম কৰিলে, সেয়া নিঃসন্দেহে প্ৰশংসনীয়। ইয়াৰ পিছত মই মোৰ নেতৃত্বক ধন্যবাদ জ্ঞাপন কৰিছোঁ, যিয়ে প্ৰতিটো খোজতে মোক সহযোগিতা কৰিলে। নিৰ্বাচনী প্ৰচাৰৰ সময়ত মাননীয় অমিত শ্বাহ ডাঙৰীয়া, শ্ৰী নীতিন গাডকাৰী ডাঙৰীয়া আৰু শ্ৰী সৰ্বানন্দ সোণোৱাল ডাঙৰীয়াও আহিছিল, আৰু আমাৰ মাননীয় মুখ্যমন্ত্ৰী শ্ৰী হিমন্ত বিশ্ব শৰ্মা ডাঙৰীয়াও নিজৰ ব্যক্তিগত ছচিয়েল মিডিয়াৰ জৰিয়তে মোৰ হৈ প্ৰচাৰ আৰু সমৰ্থন কৰিছিল। সভাসমূহুত তেওঁলোকৰ উপস্থিতিয়ে বহুখিনি সহায় কৰিলে। বিজেপিৰ প্ৰদেশ সভাপতি শ্ৰী দিলীপ শইকীয়া ডাঙৰীয়াও মোক বহুত সমৰ্থন আৰু সাহস দিলে। তেওঁ মোৰ সভাতো অংশগ্ৰহণ কৰিছিল, যাৰ বাবে মোৰ মনোবল বৃদ্ধি পাইছিল। মই ভাবো যে প্ৰথমে আমাৰ কৰ্মীসকল আৰু তাৰ পিছত আমাৰ দলটোৱে আমাৰ সমাজৰ ওচৰলৈ সঠিক বাৰ্তা প্ৰেৰণ কৰাত সফল হৈছে।”
প্ৰশ্ন ৫ : হিন্দীভাষী হোৱাৰ বাবে নিৰ্বাচনী প্ৰচাৰত কোনো অসুবিধাৰ সন্মুখীন হৈছিলনে?
উত্তৰ :
“মোৰ দৃঢ় বিশ্বাস যে উন্নয়নৰ কামত ভাষা কেতিয়াও বাধা হ’ব নোৱাৰে। মাতৃভাষাৰ সন্মান কৰাটো আমাৰ কৰ্তব্য, কিন্তু ভাষাক লৈ বিভাজনৰ ৰাজনীতি মই কেতিয়াও সমৰ্থন নকৰোঁ।
মোৰ জন্মভূমি অসম। অসম আন্দোলনৰ সময়তো মই গুৰুত্বপূৰ্ণ ভূমিকা পালন কৰিছিলোঁ। মোৰ সমষ্টিত অসমীয়া, বঙালী আৰু হিন্দীভাষী—এই তিনিটা মুখ্য ভাষিক গোট আছে। সকলো ভাষাৰ লোকেই মোক সমানে সমৰ্থন আগবঢ়াইছে। এইটো মোৰ বাবে গৌৰৱৰ বিষয়।”
প্ৰশ্ন ৬ : আপোনাৰ বিধানসভা সমষ্টিৰ মুখ্য সমস্যাসমূহ কি? সমাধানৰ বাবে আপোনাৰ পৰিকল্পনা কি?
উত্তৰ :
“মোৰ সমষ্টিত ১৫টা ৱাৰ্ড আছে। ইয়াৰ ভিতৰত পাহাৰীয়া অঞ্চলসমূহ বিশেষকৈ ১১, ১২, ১৩ আৰু ২৭ নম্বৰ ৱাৰ্ড উন্নয়নৰ ক্ষেত্ৰত পিছ পৰি আছে।
এই অঞ্চলসমূহত ৰাস্তা, খোৱাপানী, ষ্ট্ৰীট লাইট, অডিট’ৰিয়াম আৰু সামাজিক-সাংস্কৃতিক সুবিধাৰ অভাৱ আছে। বৰষুণৰ সময়ত বহু শিশুৱে বিদ্যালয়লৈ যাব নোৱাৰে।
মই নিৰ্বাচনৰ সময়ত এই সমস্যাসমূহ সমাধানক সৰ্বোচ্চ অগ্ৰাধিকাৰ দিম বুলি প্ৰতিশ্ৰুতি দিছিলোঁ আৰু সেই অনুসৰি কাম কৰি আছোঁ।”
প্ৰশ্ন ৭ : ভৰলু নদী, স্লুইচ গেট আৰু জলাবদ্ধতাৰ সমস্যাৰ স্থায়ী সমাধানৰ বাবে কি পৰিকল্পনা আছে?
উত্তৰ :
“ভৰলু নদী এসময়ত এখন পৰিষ্কাৰ আৰু প্ৰাকৃতিক নদী আছিল, কিন্তু এতিয়া প্ৰায় নলালৈ পৰিণত হৈছে। বহু চৰকাৰ আহিল-গ’ল, কিন্তু এই সমস্যাৰ স্থায়ী সমাধান হোৱা নাই।
মানুহে প্লাষ্টিক আৰু আৱৰ্জনা নদীত পেলোৱাৰ ফলত নদীখন দূষিত হৈ পৰিছে। মোৰ ইচ্ছা নদীখন পৰিষ্কাৰ কৰা, দুয়োপাৰ সুৰক্ষিত কৰা আৰু প্ৰয়োজন হ’লে ওপৰত ফ্লাইঅ’ভাৰ নিৰ্মাণৰ সম্ভাৱনা অধ্যয়ন কৰা।
বিশেষজ্ঞৰ পৰামৰ্শ লৈ এই সমস্যাৰ স্থায়ী সমাধান বিচাৰিবলৈ মই চেষ্টা কৰিম।”
প্ৰশ্ন ৮ : গুৱাহাটী মহানগৰীৰ আইন-শৃংখলা ব্যৱস্থাক আপুনি কেনেদৰে মূল্যায়ন কৰে? বিশেষকৈ ৰাতিৰ সময়ত নিৰ্জন স্থানসমূহত, মালীগাঁও অঞ্চলৰ আশে-পাশে বহু যুৱক-যুৱতীক মাদক দ্ৰব্য সেৱন কৰা দেখা যায়। এই সমস্যাৰ সমাধানৰ বাবে আপুনি কি ব্যৱস্থা গ্ৰহণ কৰিব?
উত্তৰ : “বিধায়ক হোৱাৰ কিছুদিন পাছত মই পানবজাৰ থানালৈ গৈছিলোঁ। তাত ড্ৰাগছৰ সমস্যাক লৈ আলোচনা কৰাৰ সময়ত আৰক্ষী বিষয়াগৰাকীয়ে মোক ক’লে যে তেওঁলোক এই সমস্যাক লৈ অত্যন্ত চিন্তিত। বিশেষকৈ আমাৰ বিধানসভা সমষ্টিত এই সমস্যা আটাইতকৈ বেছি। বিভিন্ন স্থানত ইয়াৰ ঘাটি গঢ়ি উঠিছে।
ইয়াৰ মূল কাৰণ হৈছে এইটো এটা ব্যস্ত বাণিজ্যিক এলেকা, য’ত অসমৰ বাহিৰৰ পৰাও বহু লোক আহে। জনসমাগম অত্যধিক হোৱাৰ বাবে কেতিয়াবা এই সমস্যাক নিয়ন্ত্ৰণ কৰাটো কঠিন হৈ পৰে। এই সমস্যাৰ সৈতে আন এটা বিষয়ো জড়িত আছে। ৰে’ললাইনৰ কাষত স্থাপিত টেণ্ট, ঝুপড়ি আৰু বস্তিসমূহত আৰক্ষীয়ে অভিযান চলাবলৈ গ’লে বহু সময়ত ফলপ্ৰসূ ব্যৱস্থা ল’ব নোৱাৰে, কিয়নো সেই ভূমি ৰে’ল বিভাগৰ অধীনত পৰে।
মই ভাবিছোঁ যে এই সমস্যাৰ স্থায়ী সমাধানৰ বাবে ৰে’ল বিভাগৰ শীৰ্ষ বিষয়াসকল আৰু আৰক্ষী বিভাগৰ সৈতে সমন্বয় সাধন কৰি ড্ৰাগছ বিক্ৰী হোৱা স্থানসমূহত কঠোৰ অভিযান চলাব লাগিব। ৰে’লপথৰ কাষৰ বস্তিসমূহত ড্ৰাগছৰ অবৈধ ব্যৱসায় চলি আছে, আৰু ইয়াক বন্ধ কৰাটো মোৰ কাৰ্যসূচীৰ শীৰ্ষ অগ্ৰাধিকাৰ। আইন-শৃংখলা ব্যৱস্থা অধিক শক্তিশালী কৰাটো মোৰ অন্যতম লক্ষ্য, আৰু মই সম্পূৰ্ণ নিষ্ঠাৰে এই দিশত কাম কৰি আছোঁ যাতে আমাৰ অঞ্চলক এই ভয়ংকৰ সমস্যাৰ পৰা মুক্ত কৰিব পাৰি।”
প্ৰশ্ন ৯ : সমাজৰ কোনটো ক্ষেত্ৰত কাম কৰিবলৈ আপোনাৰ আটাইতকৈ ভাল লাগে?
উত্তৰ : “যুৱ সমাজ।”
“সমাজৰ উজ্জ্বল ভৱিষ্যতৰ বাবে যুৱ প্ৰজন্মৰ ব্যক্তিত্ব বিকাশ অত্যন্ত প্ৰয়োজনীয়। মই বিচাৰোঁ যে অধিক সংখ্যক যুৱক-যুৱতীক মোৰ সৈতে সংযোগ কৰিব পাৰোঁ। তেওঁলোকৰ মাজত সৎ মূল্যবোধ আৰু সংস্কাৰৰ সঞ্চাৰ হওক, যাতে এক শক্তিশালী চৰিত্ৰ গঢ় লৈ উঠে।
মই বিচাৰোঁ যে আমাৰ গৌৰৱময় ইতিহাসৰ পৰিচায়ক বৈদিক আৰু প্ৰাচীন সভ্যতা-সংস্কৃতিৰ প্ৰতি তেওঁলোকৰ গভীৰ আস্থা আৰু জ্ঞান গঢ়ি উঠক। তেতিয়াহে তেওঁলোকৰ ব্যক্তিত্ব অধিক দৃঢ়, সচেতন আৰু দায়িত্বশীল হ’ব। এইটোৱেই এখন শক্তিশালী আৰু দায়িত্ববান সমাজ গঢ়াৰ মূল ভেটি।
আজিৰ যুৱ প্ৰজন্ম, যিসকলক ‘জেনেৰেচন Z’ বুলি কোৱা হয়, তেওঁলোকৰ চিন্তাধাৰা হয়তো কিছু পৃথক। নিৰ্বাচনৰ সময়ত মোক তেওঁলোকে বহু সময়ত ট্ৰ’লো কৰিছিল। তথাপিও মোৰ বিশ্বাস, সঠিক সংলাপৰ জৰিয়তে তেওঁলোকলৈ ইতিবাচক বাৰ্তা প্ৰেৰণ কৰিব পৰা যায়।
যেতিয়া যুৱসকলে নিজৰ সাংস্কৃতিক আৰু সামাজিক মূল্যবোধক আন্তৰিকভাৱে গ্ৰহণ কৰিব, তেতিয়াই তেওঁলোকে কেৱল উত্তম নাগৰিক হিচাপে গঢ় লৈ নুঠিব, সমাজকো ইতিবাচক দিশত আগবঢ়াই নিব পাৰিব। যুৱ প্ৰজন্মই বৈদিক জ্ঞানৰ লগতে আধুনিক শিক্ষা আৰু উত্তম সংস্কাৰ লাভ কৰা উচিত, যাতে তেওঁলোকে নিজৰ জীৱন আৰু সমাজত এক আদৰ্শ স্থাপন কৰিব পাৰে।
মই আন্তৰিকতাৰে বিচাৰোঁ যে আমাৰ যুৱসমাজে এই পথ অনুসৰণ কৰি নিজৰ লগতে সমাজকো সমৃদ্ধ আৰু শক্তিশালী কৰি তুলক।”
প্ৰশ্ন ১০ : আপোনাৰ পছন্দৰ মন্ত্ৰালয় বা বিভাগ কোনটো?
উত্তৰ :
“মই সদায় ভগৱদ্ গীতাৰ এই শ্লোকটো মনত ৰাখোঁ— ‘কর্মণ্যেবাধিকাৰস্তে মা ফলেষু কদাচন।’
মোৰ লক্ষ্য কেৱল নিজৰ কৰ্তব্য পালন কৰা। ভৱিষ্যতে যি দায়িত্বেই মোক দিয়া হওক, মই তাক নিষ্ঠা আৰু সততাৰে পালন কৰিম।
প্ৰশ্ন ১১ : অসম আৰু পশ্চিমবংগত লাভ কৰা জয়ক আপুনি কেনেদৰে মূল্যায়ন কৰে?
উত্তৰ :
“মোৰ মতে এই জয় কেৱল এটা দলৰ জয় নহয়, ই ভাৰতৰ জনসাধাৰণ, ভাৰতীয় সভ্যতা আৰু সংস্কৃতিৰ জয়।
সীমান্ত সুৰক্ষা, অনুপ্ৰৱেশ নিয়ন্ত্ৰণ আৰু জাতীয় স্বাৰ্থ সুৰক্ষাৰ ক্ষেত্ৰত এই জয় গুৰুত্বপূৰ্ণ। আমি সমাজৰ সকলো শ্ৰেণীৰ লোকক একেলগে লৈ আগবাঢ়িব বিচাৰোঁ।”
প্ৰশ্ন ১২ : অসমত বিৰোধী দলৰ বৰ্তমানৰ অৱস্থাক কেনেদৰে দেখে?
উত্তৰ :
“গণতন্ত্ৰত এটা শক্তিশালী বিৰোধী দল অত্যন্ত প্ৰয়োজনীয়। বিৰোধী দলৰ সমালোচনা আৰু প্ৰশ্নৰ পৰা চৰকাৰেও শিক্ষা ল’ব পাৰে।
বৰ্তমান অসমত কংগ্ৰেছৰ অৱস্থা দুৰ্বল। তেওঁলোকে পুনৰ শক্তিশালী হ’বলৈ সাংগঠনিক আৰু আদৰ্শগত পৰিৱৰ্তনৰ প্ৰয়োজন আছে। শক্তিশালী বিৰোধী দল থাকিলেহে গণতন্ত্ৰ অধিক সুস্থ আৰু কাৰ্যকৰী হয়।”
About The Author
