গাৰো পাহাৰত গৰ্ভৱতী মহিলাৰ ৰক্তহীনতা, বিশেষ অধ্যয়নৰ আশ্বাস মুখ্যমন্ত্ৰীৰ
সমগ্ৰ সমাচাৰ সেৱা
শ্বিলং, ২৫ আগষ্টঃ পূব গাৰো পাহাৰ জিলাত গৰ্ভৱতী মহিলাৰ মাজত ৰক্তহীনতাৰ উচ্চ হাৰক লৈ বিশেষ অধ্যয়ন কৰা হ’ব বুলি মেঘালয়ৰ মুখ্যমন্ত্ৰী কনৰাড কে ছাংমাই মঙলবাৰে বিধানসভাত আশ্বাস দিয়ে। তেওঁ নিজেই বিষয়টো পৰ্যবেক্ষণ কৰিব বুলিও সদনক জানিবলৈ দিয়ে।
বিৰোধী দলপতি মুকুল ছাংমাই বিষয়টো উত্থাপন কৰাৰ পিছতে মুখ্যমন্ত্ৰীয়ে এই আশ্বাস দিয়ে। মুকুল ছাংমাই জিলাখনৰ বিভিন্ন স্বাস্থ্যকেন্দ্ৰ পৰিদৰ্শনৰ সময়ত গৰ্ভৱতী মহিলাৰ মাজত অস্বাভাৱিকভাৱে অধিক ৰক্তহীনতাৰ ঘটনা লক্ষ্য কৰা বুলি উল্লেখ কৰে। তেওঁ লগতে কেইবাগৰাকীও মহিলাক চিকিৎসাৰ বাবে জিলাখনৰ বাহিৰৰ স্বাস্থ্য প্ৰতিষ্ঠানলৈ প্ৰেৰণ কৰা হৈছে বুলি জানিবলৈ দিয়ে।
মুখ্যমন্ত্ৰীয়ে কয় যে ৰাজ্য চৰকাৰে বিগত সাত বছৰে ছফটৱেৰভিত্তিক ব্যৱস্থাৰ জৰিয়তে প্ৰতিটো গৰ্ভধাৰণৰ তথ্য পৰ্যবেক্ষণ কৰি আহিছে। এই ব্যৱস্থাত গোপনীয়তা বজাই ৰখাৰ লগতে অধিক বিপদাপন্ন গৰ্ভধাৰণ চিনাক্ত আৰু নিৰীক্ষণ কৰাত সহায় কৰে।
উচ্চ বিপদাপন্ন গৰ্ভৱতীক বিশেষ সহায়
কনৰাড ছাংমাই কয় যে প্ৰায় ১০-১৫ শতাংশ গৰ্ভৱতী মহিলাক উচ্চ বিপদাপন্ন হিচাপে চিনাক্ত কৰা হয় আৰু তেওঁলোকৰ অধিকাংশই ৰক্তহীনতাত ভোগে। ৰাজ্যখনৰ সমগ্ৰ পৰিসৰৰ তথ্য চৰকাৰৰ হাতত আছে বুলিও তেওঁ উল্লেখ কৰে।
তেওঁ কয় যে উচ্চ বিপদাপন্ন গৰ্ভৱতী মহিলাসকলক প্ৰসৱৰ প্ৰায় ১৫ দিন পূৰ্বে ‘ট্ৰেনজিট মাদাৰ হোম’লৈ স্থানান্তৰ কৰা হয়। তাত তেওঁলোকক অতিৰিক্ত পুষ্টি আৰু আৰ্থিক সহায় আগবঢ়োৱা হয়, যাতে গৰ্ভধাৰণ আৰু প্ৰসৱ অধিক নিৰাপদভাৱে সম্পন্ন কৰিব পৰা যায়।
মুখ্যমন্ত্ৰীয়ে লগতে কয় যে লক্ষ্যভিত্তিক স্বাস্থ্য সেৱা আৰু হস্তক্ষেপৰ ফলত বিগত সাত বছৰত মেঘালয়ৰ মাতৃ মৃত্যুৰ অনুপাত ৫৫ শতাংশ হ্ৰাস পাইছে। তেওঁৰ মতে, এই সময়ছোৱাত দেশৰ ভিতৰত এয়া সৰ্বাধিক হ্ৰাসৰ অন্যতম উদাহৰণ।
মাতৃৰ পুষ্টি আৰু শিশুৰ বিকাশৰ ওপৰত গুৰুত্ব
কনৰাড ছাংমাই কয় যে সন্তান জন্ম দিয়াৰ সময়ত কোনো মাতৃয়ে যাতে প্ৰাণ হেৰুৱাবলগীয়া নহয়, সেয়াই চৰকাৰৰ লক্ষ্য। পূব গাৰো পাহাৰৰ পৰিস্থিতি তেওঁ নিজে পৰ্যালোচনা কৰাৰ লগতে বিষয়টো সমাধানৰ বাবে বিশেষ অডিট আৰু অতিৰিক্ত ব্যৱস্থা গ্ৰহণ কৰা হ’ব বুলি সদনক আশ্বাস দিয়ে।
ইয়াৰ পূৰ্বে মুকুল ছাংমাই কয় যে জিলাখনৰ কমিউনিটি হেল্থ চেণ্টাৰ আৰু প্ৰাথমিক স্বাস্থ্যকেন্দ্ৰসমূহত ৰক্তহীনতাক সাধাৰণ স্বাস্থ্যজনিত সমস্যা হিচাপেহে বিবেচনা কৰা হৈছে।
তেওঁ মাতৃৰ পুষ্টি আৰু শিশুৰ শাৰীৰিক বিকাশৰ মাজত থকা সম্পৰ্কৰ কথাও উল্লেখ কৰে। মাতৃৰ স্বাস্থ্যৰ অৱস্থা দুৰ্বল হ’লে শিশুৰ স্বাভাৱিক শাৰীৰিক বিকাশ বাধাগ্ৰস্ত হৈ শাৰীৰিক বৃদ্ধি কমি যোৱাৰ সম্ভাৱনা থাকে বুলি তেওঁ সতৰ্ক কৰি দিয়ে।
মুকুল ছাংমাই পূব গাৰো পাহাৰত ৰক্তহীনতাক গুৰুতৰ আৰু অস্বাভাৱিকভাৱে ব্যাপক সমস্যা হিচাপে অভিহিত কৰি ইয়াৰ মোকাবিলাৰ বাবে লক্ষ্যভিত্তিক পদক্ষেপ, সামগ্ৰিক কৌশল আৰু মাতৃ স্বাস্থ্যৰ ওপৰত বিস্তৃত সমীক্ষাৰ আহ্বান জনায়।
About The Author
