২৫ অক্টোবৰৰ পৰা কোকৰাঝাৰত পূব মণ্ডলৰ মহিলা হকী লীগ
- ২৫ অক্টোবৰৰ পৰা ৪ নৱেম্বৰলৈ কোকৰাঝাৰত হকী লীগ।
- উপ-কনিষ্ঠ আৰু কনিষ্ঠ মহিলা শাখাৰ প্ৰতিযোগিতা।
- ছখন ৰাজ্যৰ দলে অংশগ্ৰহণ কৰিব।
- খেলো ইণ্ডিয়া পদক্ষেপৰ অধীনত আয়োজন।
সমগ্ৰ সমাচাৰ সেৱা
কোকৰাঝাৰ, ১৫ অক্টোবৰ: অসমৰ কোকৰাঝাৰত অহা ২৫ অক্টোবৰৰ পৰা পূব মণ্ডলৰ উপ-কনিষ্ঠ আৰু কনিষ্ঠ মহিলা হকী লীগ ২০২৬–২৭ অনুষ্ঠিত হ’ব। অসম হকী আৰু কোকৰাঝাৰ হকী সংস্থাৰ যৌথ উদ্যোগত ৪ নৱেম্বৰলৈকে এই প্ৰতিযোগিতা কাথালগুৰিস্থিত ছাই এছটিচি (SAI STC) ক্ৰীড়া কেন্দ্ৰত অনুষ্ঠিত হ’ব।
ছখন ৰাজ্যৰ দলে অংশগ্ৰহণ কৰিব
ভাৰত চৰকাৰৰ খেলো ইণ্ডিয়া (Khelo India) পদক্ষেপৰ অধীনত আয়োজিত এই লীগত উপ-কনিষ্ঠ আৰু কনিষ্ঠ শাখাৰ মহিলা হকী প্ৰতিযোগিতা অনুষ্ঠিত হ’ব। ছখন ৰাজ্যৰ দলে ইয়াত অংশগ্ৰহণ কৰাৰ কথা।
প্ৰতিযোগিতাৰ প্ৰস্তুতি সন্দৰ্ভত মঙলবাৰে বড়োফা নগৰৰ বিটিচিএলএ বিধানসভা ভৱনৰ সন্মিলন কক্ষত এখন প্ৰস্তুতিমূলক বৈঠক অনুষ্ঠিত হয়। বড়োলেণ্ড টেৰিটৰিয়েল কাউন্সিলৰ কাৰ্যবাহী সদস্য তথা কোকৰাঝাৰ জিলা হকী সংস্থাৰ অস্থায়ী সমিতিৰ সভাপতি দেৰহাছাত বসুমতাৰীৰ অধ্যক্ষতাত বৈঠকখন অনুষ্ঠিত হয়।
যুৱ মহিলা খেলুৱৈক উৎসাহিত কৰাৰ লক্ষ্য
অসম হকীৰ সভাপতি তপন দাসে প্ৰতিযোগিতাত অংশগ্ৰহণ কৰিবলগীয়া খেলুৱৈ আৰু বিষয়াসকলৰ থকা-খোৱা আৰু যাতায়াতৰ ব্যৱস্থাকে ধৰি বিভিন্ন প্ৰস্তুতিৰ বিষয়ে বৈঠকত অৱগত কৰে। প্ৰতিযোগিতাখন সুচাৰুৰূপে পৰিচালনাৰ বাবে বিটিচিৰ সংশ্লিষ্ট বিভাগ আৰু ক্ৰীড়া সংগঠনৰ প্ৰতিনিধিৰে এখন স্থানীয় আয়োজক সমিতিও গঠন কৰা হয়।
আয়োজকসকলৰ আশা, এই লীগে বড়োলেণ্ড অঞ্চলৰ লগতে উত্তৰ-পূৰ্বাঞ্চলৰ যুৱ মহিলা হকী খেলুৱৈসকলক নিজৰ প্ৰতিভা প্ৰদৰ্শনৰ সুযোগ দিয়াৰ লগতে মহিলা হকীৰ প্ৰসাৰত সহায় কৰিব।
About The Author
