হিমাশ্ৰী বৰোৰ মৃত্যুৰ ন্যায় বিচাৰি এবছুৰ মমবাতি সমদল

হিমাশ্ৰী বৰোৰ মৃত্যুৰ ন্যায় বিচাৰি এবছুৰ প্ৰতিবাদ।
অসমৰ কেইবাখনো জিলাত মমবাতি প্ৰজ্বলন আৰু মৌন সমদল।
নিৰপেক্ষ তদন্ত আৰু দোষী চিনাক্তকৰণৰ দাবী।
ৰে’লযাত্ৰীৰ নিৰাপত্তা শক্তিশালী কৰাৰ আহ্বান।

সমগ্ৰ সমাচাৰ সেৱা

কোকৰাঝাৰ, ৯ অক্টোবৰ: অসমৰ যুৱতী হিমাশ্ৰী বৰোৰ ৰহস্যজনক মৃত্যুৰ উচিত তদন্ত আৰু পৰিয়ালক ন্যায় প্ৰদানৰ দাবীত শুকুৰবাৰে সদৌ বড়ো ছাত্ৰ সন্থা (এবছু)ৰ নেতৃত্বত ৰাজ্যৰ বিভিন্ন জিলাত মমবাতি প্ৰজ্বলন আৰু মৌন সমদল উলিওৱা হয়।

কোকৰাঝাৰত বিভিন্ন সংগঠনৰ প্ৰতিবাদ

কোকৰাঝাৰৰ বডোফা শিশু উদ্যানত হিমাশ্ৰী বৰোৰ প্ৰতিচ্ছবিত পুষ্পাঞ্জলি অৰ্পণ কৰি মমবাতি জ্বলোৱা হয়। ইয়াৰ পিছত প্ৰতিবাদকাৰীসকলে জে ডি ৰোডেৰে মৌন সমদল উলিয়াই কোকৰাঝাৰ চৰকাৰী উচ্চতৰ মাধ্যমিক আৰু বহুমুখী বিদ্যালয়ৰ খেলপথাৰত কাৰ্যসূচীৰ সামৰণি মাৰে।

এই প্ৰতিবাদী কাৰ্যসূচীত সদৌ অসম ছাত্ৰ সন্থা (আছু), ৰাভা ছাত্ৰ সন্থা আৰু গাৰো ছাত্ৰ সন্থাৰ প্ৰতিনিধিসকলেও অংশগ্ৰহণ কৰে। চিৰাং, বাক্সা, তামুলপুৰ, ওদালগুৰি, শোণিতপুৰ, কামৰূপ, বিশ্বনাথ, ধেমাজি, গোৱালপাৰা আৰু কাৰ্বি আংলঙতো অনুৰূপ কাৰ্যসূচী অনুষ্ঠিত হয়।

নিৰপেক্ষ তদন্তৰ দাবী

প্ৰতিবাদকাৰীসকলে হিমাশ্ৰী বৰোৰ মৃত্যুৰ ঘটনাৰ সম্পূৰ্ণ আৰু নিৰপেক্ষ তদন্ত, দোষী চিনাক্তকৰণ আৰু দোষ প্ৰমাণিত হোৱা লোকৰ বিৰুদ্ধে আইন অনুসৰি কঠোৰ ব্যৱস্থা গ্ৰহণৰ দাবী জনায়। এই সন্দৰ্ভত মুখ্যমন্ত্ৰী হিমন্ত বিশ্ব শৰ্মালৈ সম্বোধন কৰা স্মাৰক-পত্ৰও জিলা আয়ুক্তসকলৰ জৰিয়তে দাখিল কৰা হয়।

এবছুৰ সভাপতি খৌৰৌমদাও ৱাৰীয়ে ঘটনাটোক গুৰুত্বসহকাৰে লৈ নিৰপেক্ষ তদন্ত নিশ্চিত কৰিবলৈ চৰকাৰৰ প্ৰতি আহ্বান জনায়। আনহাতে, আছুৰ উপ-সভাপতি নবজ্যোতি ৰয়ে উত্তৰ-পূৰ্বাঞ্চলৰ যাত্ৰীসকলৰ ৰে’লযাত্ৰাৰ নিৰাপত্তা অধিক শক্তিশালী কৰাৰ দাবী উত্থাপন কৰে।

অন্ধ্ৰ প্ৰদেশত উদ্ধাৰ হৈছিল মৃতদেহ

২০ বছৰীয়া হিমাশ্ৰী বৰো অসমৰ কামৰূপ জিলাৰ চাপাইডঙৰ বাসিন্দা আৰু গুৱাহাটীৰ বি বৰুৱা মহাবিদ্যালয়ৰ ছাত্ৰী আছিল। নৃত্যৰ অনুষ্ঠানত অংশগ্ৰহণ কৰি ঘৰলৈ উভতি অহাৰ সময়ত ৬ অক্টোবৰত তেওঁ ৰে’লযাত্ৰাৰ মাজতে সন্ধানহীন হৈছিল। পিছত অন্ধ্ৰ প্ৰদেশৰ শ্ৰীকাকুলাম জিলাত ৰে’লপথৰ কাষত তেওঁৰ মৃতদেহ উদ্ধাৰ কৰা হয়।

বৰ্তমান তেওঁৰ মৃত্যুৰ পৰিস্থিতি সন্দৰ্ভত আৰক্ষীৰ তদন্ত অব্যাহত আছে।