জামুগুৰিহাটত দুগ্ধ প্ৰক্ৰিয়াকৰণ উদ্যোগ উদ্বোধন হিমন্তৰ
- জামুগুৰিহাটত কন্যকাৰ দুগ্ধ উদ্যোগ উদ্বোধন
- স্থানীয় দুগ্ধ উৎপাদকলৈ নতুন বজাৰৰ সম্ভাৱনা
- দিঘলী চাপৰিত বৃহৎ টাইল উদ্যোগ উদ্বোধন
- ১৫,০০০–২০,০০০ যুৱকৰ কৰ্মসংস্থাপনৰ সম্ভাৱনা
সমগ্ৰ সমাচাৰ সেৱা
জামুগুৰিহাট, ৮ অক্টোবৰ: অসমৰ মুখ্যমন্ত্ৰী ড° হিমন্ত বিশ্ব শৰ্মাই বৃহস্পতিবাৰে জামুগুৰিহাটত ‘কন্যকা’ৰ এটা নতুন দুগ্ধ প্ৰক্ৰিয়াকৰণ উদ্যোগ উদ্বোধন কৰে। জামুগুৰিহাট মাৰ্কেটিং ছ’চাইটিৰ চৌহদত স্থাপন কৰা এই উদ্যোগটোৱে অঞ্চলটোৰ দুগ্ধ উৎপাদকসকলৰ বাবে নতুন বজাৰ আৰু অধিক সুযোগ সৃষ্টি কৰিব বুলি আশা কৰা হৈছে।
উদ্যোগে সৃষ্টি কৰিব নতুন কৰ্মসংস্থাপনৰ সুযোগ
মুখ্যমন্ত্ৰীগৰাকীয়ে ইয়াৰ পিছত দিঘলী চাপৰিলৈ গৈ উত্তৰ-পূৰ্বাঞ্চলৰ প্ৰথম বৃহৎ পৰিসৰৰ টাইল নিৰ্মাণ উদ্যোগ উদ্বোধন কৰে। তেওঁ কয় যে অঞ্চলটোত আৰু অধিক উদ্যোগ স্থাপনৰ বাবে চৰকাৰে পদক্ষেপ গ্ৰহণ কৰিব। এই উদ্যোগসমূহে প্ৰায় ১৫,০০০ৰ পৰা ২০,০০০ নিবনুৱা যুৱকৰ বাবে কৰ্মসংস্থাপনৰ সুযোগ সৃষ্টি কৰিব পাৰে বুলি তেওঁ উল্লেখ কৰে।
কৃষক গোটলৈ ভূমি পট্টা আৰু আৰ্থিক সাহায্য
চকীঘাটত মুখ্যমন্ত্ৰীগৰাকীয়ে ৫০টা কৃষক গোটক ১০ বিঘাকৈ ভূমিৰ পট্টা প্ৰদান কৰে। লগতে প্ৰায় ৫৫০জন গোটৰ সদস্যলৈ মুখ্যমন্ত্ৰীৰ বিশেষ সাহায্য পুঁজিৰ পৰা প্ৰতিজনক ২ লাখ টকাকৈ আৰ্থিক সাহায্য ঘোষণা কৰে। নাডুৱাৰ সমষ্টিৰ বাবে ‘মুখ্যমন্ত্ৰী আত্মনিৰ্ভৰ অসম’ আঁচনিৰ অধীনতো অতিৰিক্ত সহায় আগবঢ়োৱা হ’ব বুলি তেওঁ জানিবলৈ দিয়ে।
About The Author
