জাবৰ নিষ্কাশনত অনিয়ম কৰিলে GMCৰ জৰিমনা

মাছ আৰু মাংসৰ আৱৰ্জনা পেলালে ১,০০০ টকাৰ জৰিমনা।
ৰাজহুৱা স্থানত জাবৰ পেলালে ৫০০ টকা জৰিমনা।
ৰাসায়নিক আৱৰ্জনা নিষ্কাশনত ৫,০০০ টকাৰ জৰিমনা।
নলাৰ পানীৰ প্ৰবাহ বন্ধ কৰিলে ২৫,০০০ টকালৈ জৰিমনা।

সমগ্ৰ সমাচাৰ সেৱা

গুৱাহাটী, ৯ অক্টোবৰ: গুৱাহাটী মহানগৰ পৌৰ নিগমে (GMC) ব্যৱসায়িক প্ৰতিষ্ঠানসমূহক মাছ, হাঁহ-কুকুৰা আৰু কচাইখানাৰ আৱৰ্জনা সঠিকভাৱে নিষ্কাশন কৰিবলৈ নিৰ্দেশ দিছে। ৰাজহুৱা স্থানত এনে আৱৰ্জনা পেলালে ১,০০০ টকাৰ তাৎক্ষণিক জৰিমনা বিহা হ’ব বুলি নিগমে সকীয়াই দিছে।

বিভিন্ন নাগৰিক নিয়ম উলংঘনত জৰিমনা

গুৱাহাটী মহানগৰীক পৰিষ্কাৰ-পৰিচ্ছন্ন আৰু স্বাস্থ্যসন্মত কৰি ৰখাৰ উদ্দেশ্যে GMC-এ বিভিন্ন নিয়ম উলংঘনৰ বাবে জৰিমনা নিৰ্ধাৰণ কৰিছে। ৰাজহুৱা স্থানত থু পেলালে ৩০০ টকা আৰু নিষিদ্ধ একক ব্যৱহাৰযোগ্য প্লাষ্টিক ব্যৱহাৰ, য’তে-ত’তে জাবৰ পেলোৱা, অবৈধভাৱে আৱৰ্জনা নিষ্কাশন, ৰাজহুৱা স্থানত প্ৰস্ৰাৱ কৰা বা মলত্যাগ কৰাৰ বাবে ৫০০ টকাৰ জৰিমনা বিহা হ’ব।

গুৰুতৰ অনিয়মত ২৫ হাজাৰ টকালৈ জৰিমনা

নিৰ্মাণ আৰু ভাঙি পেলোৱা সামগ্ৰীৰ আৱৰ্জনা অথবা মলবাহী আৱৰ্জনা অবৈধভাৱে পেলালে ২,০০০ টকা জৰিমনা নিৰ্ধাৰণ কৰা হৈছে। আনহাতে, ৰাসায়নিক আৱৰ্জনা অনুচিতভাৱে নিষ্কাশন কৰা আৰু ৰাজহুৱা সম্পত্তি বা খুঁটাত পোষ্টাৰ লগোৱা তথা গ্ৰাফিটি অংকনৰ বাবে ৫,০০০ টকা জৰিমনা বিহা হ’ব।

নলা-নৰ্দমাত সামগ্ৰী পেলাই পানীৰ স্বাভাৱিক প্ৰবাহ বন্ধ কৰিলে সৰ্বাধিক ২৫,০০০ টকা জৰিমনা আৰোপ কৰা হ’ব। মহানগৰখন পৰিষ্কাৰ ৰখাৰ বাবে নাগৰিক আৰু ব্যৱসায়িক প্ৰতিষ্ঠানসমূহক নিয়ম মানি চলিবলৈ GMC-এ আহ্বান জনাইছে।