ডিব্ৰুগড়ত অগ্নিকাণ্ড, ৫খন ব্যৱসায়িক প্ৰতিষ্ঠান ক্ষতিগ্ৰস্ত

ডিব্ৰুগড়,২৩ ছেপ্টেম্বৰ: ডিব্ৰুগড়ত আজি অসম মেডিকেল কলেজ আৰু হাস্পতালৰ সমীপত সংঘটিত হয় ভয়ংকৰ অগ্নিকাণ্ড। এই অগ্নিকাণ্ডত মুঠ পাঁচখন ব্যৱসায়িক প্ৰতিষ্ঠান ক্ষতিগ্ৰস্ত হয়। ঘটনাক কেন্দ্ৰ কৰি অঞ্চলটোত আতংকময় পৰিস্থিতিৰ সৃষ্টি হয়।

‘সন্ধ্যা ছুইটছ’ৰ পৰা জুইৰ সূত্ৰপাতৰ সন্দেহ

প্ৰাপ্ত তথ্য অনুসৰি, ‘সন্ধ্যা ছুইটছ’ নামৰ এখন ব্যৱসায়িক প্ৰতিষ্ঠানৰ পৰা অগ্নিকাণ্ডৰ সূত্ৰপাত হোৱা বুলি সন্দেহ কৰা হৈছে। প্ৰতিষ্ঠানখনত ৰন্ধন গেছৰ চিলিণ্ডাৰ বিস্ফোৰণৰ ফলতে জুইৰ সূত্ৰপাত হোৱা বুলি প্ৰাথমিকভাৱে সন্দেহ কৰা হৈছে। অৱশ্যে এই কথা এতিয়ালৈকে চৰকাৰীভাৱে নিশ্চিত হোৱা নাই।

চাৰিখন দোকানলৈ জুই বিয়পি পৰে

জুই দ্ৰুতগতিত কাষৰ আন চাৰিখন দোকানলৈ বিয়পি পৰাত একাধিক ব্যৱসায়িক প্ৰতিষ্ঠান ক্ষতিগ্ৰস্ত হয়। ঘটনাস্থলীত অগ্নিনিৰ্বাপক বাহিনীৰ দল উপস্থিত হৈ জুই নিয়ন্ত্ৰণৰ বাবে অভিযান চলায়।

অগ্নিকাণ্ডৰ সঠিক কাৰণ, ক্ষয়-ক্ষতিৰ পৰিমাণ আৰু কোনো লোক হতাহত বা আহত হৈছে নে নাই, সেই বিষয়ে এতিয়াও নিশ্চিত তথ্য লাভ কৰা হোৱা নাই। আৰক্ষীয়ে ঘটনাস্থলী পৰিদৰ্শন কৰি অগ্নিকাণ্ডৰ পৰিস্থিতি আৰু কাৰণ সন্দৰ্ভত তদন্ত চলোৱাৰ সম্ভাৱনা আছে। অধিক তথ্যৰ বাবে অপেক্ষা কৰা হৈছে।