শিৱসাগৰৰ ডাৰিকা সিলচাকূ ঐতিহ্যগত পদ্ধতিত পুনৰুদ্ধাৰ

সমগ্ৰ সমাচাৰ সেৱা

গুৱাহাটী, ২৪ আগষ্ট:শিৱসাগৰৰ সিমালুগুৰিত অৱস্থিত ঐতিহাসিক ডাৰিকা সিলচাকূ সেতু প্লাৱনত ব্যাপক ক্ষতিগ্ৰস্ত হোৱাৰ পিছত, ভাৰতীয় প্ৰত্নতত্ত্ব বিভাগে ঐতিহ্যগত পাথৰ মেচনাৰী আৰু শতাব্দী পুৰণি চুন-বেল গাম মিশ্ৰণ ব্যৱহাৰ কৰি সংৰক্ষণ অভিযান আৰম্ভ কৰিব।

এই সংৰক্ষণ কাৰ্য সদায় কেৱল মেরামতিৰ বাবে নহয়, পুৰণি সেতুৰ মূল চৰিত্ৰ আৰু ইতিবৃত্তিক গঠন যাতে অটুট থাকে সেয়া নিশ্চিত কৰা হৈছে। পুৰাতত্ত্ববিদসকলে গৱেষণামূলক পৰিকল্পনা প্ৰস্তুত কৰিছে, য’ত বৈজ্ঞানিক ধূলি অপসাৰণ, ৰাসায়নিক পৰিষ্কাৰ আৰু ক্ষতিগ্ৰস্ত অংশবোৰ সাৱধানে খুলি পুনৰ স্থাপন কৰা হ’ব। প্ৰতিটো পাথৰ নথিভুক্ত কৰি, ঐতিহ্যগত “এনেষ্টাইল’চিছ” পদ্ধতিৰে পুনৰ সংযোগ কৰা হ’ব।

ক্ষতিগ্ৰস্ত অংশসমূহ চুন-সুৰখি, বেল গাম, মেথি, কঁহু, হৰিতকী আদি প্ৰাকৃতিক উপাদানৰে প্ৰস্তুত প্ৰাচীন মৰ্টাৰেৰে পুনৰুদ্ধাৰ কৰা হ’ব। সেতুৰ দুটা ডাউনস্ট্ৰীম পিয়াৰ বন্যাৰ বলত ক্ষতিগ্ৰস্ত হৈছে। সেউজীয়া শৈৱালৰ বৃদ্ধি আৰু চুনৰ প্লাষ্টাৰ, চুন-কংক্ৰিটৰ ক্ষয়ৰ পৰা উদ্ধাৰৰ বাবে পদক্ষেপ গ্ৰহণ কৰা হ’ব।

প্ৰথমিক সংৰক্ষণ ব্যৱস্থাসমূহত মাটি অপসাৰণ, বাঁহৰ বেৰ, কফাৰ ড্যাম স্থাপন, আৰু সম্পূৰ্ণ সেতুৰ দস্তাবেজীকৰণ অন্তৰ্ভুক্ত। সংৰক্ষণৰ অধীনত চুন-সুৰখি প্লাষ্টাৰ, পথ উন্নয়ন আৰু পাথৰেৰে উইংৱাল নিৰ্মাণো কৰা হ’ব।

ডাৰিকা সিলচাকূ সেতু স্বৰ্গদেউ প্ৰতাপ সিংহৰ ৰাজত্বকালত (১৬০৩-৪১ খ্ৰীষ্টাব্দ) নির্মিত হৈছিল। এই সেতু চাৰিখন স্তম্ভৰ ওপৰত দণ্ডায়মান, আৰু পাথৰেৰে গঠন কৰা আধাৰত অৱস্থিত। সংৰক্ষণ কাৰ্য মোঃ গোলাম নবী আজাদৰ তত্ত্বাৱধানত আৰু অধ্যক্ষ কঙ্কন জ্যোতি শইকীয়া, প্ৰধান সংৰক্ষণ বিষয়া ডাঃ নবজিত দেউৰী আৰু তেওঁলোকৰ দলেৰে সম্পাদিত হ’ব।

নতুন প্ৰচেষ্টাৰ জৰিয়তে, শিৱসাগৰৰ এই ঐতিহাসিক সেতু আৰু সংলগ্ন ১৩টা প্ৰত্নতাত্ত্বিক স্থানক বন্যাৰ পৰা উদ্ধাৰৰ বাবে দ্ৰুত পদক্ষেপ গ্ৰহণ কৰা হৈছে।