যুৱ উদ্ভাৱনৰ নতুন মঞ্চ NESFIC ২০২৬

অসমত NESFIC ২০২৬ৰ শুভাৰম্ভ
যুৱ উদ্ভাৱক আৰু ষ্টাৰ্টআপক নতুন সুযোগ
৫০টা বাস্তৱ সমস্যাৰ সমাধানৰ লক্ষ্য
চৰকাৰী ক্ৰয় প্ৰক্ৰিয়াত ষ্টাৰ্টআপক সহায়ৰ ব্যৱস্থা

সমগ্ৰ সমাচাৰ সেৱা

গুৱাহাটী, ২৬ ছেপ্টেম্বৰ: অসমৰ মুখ্যমন্ত্ৰী ড° হিমন্ত বিশ্ব শৰ্মাই শুকুৰবাৰে গুৱাহাটীৰ খানাপাৰাস্থিত প্ৰশাসনিক ষ্টাফ কলেজত North East Seva First Innovation Challenge (NESFIC) ২০২৬ আনুষ্ঠানিকভাৱে মুকলি কৰে। এই পদক্ষেপৰ জৰিয়তে যুৱ উদ্ভাৱক আৰু ষ্টাৰ্টআপসমূহক চৰকাৰী বিভাগ তথা উদ্যোগসমূহৰ বাস্তৱ সমস্যাৰ ব্যৱহাৰিক সমাধান বিকাশৰ সুযোগ প্ৰদান কৰা হ’ব।

৫০টা বাস্তৱ সমস্যাৰ সমাধানৰ লক্ষ্য

NESFICৰ অধীনত মুঠ ৫০টা বাস্তৱ সমস্যাক উদ্ভাৱনৰ বাবে নিৰ্ধাৰণ কৰা হ’ব। ইয়াৰে ৪০টা সমস্যা অসম চৰকাৰৰ বিভিন্ন বিভাগৰ পৰা আৰু ১০টা সমস্যা উদ্যোগ খণ্ডৰ পৰা লোৱা হ’ব। মাতৃ আৰু নৱজাতকৰ স্বাস্থ্য, বান প্ৰস্তুতি, কৃষি, জল ব্যৱস্থাপনা, চাহ উদ্যোগ আৰু নগৰীয়া আন্তঃগাঁথনি আদি ক্ষেত্ৰক ইয়াত অন্তৰ্ভুক্ত কৰা হৈছে।

মুখ্যমন্ত্ৰীগৰাকীয়ে কয় যে NESFICৰ জৰিয়তে যুৱ উদ্ভাৱকসকলক চৰকাৰৰ সৈতে একেখন মঞ্চত আনি বাস্তৱ সমস্যাৰ সমাধান বিচৰা হ’ব।

ষ্টাৰ্টআপৰ বাবে নতুন সুযোগ

চৰকাৰী সংস্থালৈ সামগ্ৰী বা সেৱা বিক্ৰী কৰাৰ ক্ষেত্ৰত ষ্টাৰ্টআপসমূহে সন্মুখীন হোৱা ক্ৰয়-প্ৰক্ৰিয়াৰ সমস্যাসমূহৰ কথাও মুখ্যমন্ত্ৰীয়ে উল্লেখ কৰে। NESFICৰ চৰকাৰী বিভাগৰ প্ৰত্যাহ্বানসমূহত Swiss Challenge পদ্ধতি আৰু Right of First Refusal ব্যৱহাৰৰ কথা জানিবলৈ দিয়ে।

ইয়াৰ জৰিয়তে কোনো ষ্টাৰ্টআপে কাৰ্যকৰী সমাধান আগবঢ়ালে প্ৰতিযোগিতামূলক প্ৰস্তাৱ আহ্বান কৰা হ’ব আৰু মূল উদ্ভাৱকক সৰ্বোত্তম প্ৰস্তাৱৰ সৈতে মিলাই চুক্তি লাভ কৰাৰ অধিকাৰ দিয়া হ’ব।

মুখ্যমন্ত্ৰীয়ে অসমক কেৱল প্ৰযুক্তিৰ গ্ৰাহক হিচাপে নহয়, বৰং প্ৰযুক্তি উদ্ভাৱন, পৰীক্ষা আৰু নিৰ্মাণৰ কেন্দ্ৰ হিচাপে গঢ়ি তোলাৰ লক্ষ্যৰ কথাও উল্লেখ কৰে।