এবিএছইউৰ :অবাধ খনন আৰু নাগালেণ্ডৰ কয়লা খননে শিৱসাগৰৰ বান কৰা অভিযোগ
সমগ্ৰ সমাচাৰ সেৱা
শিৱসাগৰ,২৪ আগষ্ট : দিখৌ নদীৰ পাৰত চলি থকা অনিয়ন্ত্ৰিত শিল-বালি খনন আৰু নাগালেণ্ডৰ পাহাৰত অব্যাহত থকা কয়লা খননে উজনি অসমৰ শিৱসাগৰ জিলাত শেহতীয়াকৈ সংঘটিত বৃহৎ বান আৰু ধ্বংসযজ্ঞ অধিক ভয়াৱহ কৰি তুলিছে বুলি সদৌ বড়ো ছাত্ৰ সন্থা (এবিএছইউ)-এ অভিযোগ কৰিছে।
এবিএছইউৰ সভাপতি খৌৰউমদাও ৱাৰীৰ নেতৃত্বত সংগঠনটোৰ উদ্ধাৰকাৰী দলে শিৱসাগৰ জিলাৰ বানপীড়িত নখন গাঁৱত নদিনীয়া সাহায্য আৰু উদ্ধাৰ অভিযান সম্পূৰ্ণ কৰে। এই অভিযানত ২০৯টা পৰিয়ালক ঘৰৰ পৰা পলস আঁতৰোৱা, ঘৰ মেৰামতি আৰু ক্ষতিগ্ৰস্ত লোকৰ কৃষিপথাৰত ধান ৰোপণত সহায় কৰা হয়।
দিখৌ নদীৰ খননক লৈ উদ্বেগ
উদ্ধাৰ অভিযান সামৰাৰ পিছত ৱাৰীয়ে কেন্দ্ৰ আৰু অসম চৰকাৰক উজনি অসমৰ বানপীড়িত পৰিয়ালসমূহক পৰ্যাপ্ত ক্ষতিপূৰণ প্ৰদান কৰাৰ লগতে পুনৰ্বাসনৰ ব্যৱস্থা কৰিবলৈ দাবী জনায়। সোমবাৰে এখন সংবাদমেলত ৱাৰীয়ে কয় যে দিখৌ নদীৰ পৰা বৃহৎ পৰিমাণে শিল আৰু বালি উত্তোলন কৰাৰ লগতে নাগালেণ্ডত ব্যাপকভাৱে চলি থকা কয়লা খনন কাৰ্যই উজনি অসমত সৃষ্টি হোৱা এই বৃহৎ প্ৰাকৃতিক দুৰ্যোগত অৰিহণা যোগাইছে।
বানপীড়িত পৰিয়ালৰ পুনৰ্বাসনৰ দাবী
ক্ষেত্ৰ পৰ্যায়ত চলোৱা মূল্যায়নৰ তথ্যৰ উল্লেখ কৰি এবিএছইউৰ সভাপতিগৰাকীয়ে ভৱিষ্যতে এনে বৃহৎ বান আৰু ধ্বংসযজ্ঞ পুনৰ সংঘটিত নহ’বলৈ কেন্দ্ৰ আৰু ৰাজ্য চৰকাৰক এক সমন্বিত নীতি প্ৰস্তুত কৰি প্ৰতিৰোধমূলক ব্যৱস্থা কাৰ্যকৰী কৰিবলৈ আহ্বান জনায়। এবিএছইউৱে শিৱসাগৰ আৰু চৰাইদেউ জিলাৰ বানপীড়িত লোকসকলৰ বাবে পৰ্যাপ্ত সাহায্য, পুনৰ্বাসন আৰু ঘৰ পুনৰ নিৰ্মাণৰ ব্যৱস্থা কৰাৰ দাবী জনায়। লগতে বানৰ সম্ভাৱনাপ্ৰৱণ অঞ্চলসমূহ বৈজ্ঞানিকভাৱে চিনাক্ত কৰি ক্ষতিগ্ৰস্ত পৰিয়ালসমূহক নিৰাপদ স্থানলৈ স্থানান্তৰ কৰাৰ বাবেও সংগঠনটোৱে আহ্বান জনায়।
দীৰ্ঘম্যাদী পুনৰ্বাসনৰ আহ্বান
সংগঠনটোৰ মতে, বানত গুৰুতৰভাৱে ক্ষতিগ্ৰস্ত বহু পৰিয়ালে যথেষ্ট আৰ্থিক ক্ষতিৰ সন্মুখীন হৈছে আৰু বহু পৰিয়ালৰ হাতত বৰ্তমান জীৱন পুনৰ গঢ়াৰ বাবে পৰ্যাপ্ত আৰ্থিক সম্বল নাই। ৱাৰীয়ে অসম চৰকাৰক মানৱীয় দৃষ্টিভংগীৰে বিষয়টো বিবেচনা কৰি বানপীড়িত পৰিয়ালসমূহৰ বাবে দীৰ্ঘম্যাদী পুনৰ্বাসন কাৰ্যসূচী গ্ৰহণ কৰিবলৈ আহ্বান জনায়, যাতে তেওঁলোকে পুনৰ জীৱন আৰু জীৱিকাৰ ভেটি গঢ়ি তুলিব পাৰে।
সংবাদমেলত এবিএছইউৰ সাধাৰণ সম্পাদক খনীন্দ্ৰ বসুমতাৰী আৰু সহকাৰী সাধাৰণ সম্পাদক কৃপেশ দৈমাৰীয়েও অংশগ্ৰহণ কৰে।
About The Author
