কাৰ্বি আংলঙত ৩৩৬ কোটিৰ সৈনিক বিদ্যালয়
-
৩৩৬ কোটি টকাৰ প্ৰকল্প।
-
লাংভকুত নিৰ্মাণ হ’ব বিদ্যালয়খন।
-
৬৪০গৰাকী কেডেটৰ আৱাসিক সুবিধা।
-
৩০ মাহৰ ভিতৰত নিৰ্মাণ সম্পূৰ্ণ কৰাৰ লক্ষ্য।
সমগ্ৰ সমাচাৰ সেৱা
কাৰ্বি আংলং ,১৭ নৱেম্বৰ:অসমৰ শিক্ষাখণ্ডত আন এক নতুন সংযোজন হিচাপে কাৰ্বি আংলং জিলাৰ লাংভকুত ৰাজ্যৰ দ্বিতীয়খন সৈনিক বিদ্যালয়ৰ আধাৰশিলা স্থাপন কৰে মুখ্যমন্ত্ৰী ড০ হিমন্ত বিশ্ব শৰ্মাই। ১৭ নৱেম্বৰত কাৰ্বি আংলং জিলাৰ গ্ৰেণ্ড ছিলভাৰ জুবিলী উদযাপনৰ অংশ হিচাপে এই অনুষ্ঠান অনুষ্ঠিত হয়।
প্ৰতিৰক্ষা মন্ত্ৰালয়ৰ ৩৩৬ কোটি টকাৰ পুঁজিৰে নিৰ্মাণ হ’বলগীয়া এই বিদ্যালয়খন ৪৪,০০০ বৰ্গমিটাৰ এলেকাত স্থাপন কৰা হ’ব। অসম চৰকাৰৰ লোকনিৰ্মাণ বিভাগে (PWD) অহা ৩০ মাহৰ ভিতৰত নিৰ্মাণকাৰ্য সম্পূৰ্ণ কৰাৰ লক্ষ্য নিৰ্ধাৰণ কৰিছে।
৬৪০গৰাকী কেডেটৰ বাবে আধুনিক সুবিধা
প্ৰস্তাৱিত সৈনিক বিদ্যালয়খনত একেলগে ৬৪০গৰাকী কেডেটৰ থকাৰ ব্যৱস্থা থাকিব। বিদ্যালয়খনত আধুনিক শৈক্ষিক আৰু প্ৰশাসনিক ভৱন, পুথিভঁৰাল, প্ৰেক্ষাগৃহ, ছাত্ৰ-ছাত্ৰীৰ বাবে আৱাসগৃহৰ লগতে বিভিন্ন ক্ৰীড়া আৰু প্ৰশিক্ষণৰ সুবিধা থাকিব।
ইয়াৰ উপৰি ছুইমিং পুল, ফুটবল আৰু ক্ৰিকেট খেলপথাৰ, হকী ষ্টেডিয়াম, বাস্কেটবল আৰু টেনিছ ক’ৰ্ট, ঘোঁৰা চলোৱাৰ প্ৰশিক্ষণ, শ্বুটিং ৰেঞ্জ আৰু ইনড’ৰ ষ্টেডিয়াম নিৰ্মাণৰ পৰিকল্পনা কৰা হৈছে।
প্ৰতিৰক্ষা বাহিনীত যোগদানৰ সুযোগ বৃদ্ধি
মুখ্যমন্ত্ৰীয়ে আশা প্ৰকাশ কৰে যে এই শিক্ষানুষ্ঠানখনে অসমৰ যুৱ প্ৰজন্মক সেনা, নৌসেনা আৰু বায়ুসেনাত যোগদানৰ বাবে প্ৰস্তুত কৰি তুলিব। বিশেষকৈ কাৰ্বি আংলং আৰু ডিমা হাছাওৰ জনজাতীয় যুৱক-যুৱতীৰ বাবে এই বিদ্যালয়খনে নতুন সুযোগ সৃষ্টি কৰিব।
উল্লেখযোগ্য যে অসমৰ প্ৰথমখন সৈনিক বিদ্যালয় গোৱালপাৰাৰ মৰনৈত অৱস্থিত। কাৰ্বি আংলঙত দ্বিতীয়খন সৈনিক বিদ্যালয় স্থাপনৰ জৰিয়তে ৰাজ্যখনৰ প্ৰতিৰক্ষা শিক্ষা ব্যৱস্থা অধিক সম্প্ৰসাৰিত হোৱাৰ আশা কৰা হৈছে।
