গুৱাহাটীত আজি Guns N’ Rosesৰ অনুষ্ঠান, আদৰণি মুখ্যমন্ত্ৰীৰ
-
আজি ১৭ নৱেম্বৰত গুৱাহাটীত Guns N’ Rosesৰ অনুষ্ঠান।
-
মুখ্যমন্ত্ৰী হিমন্ত বিশ্ব শৰ্মাই সামাজিক মাধ্যমযোগে আদৰণি জনায়।
-
উত্তৰ-পূৰ্বাঞ্চলত বেণ্ডটোৰ প্ৰথমটো সংগীতানুষ্ঠান।
-
অনুষ্ঠানৰ জৰিয়তে অসমৰ পৰ্যটন আৰু অৰ্থনীতিৰ নতুন সম্ভাৱনা।
সমগ্ৰ সমাচাৰ সেৱা
গুৱাহাটী, ১৭ নৱেম্বৰ:বিশ্ববিখ্যাত আমেৰিকান ৰক বেণ্ড Guns N’ Rosesৰ সংগীতানুষ্ঠানক লৈ আজি উৎসৱমুখৰ পৰিৱেশে বিৰাজ কৰিছে গুৱাহাটীত। বেণ্ডটোৰ গুৱাহাটীত অনুষ্ঠিত হ’বলগীয়া সংগীতানুষ্ঠানৰ পূৰ্বে অসমৰ মুখ্যমন্ত্ৰী ড০ হিমন্ত বিশ্ব শৰ্মাই সামাজিক মাধ্যমযোগে সংগীতশিল্পীসকলক আদৰণি জনায়।
মুখ্যমন্ত্ৰীগৰাকীয়ে ১৭ নৱেম্বৰৰ নিশা অনুষ্ঠিত হ’বলগীয়া অনুষ্ঠানটোক লৈ নিজৰ উৎসাহ প্ৰকাশ কৰি লিখে, “গুৱাহাটী আপোনালোকৰ সংগীতানুষ্ঠান উপভোগ কৰিবলৈ অপেক্ষা কৰি আছে। ৰঙা নদী আৰু নীলা পাহাৰৰ দেশলৈ আপোনালোকক স্বাগতম।”
‘পেৰাডাইজ চিটি’ৰ প্ৰসংগৰে মুখ্যমন্ত্ৰীৰ বিশেষ বাৰ্তা
Guns N’ Rosesৰ জনপ্ৰিয় গীত ‘Paradise City’ৰ প্ৰসংগ উল্লেখ কৰি মুখ্যমন্ত্ৰীগৰাকীয়ে আন এটা বাৰ্তাত লিখে যে আজি নিশা পেৰাডাইজ চিটিৰ নতুন ঠিকনা হৈছে গুৱাহাটী। তেওঁৰ এই বাৰ্তাই সংগীতপ্ৰেমীসকলৰ মাজত বিশেষ উৎসাহৰ সৃষ্টি কৰিছে।
উত্তৰ-পূৰ্বাঞ্চলত প্ৰথমবাৰৰ বাবে অনুষ্ঠান
উল্লেখ্য যে Guns N’ Rosesৰ এই অনুষ্ঠানটো উত্তৰ-পূৰ্বাঞ্চলত বেণ্ডটোৰ প্ৰথমটো প্ৰদৰ্শন হ’ব। খানাপাৰাস্থিত ভেটেৰিনেৰী কলেজ খেলপথাৰত অনুষ্ঠিত হ’বলগীয়া এই সংগীতানুষ্ঠানত বেণ্ডটোৰ মুখ্য কণ্ঠশিল্পী Axl Roseৰ লগতে আন সদস্যসকলেও অংশগ্ৰহণ কৰিব।
‘November Rain’, ‘Sweet Child O’ Mine’, ‘Welcome to the Jungle’ আৰু ‘Paradise City’ৰ দৰে জনপ্ৰিয় গীতেৰে বিশ্বজুৰি পৰিচিত এই বেণ্ডটোৰ অনুষ্ঠান উপভোগ কৰিবলৈ দেশৰ বিভিন্ন প্ৰান্তৰ পৰা সংগীতপ্ৰেমীৰ আগমন ঘটিছে। এই অনুষ্ঠানে অসমক আন্তঃৰাষ্ট্ৰীয় সংগীত আৰু মনোৰঞ্জনৰ মানচিত্ৰত অধিক পৰিচিত কৰাৰ লগতে পৰ্যটন আৰু স্থানীয় অৰ্থনীতিৰ বাবেও নতুন সম্ভাৱনা সৃষ্টি কৰিব বুলি আশা কৰা হৈছে।
