November 22, 2026

Global Assam News

Global and Local Assam News Website

বৰপেটাত ৰাষ্ট্ৰীয় প্ৰেছ দিৱস পালন, দায়িত্বশীল সাংবাদিকতাত গুৰুত্ব

বৰপেটাত ৰাষ্ট্ৰীয় প্ৰেছ দিৱস পালন, দায়িত্বশীল সাংবাদিকতাত গুৰুত্ব
  • ১৬ নৱেম্বৰত বৰপেটাত ৰাষ্ট্ৰীয় প্ৰেছ দিৱস পালন।

  • এইবাৰৰ বিষয়বস্তু আছিল ‘সাংবাদিকতা: জনপ্ৰিয়তা নে দায়িত্বশীলতা’।

  • জ্যেষ্ঠ সাংবাদিক প্ৰিয়ৰঞ্জন দাসক সম্বৰ্ধনা।

  • সংবাদৰ শুদ্ধতা, বস্তুনিষ্ঠতা আৰু জনস্বাৰ্থৰ ওপৰত গুৰুত্ব।

সমগ্ৰ সমাচাৰ সেৱা

বৰপেটা,১৬ নৱেম্বৰ: দায়িত্বশীল আৰু জনমুখী সাংবাদিকতাৰ গুৰুত্বৰ ওপৰত বিশেষ গুৰুত্ব আৰোপ কৰি সোমবাৰে অসমৰ বৰপেটাত পালন কৰা হয় ৰাষ্ট্ৰীয় প্ৰেছ দিৱস ২০২৬। বৰপেটা জিলা প্ৰশাসন আৰু বৰপেটা প্ৰেছ ক্লাবৰ উদ্যোগত তথা জিলা তথ্য আৰু জনসংযোগ বিভাগৰ সহযোগত এই কাৰ্যসূচীৰ আয়োজন কৰা হয়।

এইবাৰৰ অনুষ্ঠানৰ মূল বিষয়বস্তু আছিল ‘সাংবাদিকতা: জনপ্ৰিয়তা নে দায়িত্বশীলতা’।

সাংবাদিকতাৰ সামাজিক দায়বদ্ধতাৰ ওপৰত আলোচনা

অনুষ্ঠানত আদৰণী ভাষণ প্ৰদান কৰি বৰপেটাৰ জিলা আয়ুক্ত নবদীপ পাঠকে সাংবাদিকতাৰ ইতিহাস, পৰিৱৰ্তিত ধাৰা আৰু সমাজত সংবাদ মাধ্যমৰ ক্ৰমবৰ্ধমান ভূমিকাৰ বিষয়ে আলোকপাত কৰে।

আনহাতে, বিশিষ্ট বক্তা অক্ষয় কুমাৰ মিশ্ৰই ডিজিটেল যুগত নাগৰিক সাংবাদিকতাৰ গুৰুত্বৰ বিষয়ে আলোচনা কৰে। তেওঁ সাংবাদিকসকলক জনসাধাৰণৰ গুৰুত্বপূৰ্ণ সমস্যাসমূহ সংবাদ মাধ্যমৰ জৰিয়তে উত্থাপন কৰিবলৈ আহ্বান জনায়। জনসেৱাই সাংবাদিকতাৰ প্ৰধান লক্ষ্য হোৱা উচিত বুলিও তেওঁ মত প্ৰকাশ কৰে।

সাংবাদিকক সম্বৰ্ধনা, সংবাদ মাধ্যমৰ প্ৰত্যাহ্বানৰ চৰ্চা

অনুষ্ঠানত জ্যেষ্ঠ সাংবাদিক প্ৰিয়ৰঞ্জন দাসক বিশেষভাৱে সম্বৰ্ধনা জনোৱা হয়। তেওঁ সংবাদ মাধ্যমৰ ওপৰত কৰ্পৰেট প্ৰতিষ্ঠানসমূহৰ চাপ আৰু ইয়াৰ ফলত সংবাদৰ নিৰ্ভৰযোগ্যতা তথা শুদ্ধতাৰ ওপৰত পৰা প্ৰভাৱৰ বিষয়ে উদ্বেগ প্ৰকাশ কৰে।

বৰপেটা মহাবিদ্যালয়ৰ অধ্যক্ষ বিৰিঞ্চি কুমাৰ দাসেও সংবাদ মাধ্যমত বস্তুনিষ্ঠতা, তথ্যৰ শুদ্ধতা আৰু জনস্বাৰ্থক অগ্ৰাধিকাৰ দিয়াৰ প্ৰয়োজনীয়তাৰ কথা উল্লেখ কৰে।

অনুষ্ঠানত বৰপেটা প্ৰেছ ক্লাবৰ সভাপতি মহানন্দ পাঠক, সম্পাদক নবজিৎ বায়ন, জিলা প্ৰশাসনৰ বিষয়া আৰু বিভিন্ন প্ৰান্তৰ সাংবাদিকসকল উপস্থিত থাকে। অনুষ্ঠানটোৱে ডিজিটেল যুগত নৈতিকতা, দায়িত্বশীলতা আৰু বিশ্বাসযোগ্য সাংবাদিকতাৰ প্ৰয়োজনীয়তাক পুনৰ প্ৰতিফলিত কৰে।

About The Author

Leave a Reply

Your email address will not be published. Required fields are marked *