টেঙাখাতৰ অগ্নিকাণ্ডত মৃতকৰ সংখ্যা ৫জনলৈ বৃদ্ধি
-
টেঙাখাতৰ অইল ইণ্ডিয়াৰ অগ্নিকাণ্ডত ৫জনৰ মৃত্যু।
-
চিকিৎসাধীন অৱস্থাত কুমুদ গগৈৰ মৃত্যু।
-
কৰ্তব্যত গাফিলতিৰ অভিযোগত ৪জন অইল কৰ্মচাৰী নিলম্বিত।
-
মৃতকৰ পৰিয়াললৈ ১০ লাখ টকাকৈ ক্ষতিপূৰণ ঘোষণা।
সমগ্ৰ সমাচাৰ সেৱা
ডিব্ৰুগড়, ১০ নৱেম্বৰ: ডিব্ৰুগড় জিলাৰ টেঙাখাতস্থিত অইল ইণ্ডিয়া লিমিটেডৰ (OIL) ইণ্টাৰমিডিয়েট টেংক ফাৰ্ম (ITF)ত সংঘটিত ভয়ংকৰ বিস্ফোৰণ আৰু অগ্নিকাণ্ডৰ ঘটনাত মৃতকৰ সংখ্যা ৫জনলৈ বৃদ্ধি পাইছে। মঙলবাৰে চিকিৎসাধীন অৱস্থাত আন এজন শ্ৰমিকৰ মৃত্যু হোৱাৰ পিছতে এই সংখ্যা বৃদ্ধি পায়।
মৃত শ্ৰমিকজনক টেঙাখাতৰ দিঘলীয়া গাঁৱৰ ৩৮ বছৰীয়া কুমুদ গগৈ বুলি চিনাক্ত কৰা হৈছে। তেওঁ ডিব্ৰুগড়ৰ এখন ব্যক্তিগত চিকিৎসালয়ত চিকিৎসাধীন হৈ আছিল। গুৰুতৰভাৱে অগ্নিদগ্ধ হোৱাৰ ফলত অৱশেষত তেওঁ মৃত্যুক সাবটি লয়।
বিস্ফোৰণৰ পিছতে ভয়ংকৰ অগ্নিকাণ্ড
উল্লেখ্য যে, যোৱা ৬ নৱেম্বৰত অইল ইণ্ডিয়াৰ টেঙাখাতস্থিত ITF প্ৰকল্পত ৰক্ষণাবেক্ষণৰ কাম চলি থকাৰ সময়তে প্ৰায় পুৱা ৯.০৫ বজাত এক শক্তিশালী বিস্ফোৰণ সংঘটিত হৈছিল। বিস্ফোৰণৰ পিছতে খাৰুৱা তেল সংৰক্ষণ এলেকাত ভয়ংকৰ অগ্নিকাণ্ডৰ সূত্ৰপাত ঘটে।
এই ঘটনাত মুঠ সাতজন শ্ৰমিক অগ্নিদগ্ধ হৈছিল। তেওঁলোক আটাইকেইজন মুম্বাইস্থিত স্পেক্ট্ৰন ইঞ্জিনিয়াৰ্ছ প্ৰাইভেট লিমিটেডৰ কৰ্মচাৰী আছিল। আহতসকলক প্ৰথমে অসম চিকিৎসা মহাবিদ্যালয় হাস্পতালত ভৰ্তি কৰোৱা হৈছিল। পৰৱৰ্তী সময়ত উন্নত চিকিৎসাৰ বাবে কেইবাজনক ব্যক্তিগত চিকিৎসালয়লৈ স্থানান্তৰ কৰা হয়।
চাৰিজন অইল কৰ্মচাৰী নিলম্বিত, তদন্ত অব্যাহত
এই দুৰ্ঘটনাত ইয়াৰ পূৰ্বে ৰাজু দত্ত, ৰূপম গোহাঁই, তপস জ্যোতি গগৈ আৰু শৈলেন গগৈৰ মৃত্যু হৈছিল। কুমুদ গগৈৰ মৃত্যুৰ পিছত মৃতকৰ সংখ্যা পাঁচজনলৈ বৃদ্ধি পালে।
ইফালে, ঘটনাৰ পিছতে কৰ্তব্যত গাফিলতিৰ অভিযোগত অইল ইণ্ডিয়াই তিনিজন বিষয়া আৰু এজন কৰ্মচাৰীসহ মুঠ চাৰিজনক নিলম্বন কৰিছে। বিস্ফোৰণৰ প্ৰকৃত কাৰণ নিৰ্ণয়ৰ বাবে কোম্পানীটোৱে উচ্চ পৰ্যায়ৰ তদন্তৰ ব্যৱস্থা কৰিছে।
কোম্পানীটোৱে মৃত শ্ৰমিকসকলৰ পৰিয়ালক ১০ লাখ টকাকৈ আৰু আহতসকলক ৫ লাখ টকাকৈ আৰ্থিক সাহায্য প্ৰদানৰ কথাও ঘোষণা কৰিছে। এই ঘটনাই অসমৰ তেল উদ্যোগসমূহত শ্ৰমিকৰ সুৰক্ষা আৰু ঔদ্যোগিক নিৰাপত্তা ব্যৱস্থাক লৈ পুনৰ প্ৰশ্ন উত্থাপন কৰিছে।
