গুৱাহাটী সংগ্ৰহালয়ত ২৫ নৱেম্বৰৰ পৰা ঐতিহ্য মহোৎসৱ
-
২৫ৰ পৰা ২৯ নৱেম্বৰলৈ পাঁচদিনীয়া মহোৎসৱ।
-
অসম ৰাজ্যিক সংগ্ৰহালয়ত অনুষ্ঠিত হ’ব অনুষ্ঠান।
-
অসমীয়া চলচ্চিত্ৰ আৰু সাহিত্যৰ বিশেষ প্ৰদৰ্শনী।
-
পঞ্চমৰ পৰা অষ্টম শ্ৰেণীৰ শিক্ষাৰ্থীৰ বাবে সূচীকৰ্মৰ কৰ্মশালা।
সমগ্ৰ সমাচাৰ সেৱা
গুৱাহাটী, ৯ নৱেম্বৰ: অসমৰ চহকী সাংস্কৃতিক ঐতিহ্য, পৰম্পৰা আৰু কলা-সংস্কৃতিক জনসাধাৰণৰ মাজলৈ লৈ যোৱাৰ লক্ষ্যৰে গুৱাহাটীৰ অসম ৰাজ্যিক সংগ্ৰহালয়ত অনুষ্ঠিত হ’ব ‘ঐতিহ্য – সংগ্ৰহালয় মহোৎসৱ ২০২৬’। ২৫ নৱেম্বৰৰ পৰা ২৯ নৱেম্বৰলৈ পাঁচদিনীয়া কাৰ্যসূচীৰে এই মহোৎসৱৰ তৃতীয় সংস্কৰণ অনুষ্ঠিত হ’ব।
অসম চৰকাৰৰ সংগ্ৰহালয় সঞ্চালকালয়ে নতুন দিল্লীৰ ইন্দিৰা গান্ধী ৰাষ্ট্ৰীয় কলা কেন্দ্ৰৰ (IGNCA) সহযোগত এই মহোৎসৱৰ আয়োজন কৰিছে। থলুৱা আৰু জনজাতীয় বিশ্বাস তথা সংস্কৃতি বিভাগৰ অধীনত অনুষ্ঠিত হ’বলগীয়া এই অনুষ্ঠানত অসমৰ জীৱন্ত সাংস্কৃতিক ঐতিহ্য আৰু ঐতিহাসিক সম্পদসমূহ প্ৰদৰ্শন কৰা হ’ব।
প্ৰদৰ্শনী, আলোচনা আৰু সাংস্কৃতিক কাৰ্যসূচী
মহোৎসৱত ‘Framing Assam’ শীৰ্ষক প্ৰদৰ্শনীৰ জৰিয়তে অসমীয়া চলচ্চিত্ৰৰ বিকাশৰ ইতিহাস দাঙি ধৰা হ’ব। আনহাতে, ‘Ruup Barna Bak’ শীৰ্ষক প্ৰদৰ্শনীত অসমৰ সাহিত্যিক ঐতিহ্য আৰু ইতিহাসৰ বিভিন্ন দিশ উপস্থাপন কৰা হ’ব।
ইয়াৰ উপৰি তথ্যচিত্ৰ প্ৰদৰ্শন, বিশেষজ্ঞৰ সৈতে আলোচনা চক্ৰ, গুৱাহাটীৰ ঐতিহাসিক স্থানসমূহত ঐতিহ্য ভ্ৰমণ আৰু সন্ধিয়াৰ লোক-সংস্কৃতিৰ অনুষ্ঠানৰ আয়োজন কৰা হৈছে।
শিক্ষাৰ্থীৰ বাবে হাতৰ সূচীকৰ্মৰ কৰ্মশালা
মহোৎসৱৰ অন্যতম আকৰ্ষণ হ’ব ‘Needle and Thread’ শীৰ্ষক পাঁচদিনীয়া হাতৰ সূচীকৰ্মৰ কৰ্মশালা। পঞ্চম শ্ৰেণীৰ পৰা অষ্টম শ্ৰেণীলৈ অধ্যয়নৰত শিক্ষাৰ্থীসকলে এই কৰ্মশালাত অংশগ্ৰহণ কৰিব পাৰিব।
এই কৰ্মশালাৰ বাবে ১৫ নৱেম্বৰলৈ অসম ৰাজ্যিক সংগ্ৰহালয়ৰ সহায়ক কেন্দ্ৰত পঞ্জীয়ন কৰিব পাৰিব। পৰম্পৰাগত হস্তশিল্পৰ প্ৰতি নৱপ্ৰজন্মৰ আগ্ৰহ বৃদ্ধি আৰু অসমৰ সাংস্কৃতিক ঐতিহ্য সংৰক্ষণৰ লক্ষ্যৰে এই পদক্ষেপ গ্ৰহণ কৰা হৈছে।
