November 22, 2026

Global Assam News

Global and Local Assam News Website

অসমত ২০০লৈ বৃদ্ধি পাব ‘গজ মিত্ৰ’ৰ সংখ্যা
  • গজ মিত্ৰৰ সংখ্যা ২০০লৈ বৃদ্ধি।

  • প্ৰতিগৰাকী গজ মিত্ৰলৈ ১,০০০ টকাৰ সন্মানী।

  • হাতীৰ আক্ৰমণত মৃত্যু হোৱা পৰিয়াললৈ ৬ লাখ টকাৰ ক্ষতিপূৰণ।

  • ক্ষতিগ্ৰস্ত কৃষকলৈ প্ৰতি বিঘাত ৮,০০০ টকা।

সমগ্ৰ সমাচাৰ সেৱা

গুৱাহাটী, ৩ নৱেম্বৰ: অসমত ক্ৰমাৎ বৃদ্ধি পোৱা মানৱ-হাতী সংঘাত ৰোধ কৰাৰ লক্ষ্যৰে ৰাজ্য চৰকাৰে ‘গজ মিত্ৰ’ (Gaj Mitra) নেটৱৰ্ক সম্প্ৰসাৰণৰ সিদ্ধান্ত গ্ৰহণ কৰিছে। এই আঁচনিৰ অধীনত গজ মিত্ৰৰ সংখ্যা ১৫০ৰ পৰা ২০০লৈ বৃদ্ধি কৰা হ’ব।

মঙলবাৰে গুৱাহাটীৰ পাঞ্জাবাৰীৰ অৰণ্য ভৱনত বনমন্ত্ৰী জয়ন্ত মল্ল বৰুৱাই বন বিভাগৰ জ্যেষ্ঠ বিষয়া আৰু জিলা বন বিষয়াসকলৰ সৈতে এখন ভাৰ্চুৱেল বৈঠকত মিলিত হয়। বৈঠকত মানৱ-হাতী সংঘাত প্ৰতিৰোধ, বন বিভাগৰ কাম-কাজৰ উন্নতি আৰু ক্ষতিগ্ৰস্ত পৰিয়ালক সময়মতে সাহায্য প্ৰদানৰ বিষয়সমূহ আলোচনা কৰা হয়।

গজ মিত্ৰসকললৈ মাহিলি সন্মানী

বৈঠকত প্ৰতিগৰাকী গজ মিত্ৰক ১,০০০ টকাকৈ সন্মানী প্ৰদানৰ সিদ্ধান্ত গ্ৰহণ কৰা হয়। গজ মিত্ৰৰ সংখ্যা বৃদ্ধি কৰিলে বন্যহাতীৰ চলাচলৰ ওপৰত অধিক নজৰ ৰাখিব পৰা যাব আৰু জনবসতিপূৰ্ণ অঞ্চলত হাতীৰ সৈতে মানুহৰ মুখামুখি হোৱাৰ ঘটনা হ্ৰাস কৰাত সহায়ক হ’ব বুলি আশা কৰা হৈছে।

ক্ষতিগ্ৰস্ত পৰিয়াল আৰু কৃষকলৈ ক্ষতিপূৰণ

বন্যহাতীৰ আক্ৰমণত কোনো লোকৰ মৃত্যু হ’লে সংশ্লিষ্ট পৰিয়ালক দুদিনৰ ভিতৰত ৬ লাখ টকাৰ ক্ষতিপূৰণ প্ৰদান কৰা হ’ব। আনহাতে, বন্যহাতীয়ে ধাননি পথাৰ নষ্ট কৰিলে ক্ষতিগ্ৰস্ত কৃষকসকলক প্ৰতি বিঘাত ৮,০০০ টকাকৈ তিনিদিনৰ ভিতৰত ক্ষতিপূৰণ দিয়াৰ সিদ্ধান্ত লোৱা হৈছে।

ইয়াৰ উপৰি বৈঠকত বন বিভাগৰ ৰাজহ সংগ্ৰহ আৰু কাঠ উদ্যোগৰ নিয়ন্ত্ৰণ সম্পৰ্কীয় বিষয়সমূহো আলোচনা কৰা হয়। বন বিভাগৰ নিৰীক্ষণ ব্যৱস্থা শক্তিশালী কৰা আৰু বিষয়াসকলৰ মাজত সমন্বয় বৃদ্ধিৰ ওপৰতো গুৰুত্ব আৰোপ কৰা হয়।

এই পদক্ষেপসমূহৰ জৰিয়তে মানুহ আৰু বন্যহাতীৰ মাজত সংঘাত হ্ৰাস কৰাৰ লগতে ক্ষতিগ্ৰস্ত লোকসকলক দ্ৰুত সাহায্য প্ৰদানৰ লক্ষ্য নিৰ্ধাৰণ কৰা হৈছে।

About The Author

Leave a Reply

Your email address will not be published. Required fields are marked *