জাহ্নৱী কাশ্যপৰ দুটা সোণ, দুটা ৰাষ্ট্ৰীয় অভিলেখ
-
জাহ্নৱী কাশ্যপৰ দুটা সোণৰ পদক অৰ্জন।
-
২০০ মিটাৰ ফ্ৰীষ্টাইলত ২:০৩.১২ ছেকেণ্ড।
-
১০০ মিটাৰ বাটাৰফ্লাইত ১:০২.১৫ ছেকেণ্ড।
-
দুয়োটা শাখাতে নতুন ৰাষ্ট্ৰীয় অভিলেখ।
সমগ্ৰ সমাচাৰ সেৱা
গুজৰাট,২৬ অক্টোবৰ: সাঁতোৰৰ ক্ষেত্ৰত অসমলৈ গৌৰৱ কঢ়িয়াই আনিছে প্ৰতিভাৱান সাঁতোৰবিদ জাহ্নৱী কাশ্যপে। গুজৰাটৰ আহমেদাবাদত অনুষ্ঠিত প্ৰথম ছিনিয়ৰ ৰাষ্ট্ৰীয় শ্বৰ্ট কোৰ্চ সাঁতোৰ চেম্পিয়নশ্বিপৰ প্ৰথম দিনটোতে তেওঁ দুটাকৈ সোণৰ পদক অৰ্জন কৰাৰ লগতে দুটা নতুন ৰাষ্ট্ৰীয় অভিলেখ স্থাপন কৰে। প্ৰতিযোগিতাখন ২৫ অক্টোবৰত আৰম্ভ হয়।
২০০ মিটাৰ ফ্ৰীষ্টাইলত প্ৰথম সোণ
আহমেদাবাদৰ বীৰ সাৱৰকাৰ স্পৰ্টছ কমপ্লেক্সত অনুষ্ঠিত প্ৰতিযোগিতাখনৰ মহিলাৰ ২০০ মিটাৰ ফ্ৰীষ্টাইল শাখাত জাহ্নৱীয়ে ২ মিনিট ৩.১২ ছেকেণ্ড সময় লৈ প্ৰথম স্থান অধিকাৰ কৰে। এই প্ৰদৰ্শনে তেওঁক সোণৰ পদক দিয়াৰ লগতে নতুন ৰাষ্ট্ৰীয় অভিলেখ গঢ়িবলৈ সক্ষম কৰে।
১০০ মিটাৰ বাটাৰফ্লাইতো সোণৰ পদক
ইয়াৰ পিছতে মহিলাৰ ১০০ মিটাৰ বাটাৰফ্লাই শাখাত ১ মিনিট ২.১৫ ছেকেণ্ড সময় লৈ জাহ্নৱীয়ে দ্বিতীয়টো সোণৰ পদক অৰ্জন কৰে। এই শাখাতো তেওঁ নতুন ৰাষ্ট্ৰীয় অভিলেখ স্থাপন কৰে।
২৫ৰ পৰা ২৮ অক্টোবৰলৈ অনুষ্ঠিত চাৰিদিনীয়া এই প্ৰতিযোগিতাখন শ্বৰ্ট কোৰ্চ পদ্ধতিত অনুষ্ঠিত প্ৰথমখন ছিনিয়ৰ ৰাষ্ট্ৰীয় সাঁতোৰ প্ৰতিযোগিতা। অসম সাঁতোৰ সন্থাৰ সম্পাদক ভাস্কৰ দাসে জাহ্নৱীৰ এই সাফল্যৰ বাবে তেওঁক অভিনন্দন জনায়। প্ৰতিযোগিতাখনৰ প্ৰথম দিনটোতে দুটা সোণৰ পদক আৰু দুটা ৰাষ্ট্ৰীয় অভিলেখ অৰ্জন কৰি জাহ্নৱীয়ে অসমৰ ক্ৰীড়া জগতলৈ বিশেষ সন্মান কঢ়িয়াই আনিছে।
