অসমৰ কন্যাৰ গৌৰৱময় সাফল্য: শিৱাংগী সোণোৱাল ৰাজ্যৰ প্ৰথমগৰাকী মহিলা ফায়াৰ ইঞ্জিনিয়াৰ

অসমৰ প্ৰথমগৰাকী মহিলা হিচাপে ফায়াৰ ইঞ্জিনিয়াৰ হোৱাৰ গৌৰৱ অৰ্জন শিৱাংগী সোণোৱালৰ
নাগপুৰস্থিত ৰাষ্ট্ৰীয় অগ্নি সেৱা মহাবিদ্যালয় (NFSC)ৰ পৰা বি.টেক ইন ফায়াৰ ইঞ্জিনিয়াৰিং সম্পূৰ্ণ
তিনিচুকীয়া জিলাৰ ডাঙৰী গাঁৱৰ কন্যা শিৱাংগী
ৰাজ্যৰ যুৱতীসকলৰ বাবে নতুন প্ৰেৰণাৰ উৎস হিচাপে পৰিগণিত

অসমৰ কন্যাৰ উজ্জ্বল কৃতিত্ব

সমগ্ৰ সমাচাৰ সেৱা
অসম, ৮ জুন: অসমৰ বাবে এক গৌৰৱময় মুহূৰ্ত কঢ়িয়াই আনিছে তিনিচুকীয়াৰ শিৱাংগী সোণোৱালে। তেওঁ দেশৰ অন্যতম প্ৰতিষ্ঠিত অগ্নি-নিৰাপত্তা শিক্ষানুষ্ঠান, নাগপুৰস্থিত National Fire Service College (NFSC)-ৰ পৰা সফলতাৰে বি.টেক ইন ফায়াৰ ইঞ্জিনিয়াৰিং সম্পূৰ্ণ কৰি অসমৰ প্ৰথমগৰাকী মহিলা ফায়াৰ ইঞ্জিনিয়াৰ হিচাপে পৰিচিতি লাভ কৰিছে।

তিনিচুকীয়া জিলাৰ ডাঙৰী গাঁৱৰ বাসিন্দা শিৱাংগী, জিতুল সোণোৱাল আৰু বান্টি হাণ্ডিকে সোণোৱালৰ কন্যা। কঠোৰ পৰিশ্ৰম আৰু অধ্যৱসায়ৰ জৰিয়তে তেওঁ এই উল্লেখযোগ্য সাফল্য অৰ্জন কৰি অসমৰ নাম উজলাই তুলিছে।

ফায়াৰ ইঞ্জিনিয়াৰিংৰ দৰে প্ৰযুক্তিনিৰ্ভৰ আৰু চেলেঞ্জিং ক্ষেত্ৰত অসমৰ কোনো মহিলাই পূৰ্বে এনে কৃতিত্ব অৰ্জন নকৰাত শিৱাংগীৰ এই সাফল্য বিশেষ তাৎপৰ্যপূৰ্ণ বুলি বিবেচিত হৈছে। তেওঁৰ এই যাত্ৰাই ৰাজ্যৰ অসংখ্য যুৱতীক বিজ্ঞান, প্ৰযুক্তি আৰু সুৰক্ষা-সংক্ৰান্ত পেছাত আগবাঢ়িবলৈ অনুপ্ৰেৰণা যোগাব বুলি আশা কৰা হৈছে।

শিৱাংগীৰ এই ঐতিহাসিক সাফল্যৰ পিছত সামাজিক মাধ্যম আৰু বিভিন্ন মহলত অভিনন্দনৰ জোৱাৰ উঠিছে। বহুতে ইয়াক অসমৰ নাৰী শক্তিৰ এক উল্লেখযোগ্য মাইলৰ খুঁটি বুলি অভিহিত কৰিছে।