ৰাষ্ট্ৰসংঘৰ ‘মিলিটেৰী জেণ্ডাৰ এডভোকেট অব দ্য ইয়েৰ’ বঁটাৰে সন্মানিত মেজৰ অভিলাষা বৰাক;

ৰাষ্ট্ৰসংঘৰ ‘UN Military Gender Advocate of the Year’ বঁটা লাভ কৰে মেজৰ অভিলাষা বৰাকে।
প্ৰধানমন্ত্ৰী নৰেন্দ্ৰ মোদীয়ে তেওঁক আন্তৰিক অভিনন্দন জ্ঞাপন কৰে।
বৰ্তমান তেওঁ লেবাননত ৰাষ্ট্ৰসংঘৰ শান্তিৰক্ষা অভিযান UNIFIL-ত কৰ্মৰত।
ভাৰতীয় সেনাবাহিনীৰ প্ৰথমগৰাকী মহিলা কমবেট হেলিকপ্টাৰ পাইলট হিচাপেও তেওঁ পৰিচিত।
প্ৰধানমন্ত্ৰীৰ শুভেচ্ছা বাৰ্তা

সমগ্ৰ সমাচাৰ সেৱা

নতুন দিল্লী, ৮ জুনঃ ৰাষ্ট্ৰসংঘৰ সন্মানীয় ‘Military Gender Advocate of the Year’ বঁটা লাভ কৰা ভাৰতীয় সেনা বিষয়া মেজৰ অভিলাষা বৰাক প্ৰধানমন্ত্ৰী নৰেন্দ্ৰ মোদীয়ে আন্তৰিক অভিনন্দন জ্ঞাপন কৰিছে। প্ৰধানমন্ত্ৰীয়ে কয় যে এই সন্মান মেজৰ বৰাকৰ অসাধাৰণ সেৱাৰ স্বীকৃতি হোৱাৰ লগতে ৰাষ্ট্ৰসংঘৰ শান্তিৰক্ষা অভিযানত ভাৰতৰ দীৰ্ঘদিনীয়া অৱদানৰো স্বীকৃতি।

মেজৰ অভিলাষা বৰাকে বৰ্তমান United Nations Interim Force in Lebanon-ৰ অধীনত Engagement Team Commander আৰু Gender Focal Point হিচাপে দায়িত্ব পালন কৰি আছে। শান্তিৰক্ষা অভিযানত মহিলা আৰু কিশোৰীসকলৰ সশক্তিকৰণ, সমাজমুখী কাৰ্যসূচী আৰু লিংগ-সংবেদনশীলতা বৃদ্ধিৰ ক্ষেত্ৰত তেওঁৰ বিশেষ অৱদানৰ বাবে এই সন্মান প্ৰদান কৰা হৈছে।

প্ৰধানমন্ত্ৰীয়ে উল্লেখ কৰে যে মেজৰ বৰাকৰ এই সাফল্য দেশৰ লাখ লাখ যুৱক-যুৱতীক, বিশেষকৈ কন্যাসকলক দেশ আৰু মানৱসেৱাৰ ক্ষেত্ৰত আগবাঢ়ি যাবলৈ অনুপ্ৰাণিত কৰিব। তেওঁৰ এই কৃতিত্বে বিশ্ব মঞ্চত ভাৰতীয় সেনাবাহিনীৰ মৰ্যাদা আৰু অধিক উজ্জ্বল কৰি তুলিছে।

হাৰিয়ানাৰ ৰোহতকৰ নিবাসী মেজৰ অভিলাষা বৰাক ভাৰতীয় সেনাবাহিনীৰ প্ৰথমগৰাকী মহিলা কমবেট হেলিকপ্টাৰ পাইলট। তেওঁ পূৰ্বেও বিভিন্ন ক্ষেত্ৰত পথপ্ৰদৰ্শক ভূমিকা পালন কৰি আহিছে আৰু এতিয়া ৰাষ্ট্ৰসংঘৰ এই সন্মান লাভ কৰি দেশৰ বাবে নতুন গৌৰৱ কঢ়িয়াই আনিছে।