উত্তৰ-পূৰ্বাঞ্চলত বেংকিং সেৱা বৃদ্ধিৰ আহ্বান
-
দুৰ্গম অঞ্চলত বেংকিং সেৱা সম্প্ৰসাৰণৰ আহ্বান।
-
কৃষক আৰু ক্ষুদ্ৰ উদ্যোগীক সহজ ঋণ প্ৰদানৰ ওপৰত গুৰুত্ব।
-
ডিজিটেল লেনদেনৰ হাৰ ৯০.২ শতাংশ বুলি উল্লেখ।
-
মিজোৰামত যোগাযোগ আৰু সমতাপূৰ্ণ উন্নয়নৰ বাবে CSR পুঁজিৰ ব্যৱহাৰৰ আহ্বান।
সমগ্ৰ সমাচাৰ সেৱা
আইজল, ১৪ অক্টোবৰ: উত্তৰ-পূৰ্বাঞ্চলৰ দুৰ্গম অঞ্চলসমূহত বেংকিং সেৱা সম্প্ৰসাৰণ আৰু কৃষক, উদ্যোগী তথা স্থানীয় ব্যৱসায়ীসকলক সহজে ঋণ প্ৰদানৰ ব্যৱস্থা শক্তিশালী কৰিবলৈ আহ্বান জনাইছে কেন্দ্ৰীয় মন্ত্ৰী জ্যোতিৰাদিত্য এম সিন্ধিয়াই। মিজোৰাম বিশ্ববিদ্যালয়ত অনুষ্ঠিত নৰ্থ-ইষ্ট বেংকাৰ্ছ কনক্লেভ ৩.০-ত ভাষণ দি তেওঁ এই আহ্বান জনায়।
স্থানীয় অৰ্থনীতিৰ বিকাশত গুৰুত্ব
সিন্ধিয়াই কয় যে উত্তৰ-পূৰ্বাঞ্চলৰ অৰ্থনৈতিক বিকাশৰ যথেষ্ট সম্ভাৱনা আছে। এই সম্ভাৱনাক বাস্তৱ ৰূপ দিবলৈ বেংকসমূহে স্থানীয় লোকসকলৰ সৈতে ঘনিষ্ঠভাৱে কাম কৰাৰ প্ৰয়োজন। বিশেষকৈ কৃষক আৰু ক্ষুদ্ৰ উদ্যোগীসকলক ঋণৰ সুবিধা প্ৰদান কৰি তেওঁলোকৰ ব্যৱসায় সম্প্ৰসাৰণত সহায় কৰিব লাগে।
তেওঁৰ মতে, বেংকিং সেৱাৰ প্ৰসাৰৰ লগতে সহজলভ্য ঋণৰ ব্যৱস্থা শক্তিশালী কৰাটোও অঞ্চলটোৰ অৰ্থনৈতিক উন্নয়নৰ বাবে গুৰুত্বপূৰ্ণ।
ডিজিটেল লেনদেনত উত্তৰ-পূৰ্বাঞ্চলৰ অগ্ৰগতি
কেন্দ্ৰীয় মন্ত্ৰীগৰাকীয়ে উল্লেখ কৰে যে উত্তৰ-পূৰ্বাঞ্চলত ডিজিটেল লেনদেনৰ হাৰ ৯০.২ শতাংশ, আনহাতে ৰাষ্ট্ৰীয় পৰ্যায়ত এই হাৰ ৮১ শতাংশ। অঞ্চলটোত ডিজিটেল প্ৰযুক্তিৰ ব্যৱহাৰ বৃদ্ধিৰ প্ৰসংগতো তেওঁ গুৰুত্ব আৰোপ কৰে।
ইফালে, মিজোৰামৰ মুখ্যমন্ত্ৰী লালডুহোমাই দুৰ্গম অঞ্চলত যোগাযোগ ব্যৱস্থা উন্নত কৰাৰ বাবে কৰ্প’ৰেট সামাজিক দায়বদ্ধতা (CSR) পুঁজিৰ অধিক ব্যৱহাৰৰ আহ্বান জনায়। তেওঁ যুৱ প্ৰজন্মক ঋণৰ সুবিধা প্ৰদান আৰু ৰাজ্যখনৰ সকলো অঞ্চলতে সমতাপূৰ্ণ উন্নয়নৰ ওপৰত গুৰুত্ব দিয়ে।
বেংকিং সেৱাৰ সম্প্ৰসাৰণ আৰু সহজ ঋণৰ সুবিধাই উত্তৰ-পূৰ্বাঞ্চলত কৃষি, ক্ষুদ্ৰ ব্যৱসায়, উদ্যোগ আৰু পৰ্যটন খণ্ডৰ বিকাশত সহায় কৰিব বুলি আশা কৰা হৈছে।
About The Author
