মুম্বাইত বিশ্ব হিন্দু কংগ্ৰেছ ২০২৬, ভাষণ দিব মোহন ভাগৱতে

১৮–২০ ডিচেম্বৰত মুম্বাইত বিশ্ব হিন্দু কংগ্ৰেছ ২০২৬।
উদ্বোধনী অনুষ্ঠানত ভাষণ দিব মোহন ভাগৱতে।
৬০খনতকৈও অধিক দেশৰ ৪,০০০ৰো অধিক প্ৰতিনিধিৰ অংশগ্ৰহণৰ সম্ভাৱনা।
প্ৰথমবাৰৰ বাবে অনুষ্ঠিত হ’ব বিশ্ব হিন্দু এক্সপ’।

সমগ্ৰ সমাচাৰ সেৱা

গুৱাহাটী, ১৪ অক্টোবৰ: বিশ্বৰ বিভিন্ন প্ৰান্তৰ হিন্দু নেতা, চিন্তাবিদ, উদ্যোগী আৰু বিভিন্ন ক্ষেত্ৰৰ প্ৰতিনিধিসকলক একত্ৰিত কৰাৰ লক্ষ্যৰে ২০২৬ চনৰ ১৮ৰ পৰা ২০ ডিচেম্বৰলৈ মুম্বাইত অনুষ্ঠিত হ’ব চতুৰ্থ বিশ্ব হিন্দু কংগ্ৰেছ (World Hindu Congress)। ৰাষ্ট্ৰীয় স্বয়ংসেৱক সংঘৰ (RSS) মুৰব্বী মোহন ভাগৱতে সন্মিলনৰ উদ্বোধনী অনুষ্ঠানত ভাষণ প্ৰদান কৰিব।

আয়োজকসকলৰ তথ্য অনুসৰি, মুম্বাইৰ বান্দ্ৰা কুৰলা কমপ্লেক্সস্থিত জিঅ’ ৱৰ্ল্ড কনভেনচন চেণ্টাৰত অনুষ্ঠিত হ’বলগীয়া এই তিনিদিনীয়া সন্মিলনত ৬০খনতকৈও অধিক দেশৰ ৪,০০০ৰো অধিক প্ৰতিনিধিয়ে অংশগ্ৰহণ কৰাৰ সম্ভাৱনা আছে। অনুষ্ঠানটোত ১৫০ৰো অধিক বক্তাৰ অংশগ্ৰহণেৰে ৪৫টাতকৈও অধিক আলোচনা সত্ৰ অনুষ্ঠিত হ’ব।

‘সামূহিক প্ৰতিশ্ৰুতি, সামূহিক সংকল্প’ মূল বিষয়বস্তু

এইবাৰৰ সন্মিলনৰ মূল বিষয়বস্তু হৈছে ‘সমানং ব্ৰতম্ সহ চিত্তম্’ (Samanam Vratam Saha Chittam), যাৰ অৰ্থ হৈছে ‘সামূহিক প্ৰতিশ্ৰুতি, সামূহিক সংকল্প’। বিশ্বৰ বিভিন্ন প্ৰান্তৰ হিন্দু নেতা আৰু প্ৰতিষ্ঠানসমূহৰ মাজত যোগাযোগ, সহযোগিতা আৰু মত-বিনিময়ৰ এখন মঞ্চ গঢ়ি তোলাই এই সন্মিলনৰ অন্যতম উদ্দেশ্য।

সন্মিলনত ধৰ্ম, সমাজ, বিশ্বকৰ্মা আৰু ভাষা বিষয়ক চাৰিটা বিশেষ আলোচনা সত্ৰ থাকিব। এই সত্ৰসমূহত সমসাময়িক সমাজত ধৰ্মৰ ভূমিকা, সামাজিক সংহতি, সম্প্ৰদায়ৰ উন্নয়ন, ভাষিক আৰু সাংস্কৃতিক ঐতিহ্যৰ সংৰক্ষণ, দক্ষতা বিকাশ, উদ্যমিতা আৰু উদ্ভাৱনৰ দৰে বিষয়ত আলোচনা কৰা হ’ব।

প্ৰথমবাৰৰ বাবে অনুষ্ঠিত হ’ব বিশ্ব হিন্দু এক্সপ’

বিশ্ব হিন্দু কংগ্ৰেছ ২০২৬ৰ সৈতে প্ৰথমবাৰৰ বাবে ‘ৱৰ্ল্ড হিন্দু এক্সপ’ (World Hindu Expo) অনুষ্ঠিত কৰাৰ পৰিকল্পনা কৰা হৈছে। ইয়াৰ লক্ষ্য হৈছে বাণিজ্য আৰু উদ্যোগৰ সম্প্ৰসাৰণৰ লগতে অৰ্থনৈতিক বিকাশৰ নতুন সুযোগ সৃষ্টি কৰা।

আয়োজকসকলে জনোৱা অনুসৰি, মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাড়নৱিছ, অসমৰ মুখ্যমন্ত্ৰী হিমন্ত বিশ্ব শৰ্মা আৰু মধ্যপ্ৰদেশৰ মুখ্যমন্ত্ৰী মোহন যাদৱৰ অংশগ্ৰহণ নিশ্চিত কৰা হৈছে। উল্লেখযোগ্য যে ইয়াৰ পূৰ্বে ২০১৪ চনত নতুন দিল্লী, ২০১৮ চনত চিকাগো আৰু ২০২৩ চনত বেংককত বিশ্ব হিন্দু কংগ্ৰেছ অনুষ্ঠিত হৈছিল।