বঙাইগাঁৱৰ এছ এছ পিৰ নাম ব্যৱহাৰ কৰি ধন দাবী, এজন গ্ৰেপ্তাৰ
-
এছ এছ পিৰ নাম ব্যৱহাৰ কৰি ধন দাবীৰ অভিযোগ।
-
হোজাইৰ মেহবুব আলম গ্ৰেপ্তাৰ।
-
আদালতে অভিযুক্তক দুদিনৰ আৰক্ষী জিম্মালৈ প্ৰেৰণ কৰে।
-
ঘটনাৰ সৈতে আন লোক জড়িত নেকি, আৰক্ষীৰ তদন্ত অব্যাহত।
সমগ্ৰ সমাচাৰ সেৱা
বঙাইগাঁও, ৯ অক্টোবৰ: অসমৰ বঙাইগাঁও আৰক্ষীয়ে জিলাখনৰ জ্যেষ্ঠ আৰক্ষী অধীক্ষক (SSP)ৰ নাম আৰু বিভিন্ন জিলাৰ আৰক্ষী বিষয়াৰ ফটো ব্যৱহাৰ কৰি ধন দাবী কৰাৰ অভিযোগত এজন লোকক গ্ৰেপ্তাৰ কৰিছে। গ্ৰেপ্তাৰ হোৱা লোকজনক হোজাই জিলাৰ যমুনামুখৰ বাসিন্দা মেহবুব আলম বুলি চিনাক্ত কৰা হৈছে।
আৰক্ষী বিষয়াৰ পৰিচয় ব্যৱহাৰ কৰি ধন দাবীৰ অভিযোগ
আৰক্ষীৰ অভিযোগ অনুসৰি, অভিযুক্তজনে বিভিন্ন জিলাৰ আৰক্ষী বিষয়াৰ নাম আৰু ফটো ব্যৱহাৰ কৰি লোকসকলক ভয় দেখুৱাই ধন দাবী কৰিছিল। বিশেষকৈ ড্ৰাগছ আৰু অন্যান্য নিচাযুক্ত সামগ্ৰীৰ ব্যৱসায়ৰ সৈতে জড়িত বুলি সন্দেহ কৰা লোকসকলক লক্ষ্য কৰি ধন দাবী কৰাৰ অভিযোগ উত্থাপন হৈছে।
দুদিনৰ আৰক্ষী জিম্মাত অভিযুক্ত
এই ঘটনাৰ সন্দৰ্ভত বঙাইগাঁও সদৰ আৰক্ষী থানাত ২৬৩/২৬ নম্বৰৰ গোচৰ ৰুজু কৰা হৈছে। ভাৰতীয় ন্যায় সংহিতাৰ (BNS) ২০৪, ৩০৮(৭) আৰু ৩১৯(২) ধাৰাৰ অধীনত অভিযুক্তজনক গ্ৰেপ্তাৰ কৰা হয়।
আৰক্ষীয়ে অভিযুক্তজনক আদালতত হাজিৰ কৰোৱাৰ পিছত দুদিনৰ আৰক্ষী জিম্মাত লৈছে। এই ধন দাবীৰ ঘটনাৰ সৈতে আন কোনো লোক জড়িত আছে নেকি আৰু অভিযুক্তজনৰ কাৰ্যকলাপৰ পৰিসৰ কিমান, সেই সন্দৰ্ভত তদন্ত অব্যাহত আছে।
About The Author
