বিশিষ্ট স্ত্ৰী ৰোগ বিশেষজ্ঞ ডাঃ শান্তি মেধিৰ দেহাৱসান
- ডাঃ শান্তি মেধিৰ দেহাৱসান
- ৮০ বছৰ বয়সত শেষ নিশ্বাস
- অসম আৰু বিদেশত চিকিৎসা সেৱা
- নৱগ্ৰহ শ্মশানত শেষকৃত্য সম্পন্ন
সমগ্ৰ সমাচাৰ সেৱা
গুৱাহাটী, ৭ অক্টোবৰ: অসমৰ বিশিষ্ট স্ত্ৰী ৰোগ বিশেষজ্ঞ ডাঃ শান্তি মেধিৰ দেহাৱসান ঘটিছে। সোমবাৰে নিশা গুৱাহাটীৰ হেঙেৰাবাৰীৰ নিজ বাসগৃহত ৮০ বছৰ বয়সত শেষ নিশ্বাস ত্যাগ কৰে তেওঁ। বয়সজনিত কেইবাটাও সমস্যাত তেওঁ কিছুদিন ধৰি অসুস্থ হৈ আছিল।
চিকিৎসা ক্ষেত্ৰত দীঘলীয়া অৱদান
ডাঃ শান্তি মেধিয়ে গুৱাহাটী মেডিকেল কলেজৰ পৰা এমবিবিএছ সম্পূৰ্ণ কৰি উচ্চ নম্বৰ লাভ কৰিছিল। পৰৱৰ্তী সময়ত নতুন দিল্লীৰ AIIMS-ৰ পৰা MD আৰু লণ্ডনৰ পৰা MRCOG ডিগ্ৰী অৰ্জন কৰি স্ত্ৰী ৰোগ বিশেষজ্ঞ হিচাপে প্ৰতিষ্ঠা লাভ কৰে।
অসমসহ বিদেশতো সেৱা
তেওঁ অসম মেডিকেল কলেজত চিকিৎসা জীৱন আৰম্ভ কৰাৰ পিছত শিলচৰ মেডিকেল কলেজতো সেৱা আগবঢ়াইছিল। পৰৱৰ্তী সময়ত ডুবাই, মাস্কাট আৰু বাহৰেইনতো চিকিৎসা সেৱাৰ সৈতে জড়িত আছিল। দীঘলীয়া আৰু সন্মানজনক চিকিৎসা জীৱনৰ অন্তত তেওঁ অৱসৰ গ্ৰহণ কৰিছিল।
ডাঃ শান্তি মেধি প্ৰয়াত কৰ্ণেল ডাঃ মহানন্দ মেধিৰ পত্নী আছিল। তেওঁৰ শেষকৃত্য গুৱাহাটীৰ নৱগ্ৰহ শ্মশানত সম্পন্ন কৰা হয়। পুত্ৰ গুঞ্জিত মেধি আমেৰিকাৰ বষ্টনত থাকে আৰু মাতৃৰ মৃত্যুৰ পিছত মঙলবাৰে নিশা গুৱাহাটীত উপস্থিত হয়।
About The Author
