গুৱাহাটীত হোটেল-হোমষ্টেক অতিথি পৰীক্ষণত কঠোৰ নিৰ্দেশ

গুৱাহাটীত হোটেল-লজত অতিথি পৰীক্ষণ কঠোৰ
পৰিচয় আৰু অতিথিৰ তথ্য নথিভুক্ত কৰাৰ নিৰ্দেশ
নিয়ম ভংগ কৰিলে কঠোৰ ব্যৱস্থাৰ সকীয়নি
লজিং প্ৰতিষ্ঠানত নিৰাপত্তা ব্যৱস্থা শক্তিশালী কৰাৰ পদক্ষেপ

সমগ্ৰ সমাচাৰ সেৱা

গুৱাহাটী, ৩০ ছেপ্টেম্বৰ: ২২ বছৰীয়া ছাত্ৰী নিমিষা ঠাকুৰীয়াৰ মৃত্যুৰ ঘটনাৰ পিছতে গুৱাহাটী মহানগৰীত হোটেল, হোমষ্টে, বি এণ্ড বি, লজ আৰু অতিথিশালাত অতিথি পৰীক্ষণ ব্যৱস্থা অধিক কঠোৰ কৰাৰ নিৰ্দেশ দিছে আৰক্ষীয়ে।

অতিথিৰ পৰিচয় পৰীক্ষা বাধ্যতামূলক

গুৱাহাটী আৰক্ষীৰ উপ-আৰক্ষী আয়ুক্ত (ডিচিপি) বলীন দেউৰীৰ সৈতে হোটেল আৰু লজিং প্ৰতিষ্ঠানৰ মালিক-ব্যৱস্থাপকৰ এখন বৈঠকত অতিথি গ্ৰহণৰ ক্ষেত্ৰত নিৰ্ধাৰিত নিয়ম কঠোৰভাৱে পালন কৰাৰ বাবে মানক কাৰ্যপদ্ধতি (এছঅ’পি) জাৰি কৰা হয়।

আৰক্ষীয়ে সকলো অতিথিৰ পৰিচয় আৰু প্ৰয়োজনীয় তথ্য পৰীক্ষা কৰি সঠিকভাৱে নথিভুক্ত কৰাৰ নিৰ্দেশ দিয়ে। বিশেষকৈ যুৱক-যুৱতীয়ে কোঠা বুকিং কৰাৰ সময়ত প্ৰয়োজনীয় পৰিচয়পত্ৰ আৰু অন্যান্য তথ্য পৰীক্ষা কৰাৰ ওপৰত গুৰুত্ব আৰোপ কৰা হয়।

নিয়ম ভংগ কৰিলে ব্যৱস্থা

হোটেল, লজ, হোমষ্টে আৰু অতিথিশালাৰ কৰ্তৃপক্ষক নিজৰ প্ৰতিষ্ঠানত সংঘটিত কাৰ্যকলাপৰ প্ৰতি সজাগ হৈ থাকিবলৈ আৰক্ষীয়ে আহ্বান জনায়। বাধ্যতামূলক অতিথি নথি সংৰক্ষণ নকৰা বা নিৰ্ধাৰিত নিয়ম উলংঘা কৰা প্ৰতিষ্ঠানৰ বিৰুদ্ধে কঠোৰ ব্যৱস্থা গ্ৰহণ কৰা হ’ব বুলি সকীয়াই দিয়া হয়।

নিৰাপত্তা ব্যৱস্থা শক্তিশালী কৰাৰ লক্ষ্য

গুৱাহাটীৰ অস্থায়ী লজিং প্ৰতিষ্ঠানসমূহত অপৰাধমূলক কাৰ্যকলাপ প্ৰতিৰোধ আৰু নিৰাপত্তা ব্যৱস্থা শক্তিশালী কৰাৰ উদ্দেশ্যে আৰক্ষীয়ে এই সজাগতামূলক পদক্ষেপ গ্ৰহণ কৰিছে। ফটাশিল আমবাৰী অঞ্চলৰ কেইবাখনো হোটেল, লজ আৰু অতিথিশালাৰ মালিক-ব্যৱস্থাপকে বৈঠকত অংশগ্ৰহণ কৰে।